Hiob 27 - KYERƐW KRONKRON

Hiob kyerɛ ne bemdi ne abɔnefo ahotɔ a ɛnkyɛ

¹ Na Hiob kɔɔ so maa n’abebusɛm so sɛ:

² Sɛ Onyankopɔn a wayi me bem kɔ, ne Otumfo a ɔhyɛ me kra awerɛhow no te ase yi,

³ na m’ahome nyinaa da so wɔ me mu, na Onyankopɔn ahome da so wɔ me hwene mu yi,

⁴ ampa ara, m’ano renka amumɔyɛsɛm, na me tɛkrɛma renka nnaadaasɛm!

⁵ Ɛmpare me sɛ mebu mo bem; meremma wonyi me mudi mfi me ho de bɛkɔ akosi sɛ megyaa mu.

⁶ Mekura me trenee mu dennen, na merennyaa mu; me koma remmu me fɔ me nna biara ho.

⁷ Me tamfo nyɛ sɛ ɔbɔnefo, na nea ɔma ne ho so tia me no nyɛ sɛ omumɔyɛfo.

⁸ Na ɛdɛn ne ɔkɔnkɔnsani anidaso, bere a wotwa ne nkwa so, bere a Onyankopɔn twe ne kra kɔ no?

⁹ So Onyankopɔn bɛte ne sufrɛ bere a ahohia bɛba no so no anaa?

¹⁰ Anaasɛ n’ani begye Otumfo ho, ɔbɛfrɛ Onyankopɔn bere nyinaa mu anaa?

¹¹ Mɛkyerɛ mo Onyankopɔn nsa ho asɛm, nea ɛwɔ Otumfo hɔ no, merensiw so.

¹² Hwɛ, mo de, mo nyinaa moahu, na adɛn na moda so di ahuhusɛm yi?

¹³ Eyi ne onipa, ɔbɔnefo kyɛfa a onya Onyankopɔn hɔ, ne nhyɛsofo agyapade a wonya Otumfo nsam:

¹⁴ Sɛ ne mma dɔɔso a, wɔdɔɔso ma afoa, na wɔn a wofi no mu no aduan remmee wɔn.

¹⁵ Ne nnipa a wɔbɛka no, owuyare mu na wobesie wɔn, na n’akunafo rensu.

¹⁶ Sɛ ɔboa dwetɛ ano sɛ mfutuma, na osiesie ntade sɛ dɔte a,

¹⁷ osiesie de, nanso ɔtreneeni na ɔbɛhyɛ, na dwetɛ no, nea odi bem na ɔbɛkyɛ mu.

¹⁸ Osi ne dan sɛ abubummabaa, na ɛte sɛ ɔsese a ɔwɛmfo yɛ.

¹⁹ Ɔrekɔda, na ɔyɛ ɔdefo, nso ɔrenna so nyɛ saa bio; obebue n’ani, na onni hɔ bio.

²⁰ Ahuyide fa no sɛ nsu, anadwo na ahum wia no kɔ.

²¹ Apuei mframa soa no kɔ, na ehwim no fi ne tenabea.

²² Na ɔtow gu no so, na ɔnkyɛe no so, aguan ara na ɔpɛ aguan afi ne nsam.

²³ Wɔbɛbobɔ nsam agu no so, na wɔabɔ no so hwirema de no afi ne tenabea akɔ.