4 Mose 3 - KYERƐW KRONKRON

Lewifo dodow ne wɔn asɛde

¹ Na eyinom ne Aaron ne Mose mmusua, da a AWURADE ne Mose kasae, Sinai bepɔw so no.

² Na eyinom ne Aaron mma din: Nadab a ɔyɛ abakan, ne Abihu, Eleasar ne Itamar.

³ Eyinom ne Aaron mma, asɔfo a wɔsraa wɔn ngo a wɔde hyɛɛ wɔn nsa sɛ wonni asɔfo no din.

⁴ Na Nadab ne Abihu wuwui, AWURADE anim, sɛ wɔde ananagya bi kɔɔ AWURADE anim, Sinai sare so no, na wɔannya mma; na Eleasar ne Itamar dii asɔfo wɔn agya Aaron anim.

⁵ Na AWURADE kasa kyerɛɛ Mose sɛ:

⁶ Fa Lewi abusuakuw no bra, na fa wɔn begyina ɔsɔfo Aaron anim, na wɔnsom no,

⁷ na wɔnyɛ ɔno ne asafo no nyinaa adwuma mma wɔn, ahyiae ntamadan no anim, tenabea no ho som mu,

⁸ na wɔnhwɛ ahyiae ntamadan no mu nneɛma nyinaa so, nyɛ Israelfo nnwuma mma wɔn, tenabea no ho som mu.

⁹ Na fa Lewifo no ma Aaron ne ne mma no, wɔde wɔn ama no koraa afi Israelfo mu.

¹⁰ Na Aaron ne ne mma no de, yi wɔn si hɔ na wonkura wɔn asɔfodi no mu; na ɔhɔho biara a otwiw bɛn ho no, wonkum no.

¹¹ Na AWURADE kasa kyerɛɛ Mose sɛ:

¹² Na me de, hwɛ, mafa Lewifo no mafi Israelfo mu masi Israelfo mu mmakan a wobue ɔyafunu ano no nyinaa ananmu, enti Lewifo no ayɛ me dea.

¹³ Na mmakan nyinaa yɛ me dea; da a mebobɔɔ Misraim asase so mmakan nyinaa no, meyɛɛ Israel mu mmakan nyinaa kronkron mefae, efi onipa so kosi afieboa so; wɔyɛ me dea: Mene AWURADE.

¹⁴ Na AWURADE kasa kyerɛɛ Mose, Sinai sare so sɛ:

¹⁵ Kan Lewi mma no sɛnea wɔn mpanyimfi ne wɔn mmusua te, mmarima a wɔadi ɔsram ne akyiri nyinaa, kan wɔn.

¹⁶ Na Mose nam AWURADE asɛm no so kan wɔn sɛnea ɔhyɛɛ no no.

¹⁷ Na eyinom ne Lewi mma sɛ wɔn din te: Gerson, Kohat ne Merari.

¹⁸ Na eyinom ne Gerson mma din, sɛ wɔn mmusuakuw te: Libni ne Simei.

¹⁹ Na Kohat mma sɛ wɔn mmusua te ne: Amram ne Ishar, Hebron ne Usiel.

²⁰ Na Merari mma sɛ wɔn mmusua te ne: Mahli ne Musi. Eyinom ne Lewi mmusua no sɛ wɔn mpanyimfi te.

²¹ Gerson de ne Libni abusua ne Simei abusua; eyinom ne Gersonfo mmusua no.

²² Wɔn mu wɔn a wɔkan wɔn no, mmarima a wɔadi ɔsram ne akyiri nyinaa, wɔn a wɔkan wɔn no si mpem nsɔn ne ahannum.

²³ Na Gersonfo mmusua yi, tenabea no akyi na wɔbɔɔ nsra wɔ atɔe fam.

²⁴ Na Gersonfo agya fi bapɔmma ne Lael ba Eliasaf.

²⁵ Na nea Gerson mma no nhwɛso wɔ, ahyiae ntamadan no, ne tenabea no ne ntamadan no, ne nkataso ne ahyiae ntamadan no ano nkataano no,

²⁶ ne adiwo no ho mmɔhɔɔ no ne adiwo a etwa tenabea no ne afɔremuka no ho hyia no ano nkataano ne ne ntampehama, ntamadan no ho adwuma nyinaa.

²⁷ Na Kohat de ne Amramfo abusua, Iseharfo abusua, Hebronfo abusua ne Usielfo abusua; eyinom ne Kohatfo mmusua no.

