Hiob 8 - KYERƐW KRONKRON

Ahonu de ahotɔ ba

Bildad asɛnka a edi kan.

¹ Ɛnna Suhini Bildad gyee so sɛ:

² Enkosi bere bɛn na wobɛka eyinom, na w’anom nsɛm bɛyɛ sɛ mframa dennen?

³ So Onyankopɔn bɛkyea atemmu, anaasɛ Otumfo bɛkyea trenee?

⁴ Sɛ wo mma ayɛ no bɔne a, wagyaa wɔn de wɔn ahyɛ wɔn mmarato nsam.

⁵ Sɛ wo ara wohwehwɛ Onyankopɔn akyi kwan, na wokotɔ srɛ Otumfo no,

⁶ sɛ wo ho tew na woteɛ a, ampa ara, ɔbɛkanyan ne ho ama wo, na wama wo trenee tenabea adi yiye.

⁷ Na sɛ mpo wo mfiase ade yɛ ketewa a, w’awiei bɛso kokuroo.

⁸ Na bisa awo ntoatoaso ɛ, na ma wo koma mmra nea wɔn agyanom abɔre ahu no so.

⁹ Na yɛn de, nnɛra nko na yefi hɔnom, na yennim hwee, efisɛ yɛn nna yɛ sunsuma, asase so.

¹⁰ So ɛnyɛ wɔn na wɔbɛkyerɛ wo na wɔaka akyerɛ wo, na wɔayiyi nsɛm afi wɔn komam?

¹¹ So nkyɛkyerɛ fifi nea ɔwora nni, na mmɛw ama ne ho so nea nsu nni anaa?

¹² Ɛda so wɔ ne frɔmfrɔmyɛ mu a wontwae no, edi wura nyinaa kan kisa.

¹³ Saa ara na wɔn a wɔn werɛ fi Nyankopɔn nyinaa akwan te, na ɔbɔnefo anidaso bɛyera,

¹⁴ efisɛ wotwa n’ahotoso, na n’anidaso yɛ ananse ntontan.

¹⁵ Otweri ne dan, nso ɛrennyina, okura mu, nso ɛrentena hɔ.

¹⁶ Ɔyɛ frɔmfrɔm owia ano, na n’abaa yiyi kata ne turo so,

¹⁷ ne ntini mantammantam abokuw ho, ɔhyɛn abo ntam.

¹⁸ Sɛ wɔsɛe no fi ne tenabea ɛpa no ka sɛ: Minhuu wo da.

¹⁹ Hwɛ, sɛ ne kwan ho ahosɛpɛw te ne no, na mfutuma no mu na afoforo fifi.

²⁰ Hwɛ, Onyankopɔn mpo nea odi mu, na abɔnefo nso, onso wɔn nsa.

²¹ Ɔde ɔserew bɛhyɛ w’anom ma, na wama ahurusi nne afa w’anofafa mu.

²² W’atamfo befura aniwu, na abɔnefo ntamadan rennyina hɔ bio.