Hiob 15 - KYERƐW KRONKRON

Elifas ka Hiob anim na ɔkyerɛ abɔnefo mmusu

¹ Ɛnna Temanni Elifas buae sɛ:

² So onyansafo de nimdeɛ huhuw bebua, na ɔde apuei mframa ahyɛ n’afuru ma?

³ Ɔde nsɛm a ɛmfra beyi ntɛn, ne nsɛnkekae a mfaso nni mu?

⁴ Nso wotow onyamesuro kyene, na wuhuan Onyankopɔn anim mpaebɔ adwene so.

⁵ Na w’ano kyerɛ wo bɔne, na woafa anifere tɛkrɛma.

⁶ Wo ara w’ano na ebu wo fɔ, na ɛnyɛ me, yiw, wo ankasa w’ano na edi adanse tia wo.

⁷ So wone nea odi kan a wɔwoo no onipa, na wonyinsɛn wo ansa na wɔyɛɛ nkoko?

⁸ So wukotiee Onyankopɔn agyinatu, na woasiw nyansa ano afa?

⁹ Dɛn na wunim a yennim, na wuhu mu a enni yɛn nkyɛn?

¹⁰ Hwɛ nea wafuw dwen ne akwakoraa wɔ yɛn mu, nea ɔsen w’agya panyin mpo.

¹¹ So Onyankopɔn awerɛkyekye ne, nsɛm a ɔne wo ka no brɛoo no sua w’ani so anaa?

¹² Adɛn na wo koma twe wo kɔ, na adɛn na w’ani pa anyinam,

¹³ na wodan wo honhom tia Onyankopɔn na woma nsɛnkekae fi w’anom?

¹⁴ Hefo ne adasamma, na wɔn ho bɛtew, anaa wɔn a ɔbea awo wɔn no bɛteɛ?

¹⁵ Hwɛ, n’akronkronfo mpo ɔmfa ne ho nto wɔn so, na ɔsoro ho nso ntew n’ani so.

¹⁶ Na menne nea ne ho yɛ nwini na waporɔw, onipa a ɔnom amumɔyɛ sɛ nsu.

¹⁷ Mɛkyerɛ wo, na tie me; na nea mahu no, mɛka akyerɛ wo.

¹⁸ Nea anyansafo aka, na wɔansiw so fi wɔn agyanom bere so,

¹⁹ wɔn nko na wɔde asase no maa wɔn, na ɔhɔho biara antwam wɔn mu.

²⁰ Ɔbɔnefo ho yeraw no, ne nna nyinaa, na wɔde mfe a wɔakan asie otirimmɔdenfo.

²¹ Ehu nkate gyigye n’asom, asomdwoe po mu na ɔsɛefo ba no so.

²² Onnye nni sɛ ɔbɛsan afi sum mu, na wɔayi no ama afoa.

²³ Okyini hwehwɛ aduan, se: Ɛhe na ɛwɔ? Onim sɛ esum da abɛn no.

²⁴ Ahohia ne ahokyere yi no hu, etintim no sɛ ɔhene a wasiesie ne ho ama ɔko a ɛyɛ hu.

²⁵ Efisɛ wateɛ ne nsa wɔ Onyankopɔn so, na watew Otumfo so atua.

²⁶ Ɔde kɔn a asen atow aba no so, ne n’akyɛm akyi apɔwapɔw a emu yɛ duru no;

²⁷ efisɛ wama ne srade akata n’anim, na wama ne mfe mu adɔre srade,

²⁸ na wakɔtena nkurow a agu so, afi a obi nte mu na wɔahyɛ sɛ ɛnyɛ afituw mu:

²⁹ Ɔrennya ne ho, na n’adedodow nso rennyina, na ne nnɔbae renkonkom mma fam;

³⁰ ɔremfa ne ho mfi sum mu, ogyaframa bɛma ne nnubaa agunguan, na mframa bɛpra ne hyerɛn akɔ;

³¹ mma ɔmmfa ne ho nnto ahuhude so nnnaadaa ne ho, na ahuhude ara na ɛbɛyɛ n’akatua.

³² Ne da nnya nnui no na akatua no bɛba, na ne dubaa renyɛ frɔmfrɔm;

³³ ɔbɛporow n’akasiaw abun sɛ obobe de, na wawosow ne nhwiren agu sɛ ngodua de;

³⁴ na abɔnefo fekuw bɛyɛ abonin, na ogya bɛhyew adammudegye ntamadan.

³⁵ Wonyinsɛn ɔhaw, na wɔwo mmusu, na wɔn yafunu siesie nnaadaa.