Luka 23 - KYERƐW KRONKRON

Yesu gyina Pilato anim

¹ Ɛnna nnipakuw no nyinaa sɔre de no kɔɔ Pilato anim.

² Na wofii ase totoo n’ano sɛ: Yɛahu sɛ onipa yi resɛe yɛn man, na wabra sɛ wonnyi tow mma Kaesare, na ɔka sɛ ɔno ankasa ne ɔhene Kristo no.

³ Na Pilato bisaa no sɛ: Wone Yudafo hene no anaa? Na obuaa no sɛ: Woaka.

⁴ Na Pilato ka kyerɛɛ asɔfo mpanyin ne nkurɔfo akuwakuw no sɛ: Minhu afobusɛm biara onipa yi mu.

⁵ Nanso wɔkae ara sɛ: Ɔhwanyan ɔman mu, ɔkyerɛkyerɛ Yudea man nyinaa mu, ofii ase Galilea na ɔde abedu ha yi.

⁶ Na Pilato tee Galilea din no, obisae sɛ onipa no yɛ Galileani anaa?

Wɔde Yesu kɔma Herode

⁷ Na ohui sɛ ofi Herode asase so no, ɔma wɔde no kɔmaa Herode; na nna no mu no, na ɔno ankasa nso wɔ Yerusalem.

⁸ Herode huu Yesu no, n’ani gyei sɛ; efisɛ ɔpɛe sɛ ohu no akyɛ, na wate ne ho nsɛm ntia. Na n’ani da so sɛ ɔbɛyɛ sɛnkyerɛnne bi na wahu.

⁹ Na obisabisaa no nsɛm bebree, nanso wammua no.

¹⁰ Nso na asɔfo mpanyin ne Akyerɛwfo no gyina hɔ, na wɔtoto n’ano ara.

¹¹ Na Herode ne ne dɔm bɔɔ no adapaa, goruu ne ho, na ɔhyɛɛ no atade hanahana bi de no kɔmaa Pilato bio.

¹² Na da no ara na Pilato ne Herode faa adamfo; na kan no de, na anka wɔyɛ aka.

Pilato di ma Yesu

¹³ Na Pilato frɛɛ asɔfo mpanyin ne mpanyimfo ne ɔman no boaa ano

¹⁴ ka kyerɛɛ wɔn sɛ: Mode onipa yi abrɛ me sɛ obi a ɔsɛe ɔman; na hwɛ, mahwehwɛ no mu mo anim, na manhu nsɛm a mode totoo n’ano no mu afobusɛm biara onipa yi mu.

¹⁵ Herode nso anhu; na ɔma wɔde no brɛɛ me, na hwɛ, ɔnyɛɛ nea ɛfata sɛ wokum no.

¹⁶ Enti mɛhwe no, na magyaa no.

¹⁷ [Nso ɛsɛ no sɛ daa, afahyɛ no mu, ogyaa ɔdeduani biako ma wɔn].

¹⁸ Na wɔn nyinaa teɛɛm prɛko sɛ: Fa oyi kɔ, na gyaa Baraba ma yɛn!

¹⁹ (Ɔno na sakasaka bi a ɔkɔyɛe kurow no mu hɔ ne awudi nti wɔde no akɔto afiase).

Obu no kumfɔ

²⁰ Na Pilato pɛe sɛ ogyaa Yesu nti, ɔkasa kyerɛɛ wɔn bio.

²¹ Na wɔteɛɛm sɛ: Bɔ no asɛnnua mu, bɔ no asɛnnua mu!

²² Na ɔkaa nea ɛto so abiɛsa kyerɛɛ wɔn sɛ: Na bɔne bɛn na wayɛ? Manhu nea ɛfata sɛ wokum no, enti mɛhwe no, na magyaa no.

²³ Na wɔde nne kɛse kɔɔ so kae sɛ wɔmmɔ no asɛnnua mu; na wɔn nne boroo ne de so.

²⁴ Na Pilato buu atɛn sɛ ɛnyɛ sɛnea wobisae no.

²⁵ Na ogyaa nea sakasaka ne awudi nti wɔde no kɔtoo afiase a wɔsrɛɛ no no maa wɔn, na Yesu de, oyii no mae sɛnea wɔpɛ.

Yerusalem mmea

²⁶ Na wɔde no rekɔ no, wosoo Simon, ɔbarima bi a ofi Kirene a ofi n’afum reba no mu, na wɔde asɛnnua no too no so sɛ ɔnsoa nni Yesu akyi.

²⁷ Na ɔman no mu nnipakuw kɛse dii n’akyi, ne mmea a wɔredi no nkɔmmɔ na wɔresu no.

²⁸ Na Yesu dan n’ani kyerɛɛ wɔn kae sɛ: Yerusalem mmabea, munnsu me, na munsu mo ho ne mo mma!

