Hosea 8 - KYERƐW KRONKRON

Israel nnebɔne kɛse

¹ Fa torobɛnto tua w’ano. Ɛbɛba AWURADE fi so sɛ ɔkɔre, efisɛ wɔafomfom m’apam na wɔato me mmara.

² Me na wobesu afrɛ me sɛ: Me Nyankopɔn, yenim wo, yɛn a yɛyɛ Israel.

³ Papa ayɛ Israel nwini; ma ɔtamfo ntiw wɔn ɛ!

⁴ Wɔn de, wɔasisi ahemfo, na emfi me, wɔasisi mmapɔmma nso, na minnim; wɔn dwetɛ ne wɔn sika, wɔde ayeyɛ ahoni a ɛbɛsɛe wɔn.

⁵ O Samaria, wo nantwi ba no ho yɛ nwini, m’abufuw asɔ ahyɛ wɔn, enkosi da bɛn na wɔrentumi ɔbra a ɛho tew bɔ?

⁶ Na Israel mu na ɛno fi; odwumfo na ɔyɛe, ɛnyɛ onyame ne no, na Samaria nantwi no, wobebubu no pasaa.

⁷ Na mframa na wogu, na ahum nso na wobetwa; awi a egyina hɔ nni mu; nea efifi no, wɔyam a, wonnya mu siam; sɛ ebi wɔ mu po a, ahɔho na wobedi.

⁸ Wɔamene Israel, afei wɔte amanaman mu sɛ ade bi a ani bi nsɔ.

⁹ Na wɔn de, wɔaforo kɔ Asiria; wuram afurum a ne nko atew ne ho; Efraim abobɔ adɔfo paa.

¹⁰ Sɛ wɔabobɔ amanaman mu bi paa mpo a, afei mɛboa wɔn ano, na ahemfo mu hene no nhyɛso nti, wɔn so afi ase ahuan.

¹¹ Na Efraim ama afɔremuka adɔɔso de ayɛ bɔne, afɔremuka no adan wɔn bɔneyɛ.

¹² Makyerɛw me mmara dodow no mama wɔn, wobuu no sɛ amannɔne ade.

¹³ M’ayɛyɛde afɔre a wɔbɔ no, nam nko na wokum; AWURADE ani nsɔ; afei ɔbɛkae wɔn amumɔyɛ na wabɛtwe wɔn bɔne so aso; Misraim na wɔbɛsan akɔ.

¹⁴ Na Israel werɛ afi ne yɛfo, na wɔasisi aban afɛfɛ, na Yuda ama nkurow a ɛyɛ den adɔ; nanso mɛto ne kurow mu gya, na ahyew n’aban a ɛkorɔn no.