Luka 17 - KYERƐW KRONKRON

Hintiduato

¹ Na ɔka kyerɛɛ n’asuafo no sɛ: Ɛdan sɛ dɛn ara a, hintiduato bɛba de, nanso nea ɛnam no so bɛba no nnue!

² Anka eye ma no sɛ wɔde owiyammo kyekyere ne kɔn mu kɔtow no kyene po mu sen sɛ ɔbɛto nketewa yi mu biako hintidua.

Bɔne fakyɛ

³ Monhwɛ mo ho so yiye! Na sɛ wo nua fom a, ka n’anim; na sɛ ɔsakra n’adwene a, fa kyɛ no!

⁴ Na sɛ ɔfom wo mpɛn ason da koro, na ɔsan ba wo nkyɛn mpɛn ason ka sɛ: Masakra m’adwene a, fa kyɛ no!

⁵ Na asomafo no see Awurade sɛ: Ka yɛn gyidi ho!

Gyidi mu tumi

⁶ Na Awurade se: Sɛ mowɔ gyidi sɛ sinapi fua a, anka mobɛka akyerɛ ankye dua yi sɛ: Wo ntini ntutu na kɔtɛw ɛpo mu! Na ebetie mo.

Nokwaredi

⁷ Mo mu hena na ɔwɔ akoa a ofuntum asase anaasɛ ɔhwɛ mmoa, na ofi afum ba ofie a, obese no sɛ: Bɛsen ntɛm kɔtena adidii?

⁸ Na ɔrense no sɛ: Siesie nea medi, na bɔ abɔso bɛsom me, na minnidi na mennom ansa, na akyiri no, wo nso woakodidi na woanom?

⁹ Ɔbɛda akoa no ase sɛ wayɛ nea wɔahyɛ no no?

¹⁰ Saa ara na mo nso sɛ moyɛ nea wɔahyɛ mo nyinaa a, monka sɛ: Yɛyɛ nkoa a mfaso nni yɛn so; yɛayɛ nea ɛsɛ sɛ yɛyɛ.

Akwatafo du ayaresa

¹¹ Na ɛbae sɛ ɔrekɔ Yerusalem no, ɔfaa Samaria ne Galilea.

¹² Na ɔrekɔ akuraa bi ase no, mmarima du bi a wɔyɛ akwatafo hyiaa no a wogyinagyina akyirikyiri,

¹³ na wɔmaa wɔn nne so sɛ: Owura Yesu, hu yɛn mmɔbɔ!

¹⁴ Na ohuu wɔn no, osee wɔn sɛ: Monkɔ na momfa mo ho nkɔkyerɛ asɔfo. Na ɛbae sɛ wɔrekɔ no, wɔn ho fii.

¹⁵ Na wɔn mu biako hui sɛ ne ho asan no, ɔsan n’akyi de nne kɛse beyii Nyankopɔn ayɛ,

¹⁶ na ɔde n’anim butuw fam wɔ ne nan ase daa no ase. Ɔno de, ɔyɛ Samariani.

¹⁷ Na Yesu buae sɛ: Ɛnyɛ du no na wɔn ho fii? Na baakron no de, wɔwɔ he?

¹⁸ Wɔanhu wɔn mu biara a ɔsan de anuonyam brɛɛ Onyankopɔn sɛ ɔnanani yi nko?

¹⁹ Na osee no sɛ: Sɔre kɔ, wo gyidi agye wo.

Onyankopɔn ahenni no ba

²⁰ Na Farisifo no bisaa no sɛ da bɛn na Onyankopɔn ahenni bɛba no, obuaa wɔn sɛ: Onyankopɔn ahenni mma sɛ ani tuae,

²¹ nanso wɔrenka sɛ: Hwɛ ha anaa ɛhɔ! Na hwɛ, Onyankopɔn ahenni no, mo mu na ɛwɔ.

²² Na ɔka kyerɛɛ asuafo no sɛ: Nna bi bɛba a mobɛpɛ sɛ mubehu Onipa Ba no nna no mu biako, na morenhu.

²³ Na wobese mo sɛ: Hwɛ ha! Anaa: Hwɛ hɔ! a, monnkɔ, nso munnni wɔn akyi!

²⁴ Na sɛnea anyinam a ɛpa tew ɔsoro ase fa hyerɛn kɔ ɔsoro ase, fa baabi no, saa ara nso na onipa Ba no bɛyɛ ne da no mu.

²⁵ Nanso etwa sɛ ohu amane pii na nnɛ mma yi po no ansa.

Noa ne Lot nna ho mfatoho

²⁶ Na sɛnea ɛyɛe Noa nna no mu no, saa ara nso na ɛbɛyɛ onipa Ba no nna mu.

²⁷ Wodidii, wɔnomee, wɔwaree yerenom na wɔmaa aware de kosii da a Noa hyɛn adaka no mu, na nsuyiri no bae, na ɛbɛsɛee wɔn nyinaa.

²⁸ Sɛ nso ɛyɛe Lot nna mu no, wodidii, wɔnomee, wɔtɔe, wɔtɔnee, woduae, na wɔsisii adan.

²⁹ Na da a Lot fii Sodom kɔe no, na ogya ne sufre fi soro tɔe, na ɛbɛsɛee wɔn nyinaa.

³⁰ Saa ara na ɛbɛyɛ ɛda a onipa Ba no beyi ne ho adi no.

³¹ Da no ara, nea ɔwɔ ɔdan atifi na ne biribi wɔ ɔdan mu no, mma onnsian mmmɛfa; na nea ɔwɔ afuw mu no nso, mma ɔnnsan n’akyi.

³² Monkae Lot yere no!

³³ Obiara a ɔbɛhwehwɛ sɛ ogye ne kra no, ebefi ne nsa, na obiara a ne kra befi ne nsa no wobegye no nkwa.

³⁴ Mise mo sɛ: Anadwo no, nnipa baanu bɛda mpa koro so; wɔbɛfa obiako, na wɔagyaw obiako.

³⁵ Mmea baanu bɛbom ayam awi; wɔbɛfa obiako na wɔagyaw obiako.

³⁶ [Mmarima baanu bɛtena afum; wɔbɛfa obiako, na wɔagyaw obiako.]

³⁷ Na wobua see no sɛ: Ɛhe, Awurade? Na osee wɔn sɛ: Nea funu wɔ no, ɛhɔ na apete bɛboaboa wɔn ho ano.