²⁸ Mmarima a wɔadi ɔsram ne akyiri no nyinaa dodow si mpemnwɔtwe ne ahansia wɔn na wɔyɛ kronkronbea so ahwɛfo no.

²⁹ Kohat mma no mmusua mmɔ nsra tenabea no nkyɛn, anafo fam.

³⁰ Na Kohatfo mmusua no agya fi bapɔmma ne Usiel ba Elisafan.

³¹ Na nea wɔnhwɛ ne adaka no ɔpon no, kaneadua no afɔremuka no ne kronkronbea hɔ nneɛma a wɔde som no nyinaa ne mmɔhɔɔ no ne ɛho adwuma nyinaa.

³² Na Lewi mmapɔmma mu panyin ne ɔsɔfo Aaron ba Eleasar, ɔne wɔn a wɔhwɛ kronkronbea no so no mu panyin.

³³ Merari de ne Mahli abusua ne Musi abusua; eyinom ne Merari mmusua no.

³⁴ Na wɔn a wɔkan wɔn no, mmarima a wɔadi ɔsram ne akyiri no nyinaa dodow si mpemnsia ne ahanu.

³⁵ Na Merari mmusua no agya fi bapɔmma ne Abihail ba Suriel. Tenabea no nkyɛn na wɔmmɔ wɔn nsra atifi fam.

³⁶ Na Merari mma hwɛ adwuma ne tenabea no ntaaboo ne ne mmeae ne n'adum ne ne nnyinaso ne ɛho nneɛma nyinaa ne ɛho adwuma nyinaa,

³⁷ ne adiwo no ho adum a ehyia ho no ne ne nnyinaso ne ɛho mmofunnua ne ɛho ntampehama so.

³⁸ Na wɔn a wɔmmɔ nsra, ahyiae ntamadan no anim, apuei no, ne Mose ne Aaron ne ne mmammarima a wɔhwɛ kronkronbea no so ma Israelfo no; na ɔhɔho a otwiw bɛn no, wonkum no.

³⁹ Lewifo a wɔkan wɔn a Mose ne Aaron nam AWURADE asɛm so kan wɔn sɛ wɔn mmusua te no, mmarima a wɔadi ɔsram ne akyiri no nyinaa si ɔpeduonu abien.

Lewifo gye mmakan

⁴⁰ Na AWURADE ka kyerɛɛ Mose sɛ Kan Israelfo mu mmakan mmarima a wɔadi ɔsram ne akyiri nyinaa, na bu wɔn din dodow ano;

⁴¹ na fa Lewifo ma me, mene AWURADE fa si Israelfo mu mmakan nyinaa ananmu, ne Lewifo afieboa, si Israelfo afieboa mmakan nyinaa ananmu.

⁴² Na Mose kanee Israelfo mu mmakan nyinaa sɛnea AWURADE hyɛɛ no no.

⁴³ Na mmakan mmarima a wɔadi ɔsram ne akyiri no nyinaa din dodow, sɛ wɔn a wɔkan wɔn no te no ano si ɔpeduonu abien ne ahanu aduɔsɔn abiɛsa.

⁴⁴ Na AWURADE kasa kyerɛɛ Mose sɛ:

⁴⁵ Fa Lewifo si Israelfo mu mmakan nyinaa ananmu ne Lewifo afieboa si wɔn afieboa ananmu, na Lewifo nyɛ me dea: Mene AWURADE.

⁴⁶ Na Israelfo mmakan mu nnipa ahanu aduɔsɔn abiɛsa a wɔboro Lewifo so no agyede de,

⁴⁷ gye obiara nnwetɛbona anum, sɛnea kronkronbea dwetɛbona te na gye, gera aduonu nyɛ dwetɛbona biako;

⁴⁸ na fa dwetɛ a ɛyɛ wɔn a wɔboro wɔn so no agyede no ma Aaron ne ne mma.

⁴⁹ Na Mose gyigyee dwetɛ no wɔn a wɔboro wɔn a Lewifo gyee wɔn no so hɔ.

⁵⁰ Israelfo mmakan hɔ na ogyigyee dwetɛ no, apem ahasa aduosia anum, sɛnea kronkronbea dwetɛbona te.

⁵¹ Na Mose nam AWURADE asɛm so de wɔn a wɔagye wɔn no ti dwetɛ no maa Aaron ne ne mma, sɛnea AWURADE hyɛɛ Mose no.