Hiob 16 - KYERƐW KRONKRON

Hiob su frɛ Onyankopɔn

¹ Na Hiob gyee so sɛ:

² Mate saa nsɛm a ɛte sɛɛ bebree ntee; mo nyinaa yɛ gyamserefo.

³ So nsɛnhuhu yi awiei ni? Anaasɛ ɛdɛn na ɛkaa wo ma wubua?

⁴ Sɛ mewɔ me tebea mu a, anka me nso mɛkasa sɛ mo, anka mɛhɔre nsɛm magu mo so, na mawosow me ti magu mo so;

⁵ Yiw anka mede m’ano mɛhyɛ mo den, na m’anom duema ama mo yaw abotow.

⁶ Sɛ mekasa a, me yaw no mmotow, na sɛ migyae nso a, ɛso nhuan ara.

⁷ Na afei de, Onyankopɔn agurow me; woama me ho nnipa nyinaa agu;

⁸ woapompono me ma adan adanse atia me, na me fɔn asɔre ahyɛ me na atoto m’ano wɔ m’anim.

⁹ Watetew me n’abufuw mu na ɔtaa me; ɔtwerɛ ne se gu me so; m'ahohiafo no nworam n’ani hwɛ me.

¹⁰ Wɔtɛɛtɛɛ wɔn anom hyɛ me, wɔde ahohorabɔ bobɔ m’asom, wɔn nyinaa boaboa wɔn ho ano hyɛ me.

¹¹ Onyankopɔn ayi me ahyɛ abusufo nsa, na wasum me ato abɔnefo nsam.

¹² Anka midi yiye, na obubuu me. Osoo me kɔn na obubuu me pasaa, na ɔde me sii hɔ yɛɛ ne botae;

¹³ n’agyan dii me so atwagu, ɔpaee m’asaabo mu, na wankora so, ohwiee me bɔnwoma guu fam;

¹⁴ oburuw me de oburuw paee oburuw so; ɔtow baa me so sɛ ɔdɔmmanin.

¹⁵ Mepam atweaatam mekataa me were so, na mede m’ahoɔden metoo mfutuma mu.

¹⁶ Osu nti m’anim abere kɔkɔkɔkɔ, na owu sunsuma da m’anisuatɛtɛ so.

¹⁷ Nanso amim bi nni me nsam, na me mpaebɔ ho tew.

¹⁸ O! Asase, nkata me mogya so, na mma me sufrɛ nnnya ɔhomebea!

¹⁹ Seisei po, hwɛ, ɔsoro na me dansefo wɔ, na me dimafo wɔ nea ɛkorɔn.

²⁰ Me nnamfo po di me ho fɛw, nanso Onyankopɔn na m’aniwa poroporow nsu ma no.

²¹ Sɛ onni mma onipa, Onyankopɔn anim, sɛ onipa ba di ma ne yɔnko no.

²² Na mfe a ɛwɔ ano no bedu, na makɔ ɔkwan a merensan memma.