3 Mose 11 - KYERƐW KRONKRON

Mmoa a wonni ne nea wonnni

¹ Na AWURADE kasa kyerɛɛ Mose ne Aaron see wɔn sɛ:

² Monkasa nkyerɛ Israelfo sɛ: Eyinom ne mmoa a munni wɔ asase so mmoa nyinaa mu:

³ Ntɔteboa mu wɔn a wɔwɔ tɔte a emu apae na wɔn tɔte mu apae koraa, na wopuw nea wɔadi wesaw no, ɛno na munni.

⁴ Eyinom nko na munnni, wɔn a wopuw wesaw anaa wɔn tɔte mu apae mu: yoma, efisɛ opuw wesaw de, nanso ne tɔte mu mpae, enti ne ho ntew mma mo;

⁵ ne atwaboa, efisɛ opuw wesaw de, nanso ne tɔte mu mpae, ne ho ntew mma mo;

⁶ ne adanko, efisɛ opuw wesaw de, nanso ne tɔte mu mpae, ne ho ntew mma mo;

⁷ ne prako efisɛ ne tɔte mu apae koraa de, nanso ompuw nwesaw, ne ho ntew mma mo.

⁸ Munnni wɔn nam, na monnka wɔn afunu; wɔn ho ntew mma mo.

⁹ Eyi ne nea munni nea ɛwɔ nsu mu nyinaa mu: Nea ɛwɔ ntɛtɛw ne abon, nsu mu, ɛpo ne nsuwansuwa mu, ɛnonom na munni.

¹⁰ Na biribiara a enni ntɛtɛw ne abon, ɛpo ne nsuwansuwa mu, ade a ɛwɔ nsu mu nyinaa nkwa wɔ mu; nyɛ akyide mma mo.

¹¹ Na ɛnyɛ mo akyide, munnni wɔn nam, na wɔn afunu nso, munkyi.

¹² Ade biara a enni ntɛtɛw ne abon nsu mu no yɛ mo akyide.

¹³ Na eyinom na munkyi ntuboa mu; munnni wɔyɛ akyide, ɔkɔre ne ɔkɔrebia ne asu so kɔre,

¹⁴ ne ɔkom ne asansa, sɛnea wɔn su te,

¹⁵ anene ahorow nyinaa,

¹⁶ sohori, patukɛse, ɛpo so asomfena ne akoroma, sɛnea wɔn su te,

¹⁷ ne patubiaa, ɛpo so anene, patukɛse,

¹⁸ bakanoma, pokupoku, opete,

¹⁹ asukɔnkɔn, asukɔnkɔn ahorow, asuakwaa ne ampan.

²⁰ Ntuboa nyinaa a wɔnantew nan anan anan so nyinaa nyɛ akyide mma mo.

²¹ Nanso eyinom na munni ntuboa a wɔnantew nan anan anan so nyinaa mu, wɔn a wɔwɔ aprɛw abien wɔ wɔn nan so a wɔde huruhuruw asase so no;

²² wɔn mu nea munni ni: Mmoadabi ahorow, abirinkran ahorow, atutuafuru ahorow, mmɛbɛw ahorow.

²³ Na ntuboa manyamanya a wɔwɔ nan anan anan nyinaa yɛ akyide ma mo.

²⁴ Na eyinom na mode begu mo ho fi; obiara a ɔka wɔn funu no ho ntew kosi anwummere.

²⁵ Na obiara a ɔsoa wɔn funu ho biribi no, ɔnhoro ne ntade, efisɛ ne ho ntew ara kosi anwummere.

²⁶ Ntɔteboa a wɔn tɔte mu apae, nanso emu nwie pae na wompuw nwesaw no nyinaa ho ntew mma mo; obiara a ɔka wɔn no, ne ho ntew.

²⁷ Na mmoa a wɔnam nan anan anan so nyinaa mu wɔn a wɔnam wɔn nsa ne wɔn nan mu no, wɔn ho ntew mma mo; obiara a ɔka wɔn funu no ho ntew kosi anwummere.

²⁸ Na nea ɔsoa wɔn funu bi no nhoro ne ntade, na ne ho ntew kosi anwummere; wɔn ho ntew mma no.

²⁹ Na mmoa a wɔwea asase so mu wɔn a wɔn ho ntew mma mo ni: Kɔkɔbo, akura, aketew ahorow,

³⁰ ɔdan-ne-na, ɔmampam, ɔketew, sare so ketew ne ɔbosomaketew.

³¹ Eyinom ne wɔn a wɔn ho ntew mma mo, mmoa a wɔwea nyinaa mu; sɛ wowu a, obiara a ɔka wɔn no ho ntew kosi anwummere.

³² Na ade biara a wɔn mu bi awu atɔ so no, ɛho ntew: dua ade biara oo, atade oo, nhoma oo, awere oo, ade biara a wɔde yɛ adwuma; wɔmfa nhyɛ nsu mu, na ɛho ntew kosi anwummere ansa na ɛho atew.

³³ Na kuku biara a wɔn mu bi bɛhwe mu no, nea ɛwɔ mu nyinaa ho ntew, na kuku no nso mommɔ no.

³⁴ Aduan a wodi biara a nsu no bi begu mu no ho ntew, na anonne biara a wɔnom wɔ ade biara a ɛte saa mu no ho ntew.

³⁵ Na ade biara a wɔn funu ho biribi bɛhwe so, ɛho ntew; fononoo oo, muka oo, wɔmmubu: ɛho ntew, na mummu no sɛ ɛho ntew.

³⁶ Nanso nsuaniwa anaa abura a nsu wom de, ɛho tew ara; na biribiara a ɛka wɔn funu na ɛho ntew.

³⁷ Na sɛ wɔn funu ho biribi hwe kuade a wodua biara so a, ɛho tew;

³⁸ na sɛ wɔde nsu gu kuade no so na wɔn funu ho biribi hwe so a, ɛho ntew mma mo.

³⁹ Na sɛ mmoa a mudi no bi wu a, nea ɔka ne funu no ho ntew kosi anwummere.

⁴⁰ Na nea odi ne funu no bi no nhoro ne ntade, na ne ho ntew kosi anwummere; na nea ɔsoa ne funu no nhoro ne ntade, na ne ho ntew kosi anwummere.

⁴¹ Na ade biara a ɛwea fam yɛ akyide, munnni.

⁴² Ade biara a ɛnam yafunu so ne ade biara a ɛnam nan anan so kosi ade biara a ɛwɔ nan bebree so, wɔn a wɔwea fam nyinaa mu no, munnni, efisɛ ɛyɛ akyide.

⁴³ Munnhura mo kra ho, mmoa a wɔwea no biara ho, na monnyɛ mo ho fi a ɛmma mo ho ntew wɔ wɔn ho.

⁴⁴ Na mene AWURADE mo Nyankopɔn, enti montew mo ho na monyɛ kronkron, efisɛ meyɛ kronkron; enti mommma mo kra ho nnkum ade biara a ɛwea a ɛtwe ne ho ase no ho.

⁴⁵ Na mene AWURADE a miyii mo Misraim asase so sɛ mɛyɛ mo Nyankopɔn no; enti monyɛ kronkron, efisɛ meyɛ kronkron.

⁴⁶ Eyi ne ntɔteboa ne ntuboa ne aboa biara a ɛwɔ nsu mu ne mmoa a wɔwea fam nyinaa ho mmara,

⁴⁷ sɛ wɔmfa mpae ade a ɛho ntew ne nea ɛho tew mu, ne mmoa a wodi ne mmoa a wonni mu.