2 Samuel 8 - KYERƐW KRONKRON

Dawid nkunimdi

¹ Na eyi akyi no, Dawid toaa Filistifo no na ɔbrɛɛ wɔn ase na Dawid gyee Meteg-amma ahenkurow no sodi fii Filistifo nsam.

² Na ɔkaa Moab nso gui na ɔma wɔdedaa fam, de susuhama susuw wɔn; na osusuw ahama abien sɛ wonkum wɔn, ne hama biako a edu pɛpɛɛpɛ sɛ wɔntena ase. Na Moab yɛɛ Dawid nkoa a wɔsoa ayɛyɛde ba.

³ Na Dawid kaa Soba hene Rehob ba Hadadeser gui, bere a ɔkɔe sɛ okogye ne nsaase a ɛwɔ asubɔnten Eufrate ho no mu.

⁴ Na Dawid kyeree wɔn mu apɔnkɔsotefo apem ahansɔn ne anammɔnmufo ɔpeduonu na Dawid twitwaa nteaseɛnam apɔnkɔ nyinaa nantin ntini na ogyaw wɔn mu nteaseɛnam ɔha de.

⁵ Na Damasko Siriafo bae sɛ wɔbɛboa Soba hene Hadadeser; na Dawid kum Siriafo no mu nnipa ɔpeduonu abien.

⁶ Ɛnna Dawid de bansifo kɔtenaa Damasko a ɛwɔ Aram, na Siriafo yɛɛ Dawid nkoa a wɔsoa ayɛyɛde ba. Na AWURADE boaa Dawid ma odii nim nea ɔkɔe nyinaa.

⁷ Na Dawid gyigyee sika akyɛm a Hadadeser nkoa kurae no de baa Yerusalem.

⁸ Na ɔhene Dawid faa kɔbere pii pa fii Hadadeser nkurow Beta ne Berotai mu.

⁹ Na Hamat hene Toi tee sɛ Dawid aka Hadadeser dɔm nyinaa agu no,

¹⁰ Toi somaa ne ba Yoram baa ɔhene Dawid nkyɛn bekyiaa no hyiraa no, sɛ ɔne Hadadeser ako na waka no agu, efisɛ Hadadeser ne Toi taa di dɔm; na Yoram de dwetɛ nnwinne ne sika nnwinne ne kɔbere nnwinne bae.

¹¹ Ɛno nso na ɔhene Dawid de yɛɛ akronkronne maa AWURADE, ɛne dwetɛ ne sika a efi amanaman a ɔbrɛɛ wɔn ase no nyinaa mu a ɔde yɛɛ akronkronne no:

¹² Efi Edom ne Moab ne Amonfo ne Filistifo ne Amalekfo ne Soba hene Rehob ba Hadadeser asade mu.

¹³ Na Dawid san fii Siriafo kum no, ogyee din Nkyene-bon mu sɛ okum Edomfo mpem dunwɔtwe.

¹⁴ Na ɔde bansifo tenaa Edom; Edom nyinaa mu na ɔde bansifo tenatenae na Edomfo nyinaa yɛɛ Dawid nkoa. Na AWURADE boaa Dawid ma odii nim nea ɔkɔe nyinaa.

¹⁵ Na Dawid dii Israel nyinaa so hene; na Dawid dii asɛntrenee buu atɛntrenee maa ne man nyinaa.

¹⁶ Na Seruia ba Yoab na odi dɔm so na Ahilud ba Yehosafat ne ɔsɛnkaefo;

¹⁷ na Ahitub ba Sadok ne Abiatar ba Ahimelek ne asɔfo, na Seraia ne ɔkyerɛwfo,

¹⁸ na Yoiada ba Benaia na odi Keretifo ne Peletifo no so, na Dawid mma ne asɔfo.