Atemmufo 8 - KYERƐW KRONKRON

Midianfo so nkunimdi awiei

¹ Na Efraim mmarima ka kyerɛɛ no sɛ: Ɛdɛn nti na wo ne yɛn adi saa asɛm yi sɛ wo ne Midian rekɔko no, woamfrɛ yɛn? Na wɔne no hamee dennen pa ara.

² Na ɔka kyerɛɛ wɔn sɛ: Dɛn na mayɛ afei a ɛte sɛ mo de? So Efraim mpɛpɛwadi nye nsen Abieser bobetew nyinaa?

³ Mo nsam na Onyankopɔn de Midian asafohene Oreb ne Seeb ahyɛ, na dɛn na matumi mayɛ sɛ mo? Na ɔkaa saa no, wɔn bo gyaa no fuw.

⁴ Na Gideon duu Yordan ano no, ɔne mmarima ahasa a wɔka ne ho no twae; wɔabrɛ, nanso wotiw wɔn ara.

⁵ Na ɔka kyerɛɛ Sukotfo no sɛ: Mesrɛ mo, momma mmarima a wodi m’akyi yi abodoo sebɔw bi ɛ, na wɔabrɛ, na me nso meretiw Midian ahene Seba ne Salmuna.

⁶ Na Sukot atitiriw no kae sɛ: So Seba ne Salmuna wɔ wo nsam dedaw na yɛmfa abodoo mma wo dɔm yi anaa?

⁷ Na Gideon kae sɛ: Eyi nti sɛ AWURADE nya de Seba ne Salmuna hyɛ me nsa a, ɛnne mede sare so nsɔe ne akraate mɛtetew mo honam.

⁸ Na ofii hɔ kɔɔ Penuel, na ɔne wɔn kasae saa ara. Na Penuelfo no buaa no sɛnea Sukotfo no buaa no no.

⁹ Na ɔka kyerɛɛ Penuelfo no nso sɛ: Sɛ mesan meba dwoodwoo a, meburuw abantenten yi.

¹⁰ Nso na Seba ne Salmuna wɔ Karkor, na wɔn dɔm ka wɔn ho; wɔbɛyɛ nnipa ɔpedunum, Apueifamfo dɔm no nkae nyinaa; efisɛ nnipa a wɔtwe nkrante ɔpeha aduonu na atotɔ.

¹¹ Na Gideon foro faa ntamadan mutefo kwan so, Noba ne Yogbeha apuei, na okokunkum dɔm no, efisɛ na dɔm no ani nni wɔn ho so.

¹² Na Seba ne Salmuna guanee, na otiw wɔn kɔkyeree Midian ahene baanu no, Seba ne Salmuna, na ɔbɔɔ dɔm no nyinaa gui.

¹³ Ɛnna Yoas ba Gideon san fii dɔm no mu faa Heres aforoe bae.

¹⁴ Na ɔkyeree aberante bi a ofi Sukot, na obisaa no, na ɔkyerɛw Sukot atitiriw ne mpanyimfo no din maa no, mmarima aduɔsɔn asɔn.

¹⁵ Na ɔbaa Sukotfo no nkyɛn bɛkae sɛ: Hwɛ, Seba ne Salmuna a wɔn nti mosopaa me sɛ: So Seba ne Salmuna wɔ wo nsam dedaw na yɛmma wo mmarima a wɔabrɛ no abodoo no ni?

¹⁶ Na ɔfaa kurow no mu mpanyimfo, na ɔfaa sare so nsɔe ne akraate, de kyerɛɛ Sukotfo no nyansa.

¹⁷ Na oburuw Penuel abantenten no, na okunkum kurow no mu mmarima.

¹⁸ Na ɔka kyerɛɛ Seba ne Salmuna sɛ: Mmarima a mukunkum wɔn Tabor no te dɛn? Na wose: Wɔne wo pɛ, wɔn nyinaa sesɛ ahene mma.

¹⁹ Na ɔkae sɛ: Me nuanom, me na mma ne wɔn; sɛ AWURADE te ase yi, sɛ moma wɔtenaa ase a, anka merenkum mo.

²⁰ Na ɔka kyerɛɛ n’abakan Yeter sɛ: Sɔre kum wɔn! Nanso abofra no antwe ne nkrante, na osuro, efisɛ ɔda so yɛ abofra.

²¹ Na Seba ne Salmuna kae sɛ: Wo ara sɔre tow yɛn dade, na sɛ ɔbarima te na ne mmaninyɛ te. Ɛnna Gideon sɔre kunkum Seba ne Salmuna, na ɔfaa asram nketewa nnwinne a egu wɔn yoma kɔn mu no.

²² Na Israel mmarima ka kyerɛɛ Gideon sɛ: Di yɛn so, wo ne wo ba ne wo ba ba nyinaa, efisɛ wo na woagye yɛn afi Midian nsam.

²³ Na Gideon ka kyerɛɛ wɔn sɛ: Me de, merenni mo so, na me ba nso nnni mo so, AWURADE na onni mo so.

²⁴ Na Gideon ka kyerɛɛ wɔn sɛ: Mebisa mo hɔ biribi: Mo nyinaa mfa mo asade mu nkaa mmrɛ me. Efisɛ Midianfo yɛ Ismaelfo nti, wɔwowɔ sika nkaa.

²⁵ Na wose: Yefi yɛn pɛ mu de bɛma. Na wɔde ntama sɛw hɔ, na obiara tow n’asade mu nkaa guu so.

²⁶ Na sika nkaa a obisae no ano si sika nnwetɛbona apem ahansɔn; ɛsono asram nketewa nnwinne ne asom ahyehyɛde ne ntade a ɛberedum a ɛhyehyɛ Midian ahene no, na ɛsono wɔn yoma kɔn mu ahyehyɛde no.

²⁷ Na Gideon de yɛɛ asɔfotade sɛso sɛ ohoni a, ɔde too ne kurow Ofra mu. Ɛhɔ na Israel nyinaa dii akyiri aguamammɔ mu, na ɛdan Gideon ne ne fi afiri.

²⁸ Na wɔbrɛɛ Midian ase Israelfo anim, na wɔamma wɔn ti so bio. Na asase no so dwoe Gideon bere so mfirihyia aduanan.

²⁹ Na Yoas ba Yerubaal siim kɔtenaa ne fi.

³⁰ Na Gideon wɔ mmammarima aduɔsɔn a wofi n’asen mu, efisɛ ɔwɔ yerenom pii.

³¹ Na ne mpena a ɔwɔ Sekem no nso woo babarima maa no, na ɔtoo no din Abimelek.

³² Na Yoas ba Gideon wui na wabɔ akora pa ara, na wosiee no n’agya Yoas asiei a ɛwɔ Ofra a ɛyɛ Abi-eserfo de no.

³³ Na Gideon wui no, Israelfo san kodii Baalim akyi aguamammɔ mu, na wɔfaa Baal-berit de yɛɛ wɔn nyame.

³⁴ Na Israelfo ankae AWURADE wɔn Nyankopɔn a oyii wɔn fii wɔn atamfo nyinaa nsam hyiae no;

³⁵ nso wɔanyɛ Yerubaal-gideon fi adɔe amfa antua yiye a ɔyɛɛ Israel no nyinaa so ka.