Hiob 24 - KYERƐW KRONKRON

Adɛn nti na Onyankopɔn nteɛ abɔnefo ntɛm

¹ Adɛn nti na Otumfo nhyɛ bere ntua abɔnefo ka, na wɔn a wonim no no nhu ne bere no?

² Ebinom wɔ hɔ a wotwiw ɔhye, wɔfow mmoakuw, na yɛn wɔn.

³ Wɔka ayisaa afurum kɔ, wogye okunafo nantwi sɛ awowa.

⁴ Wosum ahiafo afiri ɔkwan so; asase so amanehunufo bom hintaw.

⁵ Hwɛ, sɛ sare so mfurum fi adi no, saa ara na wɔkɔ wɔn dwumadi so kɔpɛ aduan, sare so na wonya aduan ma mmofra.

⁶ Mfuw so na wotwa mmoa aduan, na wodi ɔbɔnefo bobeturo mu mpɛpɛwa.

⁷ Wɔde adagyaw na ɛda, wonni ntama, na wonni nkataho awɔw mu;

⁸ mmepɔw so sutɔ fɔw wɔn, na sɛ wonni guankɔbea nti, wɔyɛ ɔbotan atuu.

⁹ Wɔtew ɔseawuo fi nufu ano, na wogye ohiani hɔ awowa.

¹⁰ Wɔnenam adagyaw, wonni ntama, na wɔde ɔkɔm soasoa awi afiafi.

¹¹ Wokyi ngo wɔn afasu mu, wotiatia nsa-kyi-amoa so, nso wodi sukɔm.

¹² Nkurow mu nso mmarima si apini, na wɔn a wɔapira wɔn akra su frɛ mmoa, nanso Onyankopɔn mfa n’ani nkari wɔn amumɔyɛsɛm no.

¹³ Ebinom ayɛ hann anim atuatewfo, wɔnhwɛ n’akwan, na wɔntena n’atempɔn mu.

¹⁴ Ahema na owudifo sɔre, okum ɔmanehunufo ne hiani, na anadwo ɔyɛ sɛ owifo.

¹⁵ Na ɔwaresɛefo aniwa twɛn sum bere, ɔka sɛ: Aniwa bi renhu me; na ɔde nkataho kata n’anim.

¹⁶ Esum mu na wohwirewhwirew adan mu; wɔto wɔn ho pon mu awia, wonnim hann.

¹⁷ Na wɔn nyinaa, esum kabii yɛ wɔn sɛ anɔpa, efisɛ wɔne sum kabii mu ahuyide yɛ nnamfo.

¹⁸ Ne ho yɛ hare wɔ nsu ani; wɔadome ne kyɛfa asase so, ɔnnan n’ani nkɔ bobe nturo kwan so.

¹⁹ Sɛnea ɔhyew ne ahohuru nnan sukyerɛma no, saa ara nso na Asamando pra wɔn a wɔyɛ bɔne kɔ.

²⁰ Ɔyafunu a ɛwoo no no werɛ fi no, mmoawa fefew no. Wɔnkae no koraa bio, na wobebubu amumɔyɛ sɛ dua.

²¹ Odidii obonin a ɔnwo mpo ho, na wanyɛ ɔbea kunafo yiye.

²² Nanso Onyankopɔn de ne tumi twe atumfo fi hɔ; wɔtumi nya asetena pa de, nanso wonni nkwa ho anidaso biara.

²³ Ɔma wɔtena hɔ dwoodwoo, na wɔde wɔn ho to ɛno so, nanso na n’ani hwɛ wɔn akwan.

²⁴ Wodu nea ɛkorɔn, ɛyɛ kakraa pɛ, na wonni hɔ; wogyaa mu na wɔsiesie wɔn sɛ nnipa nyinaa, na wotwitwa wɔn sɛ awi mmɛtem.

²⁵ Sɛ ɛnte saa a, hena na obeyi me ɔtorofo, na wakyerɛ sɛ m’asɛm no nni mu?