4 Mose 30 - KYERƐW KRONKRON

Bɔhyɛ ho mmara

¹ Na Mose kasa kyerɛɛ Israelfo mmusuakuw no so atitiriw sɛ: Eyi ne asɛm a AWURADE ahyɛ

² Sɛ obi hyɛ AWURADE bɔ anaasɛ ɔka ntam tua ne kra ade bi a, ommmu n'asɛm so; nea efi n'anom nyinaa, ɔnyɛ.

³ Na sɛ ɔbea bi hyɛ AWURADE bɔ de tua ne ho biribi n'agya fi, wɔ ne mmabaabere mu,

⁴ na n'agya te ne bɔhyɛ no ne n'ahotua a ɔde tua ne kra biribi no, na n'agya yɛ komm a, ɛnne ne bɔhyɛ ne n'ahotua a ɔde tuaa ne kra biribi no gyina hɔ.

⁵ Na sɛ da a n'agya bɛte no wampene a, ɛnne ne bɔhyɛ nyinaa ne n'ahotua a ɔde tuaa ne kra biribi no rennyina hɔ; na AWURADE de bɛkyɛ no, efisɛ n'agya ampene.

⁶ Na sɛ ɔyɛ ɔbarima yere, na ne bɔhyɛ anaa nea afi n'anom a ɔde atua ne kra biribi no da no so,

⁷ na ne kunu te, na da a ɔte no ɔyɛ komm a, ɛnne ne bɔhyɛ no gyina hɔ, na otua a ɔde atua ne kra biribi no gyina hɔ.

⁸ Na sɛ da a ne kunu te no, wampene a, na wasan ne bɔhyɛ a ɛda no so ne nea efii n'anom a ɔde tuaa ne kra biribi no, na AWURADE de bɛkyɛ no.

⁹ Na ɔbea kunafo anaa nea wɔako no bɔhyɛ de, ade biara a otua ne kra no da no so.

¹⁰ Na sɛ ne kunu fi na ɔhyɛ bɔ anaasɛ ɔde ntam tua ne kra biribi,

¹¹ na ne kunu te, na ɔyɛ komm, na wammara no a, ne bɔhyɛ no nyinaa gyina hɔ, na ade biara a watua ne kra no gyina hɔ.

¹² Nanso sɛ ne kunu san no da a ɔtee no a, ɛnne ade biara a afi n'anom a ɔde hyɛɛ bɔ anaasɛ ɔde tuaa ne kra biribi no rennyina hɔ; ne kunu asan, na AWURADE de bɛkyɛ no.

¹³ Bɔhyɛ nyinaa ne ahotua ntam a wɔde brɛ ɔkra ase nyinaa, ne kunu na ɔmma ennyina hɔ na ne kunu na ɔnsan;

¹⁴ na sɛ ne kunu no nka ho hwee daa a, wahyɛ ne bɔhyɛ no nyinaa anaa n'ahotua no nyinaa mu den, efisɛ da a ɔtee no, wanka ho hwee;

¹⁵ na sɛ ɔtee no akyi ansa na ɔresan a, ɛnne ɔnsoa ne yere amumɔyɛ.

¹⁶ Eyinom ne ahyɛde a AWURADE hyɛɛ Mose sɛ ɛnna ɔbarima ne ne yere ntam, ɛne agya ne ne babea a ɔwɔ ne mmabaabere mu, n'agya fi ntam.