5 Mose 11 - KYERƐW KRONKRON

Osetie ho kɔkɔbɔ

¹ Enti dɔ AWURADE wo Nyankopɔn, na hwɛ n’ahwɛde ne n’ahyɛde ne n’atemmude ne ne mmara nsɛm nna nyinaa.

² Na munhu nnɛ, na menne mo mma a wonnim na wɔanhu no, munhu AWURADE mo Nyankopɔn nteɛso, ne kɛseyɛ, ne nsa a ɛyɛ den ne ne basa a wateɛ mu,

³ ne ne nsɛnkyerɛnne ne ne nneyɛe a ɔyɛe Misraim a ɔde yɛɛ Misraim hene Farao ne n’asase nyinaa,

⁴ ne nea ɔyɛɛ Misraim dɔm ne n’apɔnkɔ ne ne nteaseɛnam a wɔde retiw mo a ɔmaa Mmɛw-Po mu nsu bu faa wɔn so, na AWURADE sɛee wɔn, de abedu nnɛ da yi,

⁵ ne nea ɔyɛɛ mo sare so besii sɛ muduu ha yi,

⁶ ne nea ɔyɛɛ Ruben ba Eliab mma Datan ne Abiram a asase buee n’anom menee wɔn ne wɔn afi ne wɔn ntamadan ne wɔn a wodii wɔn akyi nyinaa fii Israel nyinaa mfinimfini no;

⁷ na mo ani ahu AWURADE nneyɛe akɛse a ɔyɛe no nyinaa.

⁸ Enti munni mmara nsɛm a merehyɛ mo nnɛ yi nyinaa so, na mo ho ayɛ den, na moakɔ akɔfa asase a moretwam akɔ so akɔfa no,

⁹ na mo nna aware asase a AWURADE kaa mo agyanom ntam sɛ ɔde bɛma wɔn ne wɔn asefo no so, asase a ɛsen nufusu ne ɛwo no.

¹⁰ Na asase a worekɔ akɔfa no nte sɛ Misraim asase a mufi so bae a wuguu w’aba na wode wo nan guguu so nsu sɛ ɛfan turo mu no;

¹¹ na asase a moretwam akɔ so akɔfa no yɛ mmepɔw ne abon asase a ɛnom ɔsoro su mu nsu,

¹² asase a AWURADE wo Nyankopɔn hwɛ so daa yi, AWURADE wo Nyankopɔn ani wɔ so fi afe mfiase kosi afe awiei.

¹³ Na sɛ mutie me mmara nsɛm a mede merema mo nnɛ yi, na mode mo koma nyinaa bɛdɔ AWURADE mo Nyankopɔn na moasom no a,

¹⁴ ɛnne mɛma mo asase so su atɔ ne bere mu, asusow ne adom, na woaboaboa w’aburow ne wo nsa ne wo ngo ano,

¹⁵ na mɛma wo sare so aba wura ama w’afieboa, na woadidi amee.

¹⁶ Monhwɛ mo ho yiye na wɔannaadaa mo koma, na moamman ankɔsom anyame foforo ansɔre wɔn,

¹⁷ na AWURADE abufuw annɛw anhyɛ mo, na wanto ɔsoro mu sɛ osu nntɔ na asase mmma ne nnɔbae, na moansɛe ntɛmso amfi asase pa a AWURADE de rema mo no so.

¹⁸ Enti momfa me nsɛm yi nsie mo koma ne mo kra mu, na fa yɛ nsɛnkyerɛnne kyekyere wo nsa, na ɛnyɛ w’aniwa ntam nkae ntamabamma;

¹⁹ na momfa nkyerɛkyerɛ mo mma, na kasa ho w’afitena mu ne wo kwan so nantew mu, ne wo nna mu ne wo sɔre mu;

²⁰ na kyerɛw gu wo fi apongua ho ne w’aponkɛse so;

²¹ na wo nna ne wo mma nna adɔɔso asase a AWURADE kaa w’agyanom ntam sɛ ɔde bɛma wɔn no so, sɛ ɔsoro a ɛkata asase so yi nna te.

²² Na sɛ mubedi mmara nsɛm a merehyɛ mo yi so ayɛ, na mobɛdɔ AWURADE mo Nyankopɔn anantew n’akwan nyinaa so na moabata ne ho a,

²³ ɛnne AWURADE betutu amanaman yi nyinaa afi mo anim, na moafa amanaman akɛse a wɔyɛ den sen mo.

²⁴ Baabiara a mo nan betia no bɛyɛ mo de, efi sare so ne Lebanon, efi asu no, asubɔnten Eufrate, ho kosi akyiri po no ano bɛyɛ mo asase.

²⁵ Obiara rentumi nnyina mo anim; AWURADE mo Nyankopɔn de mo ho hu ne mo ho suro begu asase a mobɛfa so nyinaa so, sɛnea ɔka kyerɛɛ mo no.

Nhyira ne nnome

²⁶ Hwɛ, mede nhyira ne nnome meregu mo anim nnɛ:

²⁷ Sɛ mutie AWURADE mo Nyankopɔn mmara nsɛm a merehyɛ mo nnɛ yi a, mubenya nhyira

²⁸ na sɛ moantie AWURADE mo Nyankopɔn mmara nsɛm na moman fi ɔkwan a merehyɛ mo nnɛ yi so kodi anyame foforo a munnim wɔn akyi a, nnome.

²⁹ Na sɛ AWURADE wo Nyankopɔn de wo du asase a worekɔ so akɔfa no so a, ka nhyira no Gerisim bepɔw so ne nnome no nso Ebal bepɔw so.

³⁰ So enni Yordan agya, owiatɔe kwan no akyi, Kanaanfo a wɔte Araba asase so, Gilgal ntentenso, More pɔw ho?

³¹ Na morebetwa Yordan akɔ akɔfa asase a AWURADE mo Nyankopɔn de rema mo no, na mobɛfa atena so.

³² Enti monhwɛ yiye na monyɛ ahyɛde ne atemmude a mede meresi mo anim nnɛ yi nyinaa.