Hiob 3 - KYERƐW KRONKRON

Hiob abooboodi

¹ Eyi akyi no, Hiob buee n’ano na ɔdomee n’awoda.

² Na ɔkae sɛ:

³ Ma ɛda a wɔwoo me mu no nyera, ne anadwo a ese: Wɔanyinsɛn ɔbabanin no.

⁴ Ɛda no nnuru sum, mma Onyankopɔn mmfi soro mmmisa akyi kwan, na ɔharan bi nnhyerɛn so.

⁵ Esum ne sunsuma nnye no, omununkum ntena so, nea ɛma adekyee duru sum nyi no hu.

⁶ Anadwo no, esum kabii nkita no, wɔmmma ennnya anigye bi, afe nna no mu, wɔmmma ɛmmma asram dodow no mu.

⁷ Hwɛ, anadwo no nyɛ kwayow, ahurusi dwom bi mmma mu.

⁸ Ma wɔn a wɔdome da no mmɔ no dua, wɔn a wotumi hwanyan dɛnkyɛmmirampɔn no.

⁹ N’ahemadakye nsoromma beduru sum, ɛbɛtwɛn hann, na ebi remma, na ɛrenhu adekyee anisuatɛtɛw.

¹⁰ Efisɛ anto m’awo apon mu, na anyi ɔhaw anhintaw m’ani.

¹¹ Ɛdɛn nti na manwu ɔyafunu mu, na mannyaa mu, awoee?

¹² Ɛdɛn nti na anankoroma sɔw me, na ɛdɛn nti na metoo nufu minumii?

¹³ Anka sesɛɛ meda hɔ mayɛ komm, anka mada, ɛno de anka manya ahomeye,

¹⁴ me ne ahene ne asase so aguasemfo a wɔkyekyee amamfo fae no,

¹⁵ anaasɛ me ne mmapɔmma a wɔwɔ sika, wɔn a wɔde dwetɛ hyehyɛɛ wɔn afi amaama no.

¹⁶ Anaasɛ minni hɔ sɛ ɔpɔn ba a wɔakora no, anaa nkokoaa a wɔanhu hann da.

¹⁷ Ɛhɔ na abɔnefo nhaw obi bio, na abrɛfo gye wɔn ahome.

¹⁸ Ɛhɔ ara na nneduafo te dwoodwoo, wɔnte opiafo nne.

¹⁹ Ɛhɔ na onipa ketewa ne onipa kɛse wɔ, na akoa afi ne wura nsa.

²⁰ Ɛdɛn nti na ɔma ɔbrɛfo hann, na ɔde nkwa ma wɔn a wɔn kra werɛ ahow,

²¹ wɔn a wɔtwɛn owu, na ɛmma, na wɔbɔre hwehwɛ no sen akorade,

²² wɔn a wɔn ani gye mmoroso, na wɔn ho sɛpɛw wɔn sɛ anka wobenya ɔdamoa,

²³ ne ɔbarima a wɔde ne kwan ahintaw, na Onyankopɔn de ban atwa ne ho ahyia?

²⁴ Na m’apinisi abesi m’aduan ananmu, na me su gu sɛ nsu.

²⁵ Na nea misuro no, ɛno ara na ɛto me, na nea me bo tutu ho no, ɛba me so.

²⁶ Minnya ahodwo ne kommyɛ ne ɔhome, na ahoguan ara na ɛba.