Mateo 10 - KYERƐW KRONKRON

Asuafo dumien no paw

¹ Na ɔfrɛɛ n’asuafo dumien no bae, na ɔmaa wɔn ahonhom fi so tumi sɛ wontu wɔn, na wɔnsa nyarewa ne ahoɔmmerɛw nyinaa.

² Na asomafo dumien no din ni: Nea odi kan ne Simon a wɔfrɛ no Petro, ne ne nua Andrea; Yakob a ɔyɛ Sebedeo ba no, ne ne nua Yohane,

³ Filipo ne Bartolomeo, Toma ne towgyeni Mateo, Alfeo ba Yakob ne Tadeo,

⁴ Simon a ofi Kana ne Yuda Iskariot a oyii no mae no nso.

Asomafo no adwuma

⁵ Dumien yi na Yesu somaa wɔn hyɛɛ wɔn sɛ: Mommman nnkɔ amanaman kwan so, na monnhyɛn Samariafo kurow biara mu,

⁶ na mmom monkɔ Israel fi nguan a ayera no nkyɛn!

⁷ Na mokɔ a, monkɔka sɛ: Ɔsoro ahenni no abɛn.

⁸ Monsa ayarefo yare, munnyan awufo, momma akwatafo ho mfi, muntu ahonhommɔne; munyaa no kwa, na momfa mma kwa!

⁹ Monnhwehwɛ sika anaa dwetɛ anaa kɔbere nngu mo abɔso mu,

¹⁰ monnhwehwɛ akwantu bɔtɔwa anaa ntade abien anaa mpaboa anaa poma; na ɛfata odwumayɛfo sɛ odidi.

¹¹ Na kurow anaa akuraa biara a mobɛhyɛn mu no, mummisa nea ɔfata wɔ hɔ, na ɛhɔ na montena nkosi sɛ mubefi hɔ akɔ.

¹² Na mohyɛn ofi bi mu a, munkyia emufo no.

¹³ Na sɛ ɛfata ofi no a, mo asomdwoe mmra so; na sɛ ɛmfata no a, mo asomdwoe nsan mmra mo nkyɛn.

¹⁴ Na obiara a ɔrennye mo na ɔrentie mo asɛm no, mufi ofi anaa kurow no mu rekɔ a, momporoporow mo nan ase tutuw.

¹⁵ Nokware mise mo sɛ, atemmu da no, ɛbɛfanim Sodom ne Gomora asase asen saa kurow no.

Ɔtaa ho nkɔmhyɛ

¹⁶ Hwɛ, meresoma mo sɛ nguan akɔ mpataku mfinimfini; enti monyɛ anitew sɛ awɔ, na monyɛ bɔkɔɔ sɛ mmorɔnoma.

¹⁷ Na monhwɛ mo ho yiye nnipa ho; na wɔbeyi mo ama mpanyimfo agua, na wɔaka mo mpire wɔn hyiadan mu.

¹⁸ Na me nti wɔde mo bɛkɔ amradofo ne ahemfo anim na adi adanse akyerɛ wɔn ne amanaman.

¹⁹ Na sɛ woyi mo ma a, monnnwenwen sɛnea mobɛkasa anaa nea mobɛka, na wɔde nea mobɛka no bɛma mo ɛdɔn no ara mu.

²⁰ Na ɛnyɛ mo na mokasa, na mo agya honhom no na ɔkasa mo mu.

²¹ Na onua beyi onua ama owu, na agya ayi ɔba ama, na mma asɔre atia awofo, na wɔama wɔakum wɔn.

²² Na me din nti nnipa bɛtan mo; na nea obegyina ano akodu awiei no, ɔno na wobegye no nkwa.

²³ Na sɛ wɔtaa mo kurow yi mu a, munguan nkɔ foforo mu; na nokware mise mo sɛ, morenwie Israel nkurow nyinaa mu ansa na Onipa Ba no aba.

²⁴ Osuani nsen ne kyerɛkyerɛfo, na akoa nsen ne wura.

²⁵ Ɛdɔɔso ma osuani sɛ ɔbɛyɛ sɛ ne kyerɛkyerɛfo, ne akoa sɛ ɔbɛyɛ sɛ ne wura; na sɛ wɔafrɛ ofiwura no Beelsebul a, mpɛn ahe na wɔremfa mfrɛ ne fifo?

²⁶ Enti munnsuro wɔn; na biribiara nni hɔ a ɛso akata a ɛrenna adi, anaa ahintaw a wɔrenhu.

²⁷ Nea meka mekyerɛ mo esum mu no, monka no hann mu, na nea mote no mo asom no, mompae mu nka no adan atifi.

²⁸ Na munnsuro wɔn a wokum ɔhonam na wontumi nkum ɔkra, na mmom munsuro nea obetumi asɛe ɔkra ne ɔhonam amanehunu kurom.

²⁹ So wɔntɔn nkasanoma abien nnye kaprɛ? Nanso wɔn mu biako mpo nkwati mo agya nhwe fam.

³⁰ Na mo ti nwi mpo, wɔakan ne nyinaa.

³¹ Enti munnsuro! Mosen mpatuprɛ bebree.

³² Enti obiara a ɔbɛbɔ me din nnipa anim no, me nso mɛbɔ ne din m’agya a ɔwɔ soro no anim;

³³ na obiara a ɔbɛpa me nnipa anim no, me nso mɛpa no m’agya a ɔwɔ soro no anim.

Ɔko di asomdwoe anim

³⁴ Munnsusuw sɛ mede asomdwoe baa asase so; ɛnyɛ asomdwoe na mede bae, na mmom nkrante.

³⁵ Na meba bɛpaapae mu na ɔbarima asɔre atia n’agya, na ɔbabea asɔre atia ne na, na osew asɔre atia n’asebea;

³⁶ na onipa fifo bɛyɛ n’atamfo.

³⁷ Nea ɔpɛ agya anaa ɛna kyɛn me no, ɔmfata me; na nea ɔpɛ ɔbabarima anaa ɔbabea kyɛn me no, ɔmfata me,

³⁸ na nea ɔmfa n’asɛnnua na onni m’akyi no, ɔmfata me.

³⁹ Nea ne nsa aka ne kra no, ebefi ne nsa, na nea me nti ne kra fii ne nsa no, ne nsa bɛka.

Asafo no tumi

⁴⁰ Nea ogye mo no gye me, na nea ogye me no gye nea ɔsomaa me no.

⁴¹ Nea ogye odiyifo wɔ odiyifo din mu no, ne nsa bɛka odiyifo akatua; na nea ogye onipa trenee wɔ onipa trenee din mu no, ne nsa bɛka onipa trenee akatua.

⁴² Na obiara a ɔbɛma nketewa yi mu biako nsuonwini kuruwa ma osuani din mu no, nokware mise mo sɛ, n’akatua remmɔ no.