4 Mose 19 - KYERƐW KRONKRON

Nantwibere kɔkɔɔ no ho afahyɛ

¹ Na AWURADE kasa kyerɛɛ Mose ne Aaron sɛ:

² Eyi ne mmara mu ahyɛde a AWURADE ahyɛ sɛ: Kasa kyerɛ Israelfo sɛ wɔmfa nantwibere kɔkɔɔ a odi mu a onni dɛm a kɔndua nkɔɔ no so pɛn mmrɛ wo;

³ na momfa no mma ɔsɔfo Eleasar, na ɔmfa no mfi nkɔ nsra no akyi, na wonkum no n'anim.

⁴ Na ɔsɔfo Eleasar mfa ne nsatea nka ne mogya no bi, na ɔmpete ne mogya no bi ngu ahyiae ntamadan no anim fam mpɛn asɔn.

⁵ Na wɔnhyew nantwibere no wɔ n'anim, ne ne nhoma ne nam, ne mogya, ne ne n'agyanan no nyinaa no wɔnhyew.

⁶ Na ɔsɔfo no mfa kyeneduru ne adwerɛ ne kuntu mfuturu kɔkɔɔ ngu nantwibere a ɔrehyew no so.

⁷ Na ɔsɔfo no nhoro ne ntade na ɔmfa nsu nguare, na ɛno akyi ansa na ɔmmra nsra no mu; na ɔsɔfo no ho ntew kosi anwummere.

⁸ Na nea ɔhyewee no nhoro ne ntade nsu mu, na ɔmfa nsu nguare, na ne ho ntew kosi anwummere.

⁹ Na ɔbarima bi a ne ho tew nsesaw nantwibere no nso no mfa nkogu nsra no akyi baabi a ɛhɔ tew, na ɛnyɛ Israelfo asafo no ahodwira nsu nsie; ɛyɛ bɔne ho afɔre.

¹⁰ Na nea ɔsesaw nantwibere no nso no nhoro ne ntade, na ne ho ntew kosi anwummere. Na ɛnyɛ daa ahyɛde mma Israelfo ne ɔhɔho a ɔsoɛ wɔn mu.

¹¹ Nea ɔka onipa biara funu no, ne ho ntew nnansɔn;

¹² ɔno na ɔmfa eyi nnwira ne ho mfi ne bɔne mu da a ɛto so abiɛsa ne da a ɛto so ason no, na ne ho atew; na sɛ wannwira ne ho da a ɛto so abiɛsa ne da a ɛto so ason no a, ne ho rentew.

¹³ Obiara a ɔka owufo, onipa bi a wawu funu, na wannwira ne ho no agu AWURADE tenabea ho fi, na wontwa saa ɔkra no mfi Israel mu nkyene, efisɛ wɔampete ahodwira nsu a wampete angu no so nti, ne ho ntew, ne ho fi da so wɔ ne ho.

¹⁴ Eyi ne mmara a ɛwɔ hɔ ma bere a obi awu wɔ ntamadan mu: Sɛ onipa wu ntamadan mu a, obiara a ɔba ntamadan no mu ne ade biara a ɛwɔ ntamadan no mu ho ntew nnansɔn;

¹⁵ na ade biara a ano da hɔ na enni mmuaso a wɔde abua so no, ɛho ntew.

¹⁶ Na obiara a ɔka nea watɔ nkrante ano anaa funu bi anaa onipa nnompe anaa ɔda bi wuram no, ne ho ntew nnansɔn.

¹⁷ Na nea ne ho ntew no, wɔmfa bɔne ho afɔre a wɔahyew no nso no bi mma no, na wɔmfa mmasu ngu so ade bi mu;

¹⁸ na ɔbarima bi a ne ho tew mfa adwerɛ mmɔ nsu no mu, na ɔmpete ngu ntamadan no ne emu nneɛma nyinaa ne akra a wɔwɔ hɔ no ne nea waka dompe anaa ɔtɔfo anaa funu anaa ɔda bi no so.

¹⁹ Na nea ne ho tew no mpete ngu nea ne ho ntew no so, da a ɛto so abiɛsa ne da a ɛto so ason no, na onnwira ne ho da a ɛto so ason no, na ɔnhoro ne ntade, na ɔmfa nsu nguare, na ne ho atew anwummere.

²⁰ Na onipa a ne ho ntew na wannwira ne ho no, wobetwa saa ɔkra no afi ɔman asafo no mu, efisɛ wagu AWURADE kronkronbea no ho fi; wɔampete ahodwira nsu no angu no so, enti ne ho ntew.

²¹ Na eyi nyɛ wɔn daa ahyɛde. Na nea ɔpetee ahodwira nsu no nhoro ne ntade; na nea ɔka ahodwira nsu no ho ntew kosi anwummere;

²² na ade biara a nea ne ho ntew no ka no ho ntew, na obiara a ɔka no no ho ntew kosi anwummere.