Hiob 21 - KYERƐW KRONKRON

Hiob mmuae

¹ Na Hiob gyee so sɛ:

² Otie na muntie me kasa, na eyi nyɛ mo awerɛkyekye.

³ Munnyaa me mma me nso menkasa, na mekasa miwie a, afei moadi fɛw.

⁴ So me de, onipa na midi abooboo mekyerɛ no? Na adɛn nti na me home rentew me?

⁵ Monnan mo ani nhwɛ me, na mo ho nnwiriw mo, na momfa mo nsa ntuatua mo ano.

⁶ Sɛ mekae a, mebɔ piriw, na nketenkete kita me honam.

⁷ Adɛn nti na abɔnefo nya nkwa? Wonyin kyɛ, na wɔyɛ ahoɔdenfo akɛse nso?

⁸ Wɔn mma tintim wɔn anim pintinn ka wɔn ho, yiw, mekyerɛ wɔn asefo no.

⁹ Wɔn afi mu dwo, ehu bi nni mu, na Onyankopɔn nteɛso bi nni wɔn so.

¹⁰ Wɔn nantwinini wowo, na ɔhaw bi mma ho, wɔn anantwibere nya awoye, na wɔmpɔn.

¹¹ Woyi wɔn ntɔtɔfifiwa adi sɛ nguankuw, na wɔn mmotafowa nso huruhuruw.

¹² Wɔn nne di akyeneka ne sankubɔ mu, na wɔn ani gye abɛnhyɛn ho.

¹³ Wɔhwere wɔn nna nnepa mu, na wosian kɔ asaman afrɛso.

¹⁴ Nanso wɔka kyerɛɛ Onyankopɔn sɛ: Fi yɛn so, na yɛmpɛ sɛ yɛhwehwɛ w’akwan ho nimdeɛ.

¹⁵ Dɛn ne Otumfo no a yɛnsom no, na sɛ yɛbɔ no mpae a, mfaso bɛn na yebenya?

¹⁶ Nanso, Hwɛ! Ɛnyɛ wɔn ara nsam na wɔn nnepa wɔ, abɔnefo agyinatu mpare me!

¹⁷ Mpɛn ahe na abɔnefo kanea dum, na wɔn abu nso bu wɔn, na Onyankopɔn kyekyɛ awerɛhow n’abufuw mu?

¹⁸ Wɔte sɛ sakran, mframa ano, ne ntɛtɛwa a ahum soa kɔ.

¹⁹ Moka sɛ: Onyankopɔn kora wɔn amumɔyɛ so de ma wɔn mma; ma ontua wɔn ka na wonhu.

²⁰ Ma wɔn aniwa nhu wɔn mmusu, na wonhu Otumfo no abufuhyew no bi.

²¹ Na ofi a wogyaw wɔn akyi no mfa wɔn ho hwee bio, bere a wɔn asram dodow to atwa no.

²² So obi bɛkyerɛ Onyankopɔn nhumu? Ɔno a obu ɔsorofo no atɛn no.

²³ Obi wɔ n’ahoɔden pintinn nso owu, bere a ne ho tɔ no na n’asom dwo no;

²⁴ Nufusu ahyɛ ne nhina amaama, na ne nnompe mu hon yɛ bɛtɛɛ no.

²⁵ Na ɔfoforo nso, de ne kra awerɛhow wu a wanni nnepa no bi.

²⁶ Faako ara, dɔte mu na wɔdedae, na mmoawa kata wɔn so.

²⁷ Hwɛ, minim mo adwene ne adwemmɔne a mowɔ no me ho no,

²⁸ sɛ moka sɛ: Ɛhe na bakoma no fi wɔ? Na ɛhe na ntamadan a abɔnefo tenaa mu no wɔ?

²⁹ So mummisaa wɔn a wɔfa ɔkwan no so, na wɔn nsɛnkyerɛnne nso, monkarii?

³⁰ Na wɔakora nnipa bɔne so de kosi ɔsɛe da, wɔde wɔn kɔ aweredi da.

³¹ Hena na ɔbɛka wɔn ani, n'abrabɔ ho? Na nea wɔayɛ no, hena na obetua wɔn so ka?

³² Na ɔno de, wokɔgya no damoa mu, na wɔwɛn wɔn damoa so ara.

³³ Obon mu dɔtetɔw yɛ wɔn dɛ, na nnipa dodow di akyi, na n'anim nso wonnim wɔn dodow.

³⁴ Na adɛn na mokyekye me werɛ kwa, na mo mmuae yɛ nkontompo ara yi?