Hiob 20 - KYERƐW KRONKRON

Sofar kasa sɛ: Abɔnefo yiyedi nkyɛ

¹ Ɛnna Naamani Sofar buae sɛ:

² Me ho pere me nti, m’adwene yɛ me sɛ mimmua.

³ Mate nteɛso a asopa me, nanso honhom fi me nhumu mu bua me.

⁴ So wunnim eyi a efi tete, efii sɛ wɔde nnipa sii asase so no,

⁵ sɛ abɔnefo ahurusidi nkyɛ, na nyaatwomfo anigye yɛ bere tiaa bi nko?

⁶ Sɛ ne kɛseyɛ korɔn kɔpem ɔsoro, na ne ti kɔka omununkum a,

⁷ ɔbɛyera koraa sɛ ne sɛbew, wɔn a wohuu no no bɛka sɛ: Ɔwɔ he?

⁸ Obetu akɔ sɛ ɔdae, na wɔrenhu no, na wɔbɛpam no akɔ sɛ anadwo adehu.

⁹ Aniwa a ahu no renhu no bio, na ne tenabea renhu no bio.

¹⁰ Ne mma bɛpata abrɛfo, na ne nsa adan n’ahode ama.

¹¹ Ne mmerantebere mu ahoɔden hyɛɛ ne nnompe mama, na afei ɛne no abɛda dɔte mu.

¹² Sɛ adebɔne yɛɛ n’anom fremfrem, na ɔde siee ne tɛkrɛma ase,

¹³ na ɔkyɛee so na wannyaa mu, na ɔma ɛkaa ne dodom a,

¹⁴ afei de n’aduan asakra ne nsono mu, nhurutoa bɔre wɔ ne yam.

¹⁵ Wamene adedodow, na ɔbɛfe bio, Onyankopɔn betu afi ne yam;

¹⁶ obefew ahurutoa bɔre, na ɔprammiri tɛkrɛma bekum no.

¹⁷ N’ani rennye nsuwansuwa ho, ɛwo ne nufusu ani srade asuasu nsubɔnten ho.

¹⁸ Ɔbɛdan nea wabrɛ ho ama, na ɔremmene, n’ade a wanya no, ɔrenni ho ahurusi, sɛ ne dodow te no.

¹⁹ Efisɛ wapɛtɛw abrɛfo agyaw wɔn, na wafa ofi a ɛnyɛ ɔno na ɔkyekyee.

²⁰ Sɛ ne yafunu ammee da nti, ɔrenkora nea n’ani gye ho no biara so.

²¹ Wannidi annyaw bi da, enti n’ahonyade rentena hɔ.

²² N’adedodow mayɛ mu ne ho behia no, amanehunufo nyinaa nsa bɛba no so.

²³ Ɔbɛma n’abufuhyew aba no so, ama ɔde ahyɛ n’afuru ma, na ɔbɛma atɔ agu no so de ayɛ n’aduan.

²⁴ Oguan fi dade akode ano a, kɔbere agyan bɛwɔ no ahwirew no mu;

²⁵ otu fi ne honam mu, na agyan no fi ne bɔnwoma mu a, owu nyinnyam begu no so.

²⁶ Wɔde sum nyinaa asie n’akorade, ogya a obi mfita mu bɛhyew no, ɛbɛhyew nea aka ne ntamadan mu.

²⁷ Ɔsoro beyi n’amumɔyɛ adi, na asase bɛsɔre ahyɛ no.

²⁸ Wɔbɛsoa ne fi ahonyade akɔ, wɔbɛtwe akɔ, n’abufuw da no.

²⁹ Eyi ne onipa, ɔbɔnefo kyɛfa a, efi Onyankopɔn nkyɛn, ne n’agyapade, a Onyankopɔn ahyɛ ama no no.