3 Mose 15 - KYERƐW KRONKRON

Mmarima ahosen fi

¹ Na AURADE kasa kyerɛɛ Mose ne Aaron sɛ:

² Monkasa nkyerɛ Israelfo no nse wɔn sɛ, ɔbarima biara sɛ ne ho sen gu a, n'ahosen no nti ne ho ntew.

³ Na nea egu ne ho fi n'ahosen no mu ni: Sɛ n'ahosen fi ne honam anaasɛ n'ahosen ma ne honam ano siw a, ɛyɛ ne ho figu.

⁴ Nnae biara a nea ne ho sen no bɛda so no ho ntew, na ade biara a ɔbɛtena so no ho ntew.

⁵ Na nea ɔka ne nnae no nhoro ne ntade na ɔmfa nsu nguare, na ne ho ntew kosi anwummere;

⁶ na nea ɔtena ade a nea ne ho sen no tenaa so no, ɔnhoro ne ntade na ɔmfa nsu nguare, na ne ho ntew kosi anwummere.

⁷ Na nea ɔka nea ne ho sen no honam no, ɔnhoro ne ntade na ɔmfa nsu nguare na ne ho ntew kosi anwummere;

⁸ na sɛ nea ne ho sen no fe ntasu gu nea ne ho tew so a, ɔnhoro ne ntade na ɔmfa nsu nguare, na ne ho ntew kosi anwummere.

⁹ Na aboa so agua biara a ɔhosenfo no bɛtena so no ho ntew; na obiara a ɔka biribiara a ɛwɔ ɔhosenfo no ase no ho ntew kosi anwummere.

¹⁰ Na nea ɔsoa saa ade no nhoro ne ntade na ɔmfa nsu nguare, na ne ho ntew kosi anwummere.

¹¹ Na obiara a ɔhosenfo no amfa nsu anhohoro ne nsa na ɔbɛka no no, ɔnhoro ne ntade na ɔmfa nsu nguare, na ne ho ntew kosi anwummere.

¹² Na kuku a ɔhosenfo no bɛka no, wɔmmɔ, na dua ade biara de, wɔmfa nsu nhohoro ho.

¹³ Na sɛ ɔhosenfo no ho tew fi n'ahosen no mu a, ɔnkan nnansɔn ngu n'ahofi so, na ɔnhoro ne ntade, na ɔmfa mmasu nguare ne honam, na ne ho atew.

¹⁴ Na da a ɛto so awotwe no, ɔmfa nturukuku abien anaa mmorɔnoma mma abien mmra AWURADE anim, ahyiae ntamadan no ano, na ɔmfa mma ɔsɔfo no.

¹⁵ Na ɔsɔfo no mfa biako nyɛ bɔne ho afɔre, na biako no nso ɔmfa nyɛ ɔhyew afɔre, na ɔsɔfo no mpata mma no AWURADE anim mfi n'ahosen no mu.

¹⁶ Na sɛ ɔbarima bi ahoboa fi no mu a, ɔmfa nsu nguare ne honam nyinaa, na ne ho ntew kosi anwummere.

¹⁷ Na ntama biara anaa nhoma biara a ahoboa begu mu no, wɔmfa nsu nhoro, na ɛho ntew kosi anwummere.

¹⁸ Na sɛ ɔbarima ne ɔbea da na ahoboa gu no a, wɔmfa nsu nguare na wɔn ho ntew kosi anwummere.

Mmea ahosen fi

¹⁹ Na ɔbea sɛ, ne ho sen na mogya fi ne honam mu gu a, ɔntena n'asabu mu nnansɔn, na obiara a ɔka no no ho ntew kosi anwummere.

²⁰ Na ade biara a ɔda so n'asabu mu no ho ntew, na ade biara a ɔtena so no ho ntew.

²¹ Na obiara a ɔka ne nnae no, ɔnhoro ne ntade na ɔmfa nsu nguare, na ne ho ntew kosi anwummere;

²² na obiara a ɔka ade biara a watena so no, ɔnhoro ne ntade na ɔmfa nsu nguare na ne ho ntew kosi anwummere;

²³ na sɛ biribi wɔ nnae no so anaasɛ ade a watena so no so a, obi ka a, ne ho ntew kosi anwummere.

²⁴ Na sɛ ɔbarima ne no da, na n'asabu ade no bi ka ne ho a, ne ho ntew nnansɔn, na ne nnae a ɔda so no nyinaa ho ntew.

²⁵ Na ɔbea, sɛ ne ho sen mogya gu nna pii, na ɛnyɛ n'asabu bere, anaasɛ ne ho sen tra n'asabu nna no a, ɛnne n'ahosen a ɛho ntew nna no nyinaa ne ho ntew te sɛ n'asabu nna mu.

²⁶ Ne nnae a ɔda so biara n'ahosen nna nyinaa mu nyɛ no sɛ n'asabu nnae, na ade biara a ɔtena so no ho ntew sɛ n'asabu mu de no.

²⁷ Na obiara a ɔde ne nsa ka nneɛma no ho ntew, na ɔnhoro ne ntade na ɔmfa nsu nguare, ne ho ntew kosi anwummere.

²⁸ Na sɛ ne ho tew fi n'ahosen no mu a, ɔnkan nnansɔn mfa, na ɛno akyi no ne ho atew.

²⁹ Na da a ɛto so awotwe no, ɔmfa nturukuku abien anaa mmorɔnoma mma abien mmrɛ ɔsɔfo, ahyiae ntamadan no ano.

³⁰ Na ɔsɔfo no mfa biako mmɔ bɔne ho afɔre, na biako no ɔmfa mmɔ ɔhyew afɔre, na ɔsɔfo no mpata mma no, AWURADE anim, mfi n'ahosen a ɛho ntew no mu.

³¹ Na momma Israelfo no nyi wɔn ho mfi wɔn fi mu, na wɔanwuwu wɔn fi mu sɛ wɔrekogu me tenabea a ɛwɔ wɔn mu no ho fi.

³² Eyi ne mmara a ɛda hɔ ma nea ne ho sen ne nea ne ho nsu fi no mu gu ne ho fi,

³³ ne ɔbea a ne ho nyɛ no den n'asabu mu, ne nea ne ho sen, ɔbarima oo, ɔbea oo, ne ɔbarima a ɔne ɔbea a ne ho ntew bɛda.