Hesekiel 24 - KYERƐW KRONKRON

Ɔsɛn a ehuru no. Yerusalem awiei

¹ Na AWURADE asɛm baa me nkyɛn afe a ɛto so akron, ɔsram a ɛto so du no, da a ɛto so du no sɛ:

² Onipa ba, kyerɛw da yi din, da yi ara. Babel hene atua Yerusalem da yi ara.

³ Na bu asowui fi no bɛ ka kyerɛ wɔn sɛ: Sɛ AWURADE Nyankopɔn se ni: Fa ɔsɛn no si so, fa si so, na hwie nsu nso gu mu.

⁴ Fa ne nankum nso gu mu, nankum a eye nyinaa, ɔsrɛ ne basa, nnompe a eye nyinaa na fa hyɛ mu ma;

⁵ fa nguan mu wɔn a woye no, na fa nnyina hyehyɛ nnompe no ase ma enhuru yiye, na ne nnompe nso mmen mu.

⁶ Ɛno nti sɛ AWURADE Nyankopɔn se ni: Due, mogya kurow! Ɔsɛn a emu agye nkannare a ne nkannare mfii no mu. Yiyi mu ade, nankum, nankum; wɔnntwe so ntonto.

⁷ Na ne mogya wɔ no mu; waka agu ɔbotan firefire so, wanhwie angu fam, na wɔde dɔte akata so.

⁸ Nea ɛbɛyɛ na ahwanyan anibere na ama aweredi aba nti na memaa ne mogya guu ɔbotan pataa so na wɔankata so yi.

⁹ Ne saa nti, sɛ AWURADE Nyankopɔn se ni: Due, mogyahwiegu kurow!

¹⁰ Ma nnyina nnɔɔso, ma ogya no nnɛw, na nam no nhono, nu mu ma empiw na nnompe no nhyew.

¹¹ Na fa no hunu si nsramma no so, nea ɛbɛyɛ na ne kɔbere adɔ na emu adɔ kɔɔ, na emu fi no anan na ne nkannare asa.

¹² Ɔkwa ara na mabrɛ me ho, nanso ne nkannare dodow no mfi; ogya mu na wɔmfa ne nkannare nkɔ.

¹³ Wo fi mu wɔ abusude; sɛ matwiw wo ho na efi nti, wo ho rentew mfi wo fi no mu bio, de bɛkɔ akosi sɛ mɛma m’abufuhyew adwo wo ho.

¹⁴ Me, AWURADE, na maka; ɛbɛba na mɛyɛ. Merennyae na merenkyɛe so na merennu me ho; sɛ w’akwan te ne sɛ wo nneyɛe te no, saa na wobebu wo atɛn, AWURADE Nyankopɔn asɛm ni.

Obiara nnyam no

¹⁵ Na AWURADE asɛm baa me nkyɛn sɛ:

¹⁶ Onipa ba, hwɛ, merebɛbɔ wo de ayi w’aniwa ade a ɛpɛ no afi wo ho; na ntwa adwo, nsu, na mma wo nusu nnsen.

¹⁷ Gu ahome komm, nni owufo ho nkɔmmɔ, fa w’abotiri bɔ wo ti, na fa wo mpaboa hyɛ w’anan, na nkata w’ano, na nni nnipa aduan.

¹⁸ Na mekasa mekyerɛɛ ɔman no anɔpa, na me yere wui anwummere, na anɔpa no meyɛe sɛnea wɔhyɛɛ me no.

¹⁹ Na nkurɔfo no ka kyerɛɛ me sɛ: So worenkyerɛ yɛn dekode a eyinom a woreyɛ yi kyerɛ wɔ yɛn ho anaa?

²⁰ Na meka mekyerɛɛ wɔn sɛ: AWURADE asɛm baa me nkyɛn sɛ:

²¹ Kasa kyerɛ Israel fi sɛ: Sɛ AWURADE Nyankopɔn se ni: Hwɛ, merehura me kronkronbea ho, mo ahoɔden ahokyerɛ no, mo aniwa ade a ɛpɛ ne mo kra ade a ɛdɔ ho no; na mo mmabanin ne mo mmabea a mugyawee no bɛtotɔ nkrante ano.

²² Na mobɛyɛ sɛnea mayɛ yi, morenkata mo ano na morenni nnipa aduan,

²³ na mo ahyehyɛde bɛbobɔ mo ti, na mo mpaboa ahyehyɛ mo anan; morentwa adwo na morensu, na mobɛsɔn agu, mo amumɔyɛ mu, na moasisi apini akyerɛkyerɛ mo ho.

²⁴ Na Hesekiel ayɛ mo sɛnkyerɛnne; sɛnea wayɛ yi nyinaa, mobɛyɛ bere a ɛbɛbam no, na moahu sɛ mene AWURADE Nyankopɔn.

²⁵ Na wo, onipa ba, ɛda no ara a megye wɔn nsam wɔn ahoɔden, wɔn ahyehyɛde ho ahosɛpɛw, wɔn anigye ade, ne wɔn kra ade a ɛpɛ no, wɔn mmabanin ne wɔn mmabea no,

²⁶ da no ara na nea wafi mu afi bi bɛba wo nkyɛn abɛma w’aso ate.

²⁷ Ɛda no ara na wo ne nea wafi mu afi no ano bebue, na wobɛkasa na worentɔ mum bio, na wobɛyɛ wɔn sɛnkyerɛnne na wɔahu sɛ mene AWURADE.