²⁹ Na hwɛ, nna bi reba a wɔbɛka sɛ: Nhyira ne abonin ne ɔyafunu a ɛnwoe da ne nufu a wonnumii da.

³⁰ Ɛnna wobefi ase aka akyerɛ mmepɔw sɛ: Monhwe yɛn so! Ne nkoko sɛ: Monkata yɛn so!

³¹ Na sɛ wɔde eyi reyɛ duamono a, dɛn na wɔde bɛyɛ duwui?

³² Na wɔde nnebɔneyɛfo baanu nso kaa ne ho kɔe sɛ wonkokum wɔn.

Golgota

³³ Na woduu baabi a wɔfrɛ hɔ Tikwankoraa bea no, ɛhɔ na wɔsɛn no ne nnebɔneyɛfo no, obiako wɔ ne nifa, na obiako wɔ benkum.

³⁴ Na Yesu kae sɛ: Agya, fa kyɛ wɔn, na wonnim nea wɔreyɛ! Na wɔtweee ntonto de kyɛɛ ne ntama mu.

³⁵ Na ɔman no gyina hɔ rehwɛ. Na mpanyimfo no nso yii no ahii sɛ: Ogyee binom; sɛ oyi ne Kristo no a Onyankopɔn ayi no no a, ma onnye ne ho ɛ!

Yesu ho fɛwdi

³⁶ Na asraafo no nso goruu ne ho, na wɔbaa ne nkyɛn bɛmaa no nsa kekakeka,

³⁷ na wɔkae sɛ: Sɛ woyɛ Yudafo hene a, gye wo ho!

³⁸ Na nkyerɛwee bi nso wɔ n’atifi sɛ: Oyi ne Yudafo hene.

Odwowtwafo a ɔsakraa n’adwene no

³⁹ Na nnebɔneyɛfo a wɔasɛn wɔn no mu biako yaw no sɛ: Ɛnyɛ wo ne Kristo no? Gye wo ho ne yɛn!

⁴⁰ Na obiako no buaa no kaa n’anim sɛ: Wo nso wunsuro Onyankopɔn sɛ wowɔ afobu koro yi ara mu yi?

⁴¹ Na yɛn de de, ɛteɛ pɛpɛɛpɛ, na yɛanya nea ɛsɛ yɛn nneyɛe no; na oyi de, ɔnyɛɛ mfomso ade biara.

⁴² Na ɔkae sɛ: Yesu, sɛ woba w’ahenni mu a, kae me!

⁴³ Na ɔka kyerɛɛ no sɛ: Nokware mise wo sɛ, nnɛ wobɛka me ho Paradise hɔ.

Yesu wu

⁴⁴ Na ɛbɛyɛ sɛ dɔn a ɛto so asia no, esum duruu asase nyinaa so de kosii dɔn a ɛto so akron.

⁴⁵ Na owia duruu sum; na asɔredan mu ntama a etwa mu no mfinimfini tewee.

⁴⁶ Na Yesu de nne kɛse teɛɛm sɛ: Agya, wo nsam na mede me honhom mehyɛ. Na ɔkaa saa no, ogyaa mu.

Ne wu ka nkurɔfokuw no

⁴⁷ Na asraafo ha so panyin no huu nea aba no, ɔhyɛɛ Onyankopɔn anuonyam sɛ: Ampa ara, onipa yi yɛ onipa trenee.

⁴⁸ Na nkurɔfo akuwakuw a wɔbaa hɔ bɛhwɛɛ ade no nyinaa huu nea aba no, wɔbobɔɔ wɔn koko so san kɔe.

⁴⁹ Na n’amannifo nyinaa ne mmea a wodii n’akyi fii Galilea no abegyina akyirikyiri rehwɛ nneɛma yi.

Yesu sie

⁵⁰ Na hwɛ, ɔbarima bi a wɔfrɛ no Yosef a ɔyɛ baguani na ɔyɛ onipa pa na ɔteɛ,

⁵¹ no de, wampene wɔn agyina ne wɔn nneyɛe no so. Ofi Yudafo kurow Arimatea mu, na ɔno ankasa nso retwɛn Nyankopɔn ahenni no.

⁵² Ɔno na ɔkɔɔ Pilato nkyɛn kɔsrɛɛ no Yesu amu no.

⁵³ Na okoyi kyekyee no nwera mu, na ɔde kɔtoo ɔda a wɔatwa no ɔbo mu a onipa bi nnaa mu da mu.

⁵⁴ Na ɛda no yɛ ahosiesie da, na homeda rebɛn.

⁵⁵ Na mmea no nso a wɔne no fi Galilea bae no dii akyi kɔhwɛɛ ɔda no ne sɛnea wɔde n’amu no too mu fae.

⁵⁶ Na wɔsan besiesiee nnuru ne ngo huamhuam; na homeda no wɔyɛɛ komm homee sɛnea mmara no te no.