Mateo 14 - KYERƐW KRONKRON

Osuboni Yohane wu

¹ Ɛbere no mu no, ɔmansinhene Herode tee Yesu nka,

² na osee n’asomfo sɛ: Yohane suboni no ne no; wanyan afi awufo mu, na ɛno nti na tumide yi yɛ ne mu adwuma yi.

³ Na Herode aso Yohane mu akyere no de no akɔto afiase, ne nua Filipo yere Herodia nti.

⁴ Efisɛ Yohane aka akyerɛ no sɛ: Wunni ho kwan sɛ woware no.

⁵ Na ɔpɛe sɛ okum no, nanso na osuro nkurɔfo no, efisɛ na wobu no sɛ odiyifo.

⁶ Na wodii Herode awoda no, Herodia babea bɛsawee wɔn anim na ɛyɛɛ Herode fɛ.

⁷ Ɛno nti Herode kaa ntam hyɛɛ no bɔ sɛ ɔbɛma no biribiara a obebisa.

⁸ Na ne na tuu no fo bɔne ma ɔbɛkae sɛ: Fa osuboni Yohane ti to prɛte mu ma me ha yi ara!

⁹ Na ɛyɛɛ ɔhene no yaw, nanso ne ntam ne wɔn a wɔne no te adidii no nti, ɔhyɛe sɛ wɔmfa mma no.

¹⁰ Na ɔsoma ma wokotwaa Yohane ti wɔ afiase.

¹¹ Na wɔde ne ti no too prɛte mu bae, na wɔde maa ababaa no, na ɔde kɔmaa ne na.

¹² Na n’asuafo bae bɛfaa amu no kosiei, na wɔbɛka kyerɛɛ Yesu.

Nnipa mpemnum aduanma

¹³ Na Yesu tee no, ɔtenaa ɔkorow mu fii hɔ kɔɔ sare so, nkyɛn baabi. Na nkurɔfo akuwakuw no tee no, wofii nkurow so nam fam tiw no.

¹⁴ Na osii fam behuu nkurɔfo pii, na wɔyɛɛ no mmɔbɔ, na ɔsaa wɔn mu ayarefo yare.

¹⁵ Na onwini dwoe no, n’asuafo no baa ne nkyɛn besee no sɛ: Ɛha yi yɛ sare so na onwini nso adwo, gya nkurɔfo akuwakuw no kwan na wɔnkɔ nkuraa nkɔtɔ aduan nni.

¹⁶ Na Yesu see wɔn sɛ: Enhia sɛ wɔkɔ, mo ara momma wɔn biribi nni!

¹⁷ Na wosee no sɛ: Yenni biribi ha yi sɛ abodoo anum ne mpataa abien.

¹⁸ Ɛnna ose: Momfa mmrɛ me ha!

¹⁹ Na ɔhyɛɛ nkurɔfo akuwakuw no sɛ wɔntenatena sare no so, na ɔfaa abodoo anum ne mpataa abien no, na ɔhwɛɛ soro hyiraa so; na obubuu mu de abodoo no maa n’asuafo no, na asuafo no nso de maa nkurɔfo akuwakuw no.

²⁰ Na wɔn nyinaa didi mee, na wɔtasetasee mporoporowa a ɛkae no nkɛntɛn dumien mama.

²¹ Na wɔn a wodii no bɛyɛ mmarima mpemnum; wɔankan mmea ne mmofra anka ho.

Yesu kɔbɔ mpae bepɔw so

²² Na ntɛm ara na Yesu hyɛɛ asuafo no sɛ wɔnkɔ ɔkorow mu nni kan ntwa nkɔ asuogya noho, na onnya nkurɔfo akuwakuw no kwan ansa.

²³ Na owiee nkurɔfo akuwakuw no kwan gya no, ɔkɔɔ bepɔw so fa baabi mpaebɔ. Na onwini dwoe no, na aka ne nko wɔ hɔ.

²⁴ Na ɔkorow no adu ɛpo no mfinimfini, na asorɔkye rehaw no, efisɛ na mframa no rehyia wɔn.

Yesu nantew po ani

²⁵ Na ahemadakye nnɔnabiɛsa rekɔ no, Yesu nam po so kɔɔ wɔn nkyɛn.

²⁶ Na asuafo no huu no sɛ ɔnam po no so no, wɔn koma tui, na wɔkae sɛ: Ɛyɛ ɔsaman! Na wɔde ehu teɛteɛɛm.

²⁷ Na ntɛm ara Yesu kasa kyerɛɛ wɔn sɛ: Momma mo bo ntɔ mo yam, ɛyɛ me, munnsuro!

²⁸ Na Petro buaa no sɛ: Awurade, sɛ ɛyɛ wo de a, ka ma memmra wo nkyɛn nsu no ani!

²⁹ Na ose: Bra! Na Petro fii ɔkorow no mu si faa nsu no ani sɛ ɔrekɔ Yesu nkyɛn.

³⁰ Na ohuu mframa no, osuroe; na ofii ase sɛ ɔremem no, ɔteɛɛm sɛ: Awurade, gye me!

³¹ Na ntɛm ara Yesu teɛɛ ne nsa soo no mu, na ɔka kyerɛɛ no sɛ: Wo a wo gyidi sua! Adɛn nti na wugyee akyinnye?

³² Na woduu ɔkorow no mu no, mframa no gyaee.

³³ Na wɔn a wɔwɔ ɔkorow no mu no ba bɛkotow sɔree no sɛ: Onyankopɔn ba ne wo ampa.

Genesaret ayaresa

³⁴ Na wotwae no, woduu Genesaret asase so.

³⁵ Na nnipa a wɔwɔ hɔ no huu no no, wɔsoma kɔɔ asase a atwa ahyia no nyinaa so, na wɔde wɔn a wɔyare nyinaa brɛɛ no,

³⁶ na wɔsrɛɛ no sɛ ɔmma wɔmfa wɔn nsa nka n’atade ano nnwow nko ara. Na dodow a wɔde wɔn nsa kaa n'atade ano no ho yɛɛ wɔn den.