Hiob 41 - KYERƐW KRONKRON

¹ So wubetumi atwe dɛnkyɛmmirampɔn darewa ano, na wode hama akyere ne tɛkrɛma anaa?

² So wode kaa bɛhyɛ ne hwenem, na wode akɔtɔkoro ahwirew n’afono mu?

³ So ɔbɛkotɔ asrɛ wo pii, anaa ɔbɛyɛ n’ano brɛbrɛ akyerɛ wo?

⁴ So ɔne wo bɛpam apam, sɛ fa no yɛ akoa daa?

⁵ So wo ne no begoru sɛ anomaa, na woasa no ahama ama wo mmabaa anaa?

⁶ So apofofo asafo besi no koso, na wɔakyɛ no mu aguadifo mu?

⁷ So wode mpeaw bɛhyɛ ne were mu ma, na wode mpataa mpɛmɛ awowɔ ne tirim?

⁸ Wode fa wo nsa ka no, hwɛ ɛ, na nea wobehu, worenyɛ no saa bio!

⁹ Hwɛ, onipa anidaso yɛ ohunu, so ɛnyɛ ne hwɛ po na ɛma obi hwe ase?

¹⁰ Obi rensi ne bo sɛ ɔbɛhwanyan no, na hena ne nea obetumi agyina n’anim?

¹¹ Hena na wadi kan ama me biribi na menhyɛ no ananmu? Nea ɛwɔ ɔsoro nyinaa ase, me na ɛwɔ me.

¹² Merennyae ne honam ade, ne ne mmaninyɛ ne n’aboaban fɛ a ɛyɛ no ho asɛnka.

¹³ Hena na obeyi ne ho abon? Ne se kyerɛpɛn abien no, hena na ɔbɛkɔ anim?

¹⁴ N’anim apon nso, hena na obehiɛ? Ne se ho yɛ hu.

¹⁵ N’akyɛm akyerɛpɛn yɛ fɛ, wɔatotom sɛ ade a wɔasɔ ano.

¹⁶ Ɛpempem so pɛpɛɛpɛ, a mframa nnya mu kwan;

¹⁷ ɛfomfam wɔn ho, edi nsusom na emu nni atewye.

¹⁸ Ne nwansi ma hann hyerɛn, na n’aniwa te sɛ adekyee anisuatɛtɛw.

¹⁹ Agyatɛn fi n’anom, ogya nturuturuwii fifi mu.

²⁰ Owusiw fi ne hwene mu tokuru mu, sɛ ɔsɛn a emu rehuru ne nkyɛkyerɛ a ɛrehyew mu.

²¹ N’ahome sɔ nsramma, na ogyaframa fi n’anom.

²² Ne kɔn mu na ahoɔden wɔ, na akomatu saw wɔ n’anim.

²³ Ne honam a ɛsensɛn hɔ fomfam ho pintinn, wogui wɔ ne ho, na entwiw.

²⁴ Ne koma yɛ den sɛ ɔbo, ɛyɛ den sɛ owiyammo.

²⁵ Sɛ ɔma ne ho so a, atumfo ho popo, na ehu ma wɔn ani so yɛ wɔn krakra.

²⁶ Wɔde nkrante ka no a, ɛnka, peaw ne pɛmɛ a wɔtow ne dade akode po;

²⁷ obu dade sɛ ntɛtɛwa, ne kɔbere sɛ duwui;

²⁸ bɛmma nka no ngu, ataabo mu abo yɛ no sɛ nkyɛnkyɛma;

²⁹ obu aporibaa sɛ nkyɛnkyɛma, na ɔserew peaw a wɔtow huuyɛ.

³⁰ N’ase yɛ abon hwetahweta, obua atɛkyɛ so sɛ porow ade.

³¹ Ɔma ebun mu huru sɛ ɔsɛn mu, ɔyɛ po sɛ srade.

³² Ɔma ɔkwan hyerɛn di n’akyi, ma wobu ebun a ehuru no sɛ dwen.

³³ Ne sɛso nni asase so; wɔyɛɛ no sɛ onsuro hwee;

³⁴ ɔhwɛ ade a ɛkorɔn nyinaa; ɔne ahokyerɛ mma nyinaa hene.