Hiob 18 - KYERƐW KRONKRON

Bildad kasa sɛ: Abɔnefo bɛsɛe

¹ Ɛnna Suhini Bildad buae sɛ:

² Mobɛkɔ nsɛnkeka so akosi da bɛn? Munnwen ho, na ɛno akyi no, yɛakasa.

³ Adɛn na wobu yɛn sɛ mmoa, na yɛyɛ mo ani so tibɔnkɔso anaa?

⁴ Wo a wotetew wo ho w’abufuw mu, so wo nti na wobegyaw asase, na wɔatu ɔbotan afi ne sibea anaa?

⁵ Nanso ɔbɔnefo kanea bedum, na ne gyaframa renhyerɛn.

⁶ Hann beduru sum, ne ntamadan mu, na ne kanea adum wɔ no so;

⁷ n’ahoɔden anammɔn ano bɛmoa, na n’agyinatu ahwe no ase.

⁸ Na n’ankasa ne nan bɛka no ato atena mu, na wanantew mfiri so.

⁹ Nsɛmma beso ne nantin na nkyehama akyekyere no.

¹⁰ Wɔde hentia behintaw fam ama no, na wɔasum no afiri ɔkwan so.

¹¹ Ehu bekita no mmaa nyinaa ahyia, na atiw no n’anammɔn mu.

¹² Ɔkɔm bɛsɛe n’ahoɔden, na mmusu ama wahintiw.

¹³ Ebedi ne honam akwaa, yiw owu abakan bedi n’akwaa.

¹⁴ Wobetu n’anidaso afi ne ntamadan mu, na wɔde no akɔ ahude mu hene no nkyɛn.

¹⁵ Nea ɛnyɛ ne dea bɛtena ne ntamadan mu, wɔbɛbɔ sufrɛ apete ne tenabea.

¹⁶ Ne ntini bewuwu wɔ n’ase, na n’abaa agunguan wɔ soro.

¹⁷ Ne nkae bɛsɛe afi asase so, na ɔrennya din asase ani.

¹⁸ Wobesum no afi hann mu akɔ sum mu, na wɔapam no afi wiase.

¹⁹ Ɔrennya mma ne mmanana ne man mu, na aseni bi renka n’atenae.

²⁰ Ne da bɛyɛ wɔn a wɔwɔ atɔe ahodwiriw, sɛnea ehu kitaa wɔn a wɔwɔ apuei no.

²¹ Ampa ara, sɛnea amumɔyɛfo tenabea te ni, na nea onnim Onyankopɔn no nso kyɛfa ni.