Atemmufo 14 - KYERƐW KRONKRON

Samson aware ne n’aborɔme no

¹ Na Samson sian kɔɔ Timna, na okohuu ɔbea bi wɔ hɔ a ɔyɛ Filistifo mmabea no bi.

² Na ɔforo bae bɛka kyerɛɛ n’agya ne ne na sɛ: Makohu ɔbea bi wɔ Timna, Filistifo mma mu, na monkɔfa no mmrɛ me nware.

³ Na n’agya ne ne na ka kyerɛɛ no sɛ: So wo nuanom mmabea ne me man nyinaa mu nni ɔbea bi, na worekɔ akɔware ɔbea Filistifo momonotofo no mu? Na Samson ka kyerɛɛ n’agya sɛ: Ɔno na kɔfa no brɛ me, na ɔno na ɔsɔ m’ani.

⁴ Na n’agya ne ne na nnim sɛ eyi fi AWURADE, na ɔrepɛ Filistifo ho kwan; efisɛ saa bere no na Filistifo di Israel so.

⁵ Na Samson ne n’agya ne ne na siim kɔɔ Timna. Na woduu Timna bobe nturo ho, na hwɛ, gyataforo bi boboom hyiaa no.

⁶ Na AWURADE honhom sii no so, na ɔtetew no mu, sɛnea wɔtetew abirekyi ba mu, nanso na hwee nkita ne nsam. Na wanka nea ɔyɛe no ankyerɛ n’agya ne ne na.

⁷ Na osiim kɔe ne ɔbea no kɔkasae, na ɔsɔɔ Samson ani.

⁸ Na nna bi akyi no, ɔsan kɔe sɛ okohyia no, na ɔman kɔhwɛɛ gyata funu no, na hwɛ, nnowatɔw ne ɛwo adɔ gyata no yam.

⁹ Na ɔfaa bi kurae dii no akwanakwan, na okoduu n’agya ne ne na nkyɛn, na ɔmaa wɔn bi dii; nanso wanka ankyerɛ wɔn sɛ gyata no yam na oyii ɛwo no.

¹⁰ Na n’agya siim kɔɔ ɔbea no nkyɛn, na Samson tow pon wɔ hɔ, efisɛ saa na mmerante taa yɛ.

¹¹ Na wohuu no no, wɔde nnamfonom aduasa bɛkaa no ho.

¹² Na Samson ka kyerɛɛ wɔn sɛ: Merebɛto mo aborɔme bi. Sɛ mutumi kyerɛ me ase nnansɔn apontow yi mu na muhu a, ɛnne mɛma mo nkamisaa aduasa ne ntade nsakraho aduasa;

¹³ na sɛ moantumi ankyerɛ me a, mo nso momma me nkamisaa aduasa ne ntade nsakraho aduasa. Na wɔka kyerɛɛ no sɛ: To wo aborɔme no na yentie.

¹⁴ Na ɔka kyerɛɛ wɔn sɛ: Odidifo mu na aduan fi bae, na ɔhoɔdenfo mu na adɔkɔdɔkɔde fi bae. Na wɔantumi ankyerɛ aborɔme no ase nnansa.

¹⁵ Na da a ɛto so ason no, wɔka kyerɛɛ Samson yere no sɛ: Daadaa wo kunu na ɔnkyerɛ yɛn aborɔme no ase, na yɛamfa ogya anhyew wo ne w’agya fi! So yɛn fow nti na mubehyiaa yɛn?

¹⁶ Na Samson yere no su guu no so kae sɛ: Ɔtan nko na wotan me na wonnɔ me. Woato me nkurɔfo aborɔme, nso wonkyerɛɛ me ase. Na ɔka kyerɛɛ no sɛ: Hwɛ, m’agya ne me na po menkyerɛɛ wɔn, na wo na menkyerɛ wo anaa?

¹⁷ Na osu guu no so nnansɔn a apontow no gu so no nyinaa. Na da a ɛto so ason no, ɔka kyerɛɛ no, efisɛ na ɔhaw no. Na ɔkɔka kyerɛɛ ne nkurɔfo no.

¹⁸ Na kurow no mu mmarima ka kyerɛɛ no da a ɛto so ason no ansa na owia retɔ sɛ: Dɛn na ɛyɛ dɔkɔdɔkɔ sen ɛwo, na ɛdɛn na ne ho yɛ den sen gyata? Na ɔka kyerɛɛ wɔn sɛ: Moamfa me nantwi amfɛtɛw a, anka moanhu m’aborɔme no ase.

¹⁹ Na AWURADE honhom sii no so denneennen, na osiim kɔɔ Askelon kokunkum wɔn mu mmarima aduasa, na ɔfaa wɔn ahode, na ɔde ntade nsakraho no momaa wɔn a wɔkyerɛɛ aborɔme no ase no. Na ne bo fuwii. Na ɔsan kɔɔ n’agya fi.

²⁰ Na wɔde Samson yere no maa ne yɔnko a odii akyi wɔ aware no mu no.