5 Mose 3 - KYERƐW KRONKRON

Wodi Og so

¹ Ɛnna yɛdan yɛn ani foro kɔɔ Basan kwan so; na Basan hene Og fi behyiaa yɛn, ɔno ne ne man nyinaa ne yɛn bɛkoe wɔ Edrei.

² Na AWURADE ka kyerɛɛ me sɛ: Nsuro no, na mede ɔne ne man nyinaa ne n’asase mahyɛ wo nsa, sɛ yɛ no sɛnea woyɛɛ Amorifo hene Sihon a ɔtenaa Hesbon no.

³ Na AWURADE yɛn Nyankopɔn de Basan hene Og nso ne ne man nyinaa hyɛɛ yɛn nsa, na yekum no kosii sɛ oguanfo biara anka amma no.

⁴ Na yɛfaa ne nkurow nyinaa bere no mu; kurow biara nni hɔ a yɛannye wɔn nsam; nkurow aduosia, Argob asase nyinaa, Og ahenni a ɛwɔ Basan.

⁵ Nkurow yi nyinaa, ɛho wɔ afasu atenten ne aponkɛse ne adaban ma ɛyɛ den, ɛsono asase pataa so nkurow a ɛdɔɔso bebree.

⁶ Na yɛsɛee wɔn pasaa sɛnea yɛyɛɛ Hesbonhene Sihon no, yɛsɛee nkurow no ne mu mmarima, mmea ne mmofra nyinaa pasaa.

⁷ Na afieboa nyinaa ne nkurow no mu asade de, yɛfom fae.

⁸ Na yegyee asase no fii Amorifo ahemfo baanu a wɔwɔ Yordan agya no nsam saa bere no, efi Arnon subon so kosi Hermon bepɔw ho,

⁹ Sidonfo frɛ Hermon sɛ Sirion, na Amorifo frɛ no Senir,

¹⁰ asasetaw so nkurow nyinaa ne Gilead nyinaa ne Basan nyinaa kodu Salka ne Edrei, Basan hene Og ahenni no nkurow.

¹¹ (Na Basan hene Og nko na aka, abran akɛse nkae no mu. Hwɛ, ne mpa a ɛyɛ dade mpa, ensi Amon mma Raba anaa? Ne tenten basafa anan ne fa, na ne tɛtrɛtɛ basafa abien, sɛ onipa basafa te).

Nsase no mu kyekyɛ

¹² Na yɛfaa asase yi saa bere no; efi Aroer a ɛda Arnon subon so, ne Gilead bepɔw fa ne ne nkurow na mede memaa Rubenfo ne Gadfo,

¹³ na Gilead nkae ne Basan nyinaa, Og man a ɛyɛ Argob asase nyinaa, mede maa Manase abusuakuw fa. Saa Basan no nyinaa na wɔfrɛ no abran akɛse asase.

¹⁴ Manase ba Yair faa Argob asase no nyinaa a ɛne Basan, kosii Gesurfo ne Maakatfo hye so, na ɔde ne din too asase no frɛɛ no Hawot-yair de besi nnɛ da yi.

¹⁵ Na mede Gilead maa Makir.

¹⁶ Na Rubenfo ne Gadfo no, memaa wɔn Gilead fa bi, ekodu Arnon subon ho a subon no mfinimfini ne ɔhye, de kɔpem Yabok subon no, Amon mma hye so,

¹⁷ ne Araba tataw so ne Yordan ne ɛho asase, efi Kineret kosi Araba tataw so po a ɛne Nkyene-Po no ano wɔ Pisga bepɔw ase apuei fam.

¹⁸ Na mehyɛɛ mo saa bere no sɛ: AWURADE mo Nyankopɔn de asase yi ama mo sɛ munni so, mo akofofo nyinaa mmia ntwam nni mo nuanom Israelfo anim;

¹⁹ mo yerenom ne mo mma ne mo mmoa de, minim sɛ mowɔ mmoa pii, wɔntena mo nkurow a mede mama mo no mu,

²⁰ nkosi sɛ AWURADE bɛma mo nuanom ahome sɛ mo, na wɔn nso wɔadi asase a AWURADE mo Nyankopɔn de rema wɔn Yordan agya no so, ansa na moasan aba mo agyapade a mede mama mo no so.

²¹ Na Yosua nso, mehyɛɛ no saa bere no sɛ: W’aniwa ahu nea AWURADE mo Nyankopɔn de yɛɛ ahene baanu yi nyinaa: Saa ara nso na AWURADE bɛyɛ ahenni a woretwam akɔ hɔ nyinaa;

²² munnsuro wɔn, efisɛ AWURADE mo Nyankopɔn na ɔbɛko ama mo.

Mose mpaebɔ

²³ Na mesrɛɛ AWURADE saa bere no sɛ:

²⁴ AWURADE, wo na woafi ase de wo kɛseyɛ ne wo nsa a ɛyɛ den no akyerɛ w’akoa, na onyame bɛn na ɔwɔ ɔsoro anaa asase so a obetumi ayɛ wo nnwuma ne wo mmaninne yi bi?

²⁵ Mesrɛ wo, ma mintwa menkɔhwɛ asase pa a ɛwɔ Yordan agya no, bepɔw asase fɛfɛ no ne Lebanon.

²⁶ Nanso mo nti AWURADE bo fuw me, na wantie me; na AWURADE ka kyerɛɛ me sɛ: Ɛdɔɔ wo so, nkɔ so ne me nkasa asɛm yi ho bio.

²⁷ Foro kɔ Pisga so, na ma w’ani so hwɛ atɔe ne benkum fam ne nifa ne apuei, na fa w’ani hwɛ, na Yordan yi de, worentwa.

²⁸ Na fa adwuma yi hyɛ Yosua nsa, na hyɛ no den na hyɛ no baninha, efisɛ ɔno na ɔbɛkyɛ asase a wubehu no mu ama wɔn.

²⁹ Na yɛtenaa obon no mu, Bet-peor ntentenso.