2 Mose 37 - KYERƐW KRONKRON

Apam adaka no yɛ

¹ Na Besalel de ɔkanto yɛɛ adaka no, ne tenten bɛyɛ basafa biako ne fa, na ne tɛtrɛtɛ bɛyɛ anammɔn abien ne fa, na ne sorokɔ bɛyɛ anammɔn abien ne fa.

² Na ɔde sika amapa duraa emu ne ɛho, na ɔyɛɛ sika hankare twaa ho hyiae.

³ Na oguu ɛho sika nkaa anan de tuatuaa ne nan anan ho, nkaa abien wɔ ɔfa ha, na nkaa abien wɔ ɔfa ha.

⁴ Na ɔde ɔkanto sinsen mpoma, na ɔde sika duraduraa ho.

⁵ Na ɔde mpoma no wurawuraa nkaa no mu, adaka no nkyɛn mu, na wɔde asoa adaka no.

⁶ Na ɔde sika amapa yɛɛ mpata agua no, ne tenten bɛyɛ basafa biako ne fa, na ne tɛtrɛtɛ anammɔn abien ne fa.

⁷ Na ɔde sika a wɔaboro yɛɛ kerubim abien ma efii mpata agua no ti abien no mu.

⁸ Ɔyɛɛ kerub biako wɔ ti ha, na ɔyɛɛ kerub biako nso wɔ ti ha; mpata agua no mu na ɔmaa kerubim no fii ne ti abien no so.

⁹ Na kerubim no trɛtrɛw wɔn ntaban mu ɔsoro de wɔn ntaban no kataa mpata agua no so, na wɔn ani kyerɛkyerɛ wɔn ho; na kerubim no ani kyerɛkyerɛ mpata agua no so.

Wɔyɛ ɔpon no

¹⁰ Na ɔde ɔkanto yɛɛ ɔpon no, ne tenten basafa baako, ne tɛtrɛtɛ bɛyɛ anammɔn biako ne fa, na ne sorokɔ bɛyɛ anammɔn abien ne fa.

¹¹ Na ɔde sika amapa duraa ho, na ɔyɛɛ ɛho sika hankare hyiae.

¹² Na ɔyɛɛ ɛho mfomfamho a ne trɛw te sɛ nsam hyiae, na ɔyɛɛ mfomfamho no ho sika hankare hyiae.

¹³ Na oguu ɛho sika nkaa anan, na ɔde nkaa no sisii ntwea anan a ɛwɔ ne nan anan ho no so.

¹⁴ Mfomfamho no ase pa ara na nkaa a ɛyɛ mpoma a wɔde bɛsoa ɔpon no wurabea no wɔ.

¹⁵ Na ɔde ɔkanto sinsen mpoma no, na ɔde sika duraduraa ho, na wɔde asoa ɔpon no.

¹⁶ Na ɔde sika amapa yɛɛ ɔpon no so nneɛma, ne nsanka ne ne nsankawa ne ne nkuruwa ne ne nkora a wɔde behwie.

¹⁷ Na ɔde sika amapa yɛɛ kaneadua no, sika a wɔaboro na ɔde yɛɛ kaneadua no, ne nan ne ne dua; ɛho kuruwa, ne kukuduuduu ne ne nhwiren fi ɛno ara mu.

¹⁸ Na nsa asia tuatua ho, kaneadua no nsa abiɛsa tuatua ɔfa ha, na kaneadua no nsa abiɛsa tuatua ɔfa ha.

¹⁹ Nkuruwa abiɛsa a ɛte sɛ ɔsonkoran de wɔ nsa biako ho, ne kukuduuduu ne ne nhwiren, na nkuruwa abiɛsa a ɛte sɛ ɔsonkoran de wɔ nsa biako ho, ne kukuduuduu ne ne nhwiren; saa ara na ɛte nsa asia a etuatua kaneadua no ho no ho.

²⁰ Na kaneadua no ho nkuruwa a ɛte sɛ ɔsonkoran de si anan, ne kukuduuduu ne ne nhwiren;

²¹ na kukuduuduu no wowɔ nsa abien abien a etuatua ho no ase, nsa asia a etuatua ho no ase.

²² Ne kukuduuduu ne ne nsa tua ho ara, ne nyinaa yɛ sika amapa a wɔaboro no biako.

²³ Na ɔde sika amapa yɛɛ ɛso akanea ason no ne ɛho adabaw ne ɛho nso nkukuwa.

²⁴ Sika amapa dwetikɛse biako na ɔde yɛɛ ɛne ɛho nneɛma no nyinaa.

²⁵ Na ɔde ɔkanto yɛɛ aduhuamhyew afɔremuka, ne tenten yɛ anammɔn biako ne fa, na ne tɛtrɛtɛ nso bɛyɛ anammɔn biako ne fa, ɛyɛ ahinanan, ne sorokɔ yɛ basafa baako; ne mmɛn nso tuatua ho ara.

²⁶ Na ɔde sika amapa duraa ho, ɛso ne ɛho hyiae, ne ne mmɛn no; na ɔyɛɛ ho sika hankare hyiae.

²⁷ Na ɔyɛɛ ɛho sika nkaa abien, ne hankare no ase, ne nkyɛn mu abien no so, sɛ ɛnyɛ mpoma no wurabea na wɔde asoa.

²⁸ Na ɔde ɔkanto sinsen mpoma, na ɔde sika duraduraa ho.

²⁹ Na ɔyɛɛ ɔsra ngo kronkron ne ɔhyew aduhuam gyenennyenen no, sɛnea adufrafo fra no.