Hiob 17 - KYERƐW KRONKRON

¹ M’ahome asa, me nna ahi, damoa na ɛwɔ hɔ ma me.

² Ampa ara, ahiiyifo na ɛne me wɔ hɔ, na m’ani tua wɔn ntɔkwapɛ.

³ Si awowa ɛ, di me agyinam wo ara w’anim. Hena na obegyina m’akyi?

⁴ Na woayi nimdeɛ ahintaw wɔn koma, enti woremma wɔn so.

⁵ Nea ɔpa ne nnamfo de nya kyɛfa bi no, ne mma aniwa po bɛhwere.

⁶ Na ɔde me ayɛ aman akasabebui, na madan ani so hinam.

⁷ M’awerɛhow nti m’ani so asiw, na me ho ade nyinaa ayɛ sɛ sunsuma.

⁸ Teefo ho dwiriw wɔn eyi ho; na nea odi bem no bo huru ɔkɔnkɔnsani.

⁹ Nanso ɔtreneeni bekura ne kwan mu, na nea ne nsa ho tew no bɛkɔ so anya ahoɔden.

¹⁰ Na mo nyinaa, monsan mmra ɛ! Nanso merenhu mo mu nyansafo biara.

¹¹ Me nna atwam, wɔatwitwa m’atirimbɔ mu, me koma ade a ɛpɛ no mu.

¹² Wɔde anadwo yɛ awia; wose: Hann bɛn nea esum wɔ.

¹³ Sɛ mede asaman meyɛ me fi, na metow me mpa esum mu,

¹⁴ na mise ɔdamoa sɛ: M’agya ne wo, ne mmoawa sɛ: Me na ne me nuabea ne mo, a,

¹⁵ na afei, ɛhe na m’anidaso wɔ? Na nea m’ani da so no, hena na obehu?

¹⁶ Ebesian akɔ Asaman adaban mu, bere a yɛn nyinaa home wɔ mfutuma mu.