Amos 7 - KYERƐW KRONKRON

Atemmu ho anisoadehu horow abiɛsa no

¹ Eyi na AWURADE Nyankopɔn ma mihui, na hwɛ, ɔrenwene mmoadabi, ɛbere a adom wura fii ase fifii, na hwɛ, ɛyɛ ɔhene wuratwa akyi adom wura.

² Na wobedii asase so ahaban wiei no, mekae sɛ: O AWURADE Nyankopɔn, fa firi ɛ! Yakob begyina dɛn, sɛ osua yi?

³ AWURADE sakraa n’adwene eyi ho: Ɛrenyɛ hɔ! AWURADE na ose.

⁴ Eyi na AWURADE Nyankopɔn ma mihui, na hwɛ, AWURADE Nyankopɔn refrɛ ogya abɛtwe aso, na ɛbɛhyew obun haharaa no, na ɛrehyew asase no bi.

⁵ Na mise: O AWURADE Nyankopɔn, gyae ɛ! Mesrɛ wo Yakob begyina dɛn sɛ osua yi?

⁶ AWURADE sakraa n’adwene eyi ho; eyi nso renyɛ hɔ! AWURADE Nyankopɔn na ose.

⁷ Sɛɛ na ɔma mihui, na hwɛ, Awurade Nyankopɔn gyina ɔfasu kyerebenn so na kyerebennyɛ hama kura.

⁸ Na AWURADE ka kyerɛɛ me sɛ: Amos, dɛn na wuhu yi? Na mise: Kyerebennyɛ hama. Na Awurade Nyankopɔn se: Hwɛ, mede kyerebennyɛ hama misi me man Israel mfinimfini, merenkɔ so mintwa wɔn ho bio.

⁹ Na Isak sorɔnsorɔmmea no bɛdannan afoafo, na Israel kronkrommea no ayɛ agowagow, na mede afoa mɛsɔre mahyɛ Yeroboam fi.

Wɔpam Amos fi Betel

¹⁰ Ɛnna Betel sɔfo Amasia soma kɔɔ Israel hene Yeroboam nkyɛn sɛ: Amos apam wo tiri so, Israel fi mfinimfini, ne nsɛm no nyinaa rensen asase yi so.

¹¹ Na sɛ Amos se ni: Afoa ano na Yeroboam bewu, na Israel betu afi n’asase so akɔ.

¹² Na Amasia ka kyerɛɛ Amos sɛ: Ɔdehufo, kɔ! Bɔ wo ho aguaa kɔ Yuda asase so, na kodidi hɔ na hyɛ nkɔm wɔ hɔ.

¹³ Na nkɔ so nhyɛ nkɔm Betel bio, efisɛ ɛyɛ ɔhene kronkronbea, na ɛyɛ ahenni fi nso.

¹⁴ Ɛnna Amos buaa Amasia sɛ: Ɛnyɛ odiyifo ne me na ɛnyɛ odiyifo ba ne me; na meyɛ mmoahwɛfo ne ɔdoma so hwɛfo;

¹⁵ na AWURADE faa me fii nguan akyidi, na AWURADE ka kyerɛɛ me sɛ: Kɔ na kɔhyɛ nkɔm kyerɛ me man Israel.

¹⁶ Na afei tie AWURADE asɛm: Wo de, woka sɛ: Nhyɛ nkɔm ntia Israel, na nsosɔ ngu Isak fi so.

¹⁷ Enti sɛ AWURADE se ni: Wo yere bɛdan aguaman kurow no mu, na wo mmabanin ne wo mmabea bɛtotɔ afoa ano, na w’asase no, wɔde hama bɛkyɛ mu, na wo de, wubewu asase a ɛso akum so, na Israel betu afi n’asase so akɔ.