3 Mose 24 - KYERƐW KRONKRON

Nkanea no ngo

¹ Na AWURADE kasa kyerɛɛ Mose sɛ:

² Hyɛ Israelfo no ma wɔmmrɛ wo ngodua aba a wɔasiw ngo kurunnyenn na wɔmfa nsɔ ɔkanea no, na ɔkanea no nsi so daa;

³ adanse ntwamu mmɔhɔɔ no akyi, ahyiae ntamadan no mu na Aaron nsiesie mfi anwummere nkosi anɔpa, AWURADE anim daa; ɛyɛ daa ahyɛde ma mo awo ntoatoaso nyinaa.

⁴ Sika amapa kaneadua a ɛho tew no so na onsiesie akanea no, AWURADE anim daa yi.

Kyerɛ abodoo

⁵ Na fa asikresam to tetare dumien; olonka abupɛn du mu abien nyɛ tetare biako.

⁶ Na fa sensɛm so akyerɛpɛn abien, asia nyɛ kyerɛpɛn biako, sika amapa ɔpon a ɛho tew no so, AWURADE anim.

⁷ Na fa ohuamfufu kurunnyenn toto akyerɛpɛn no so, na ɛnyɛ abodoo no so nkae ade, ogya afɔre a wɔsɔ ma AWURADE.

⁸ Daa homeda na onsiesie wɔ AWURADE anim daa yi, ɛyɛ Israelfo fam daa apam.

⁹ Na ɛnyɛ Aaron ne ne mma de, na wonni wɔ nea ɛhɔ yɛ kronkron, efisɛ ɛyɛ akronkronne mu ade kronkron a efi AWURADE gya afɔre so ma no, ɛyɛ daa kyɛfa.

Mmusu so asotwe

¹⁰ Na Israelni bea bi ba a n'agya yɛ Misraimni fii adi Israelfo no mu, na Israelni bea no ba no ne Israelni bi hamee nsra no mu.

¹¹ Na Israelni bea no ba no kaa din no ho abususɛm, na ɔdomee. Na wɔde no brɛɛ Mose; nso ne na din de Selomit, Dibri ba a ofi Dan abusuakuw mu;

¹² na wɔbɔɔ no dua mu sɛ enkosi sɛ obenya AWURADE anom asɛm aka akyerɛ wɔn.

¹³ Na AWURADE kasa kyerɛɛ Mose sɛ:

¹⁴ Fa nea wadome no fi adi kɔ nsra no akyi, na wɔn a wɔtee no nyinaa mfa wɔn nsa ngu n'atifi, na asafo no nyinaa nsiw no abo.

¹⁵ Na kasa kyerɛ Israelfo nso sɛ obiara a ɔbɛdome ne Nyankopɔn no, ɔbɛsoa ne bɔne.

¹⁶ Na nea ɔka AWURADE din ho abususɛm no, okum na wonkum no: osiw na asafo no nyinaa nsiw no abo; ɔhɔho oo, okuromani oo, sɛ ɔka din no ho abususɛm a, wonkum no.

¹⁷ Na sɛ obi kum onipa biara a, okum na wonkum no.

¹⁸ Na nea okum afieboa no, onsi ananmu, ɔkra nsi ɔkra ananmu.

¹⁹ Na nea opira ne yɔnko nipa no, sɛnea ɔyɛe no, wɔnyɛ no saa ara.

²⁰ Obu nsi obu ananmu, aniwa nsi aniwa ananmu, ɛse nsi ɛse ananmu; sɛnea opiraa onipa no, saa ara na wɔnyɛ no.

²¹ Na nea okum afieboa no, onsi ananmu, na nea okum onipa no, wonkum no.

²² Atemmu koro nna hɔ mma mo: ɔhɔho nyɛ sɛ okuromani; na mene AWURADE mo Nyankopɔn.

²³ Na Mose kasa kyerɛɛ Israelfo no, na wɔde nea ɔdomee no fii adi kɔɔ nsra no akyi kosiw no abo. Na Israelfo yɛɛ sɛnea AWURADE hyɛɛ Mose no.