2 Korintofo 6 - KYERƐW KRONKRON

¹ Na yɛn a yɛne no bom yɛ adwuma no tu mo fo nso sɛ munnnye Onyankopɔn adom no kwa.

² Na ɔka sɛ: Bere a ɛsɛ mu na matie wo, na nkwagye da na maboa wo; hwɛ, afei ne adom bere, hwɛ, ɛnnɛ ne nkwagye da.

Asomafo no adansedi nhoma

³ Na yɛnto obiara hintidua na wɔannya mfomso biara wɔ yɛn som ho,

⁴ na mmom nneɛma nyinaa mu, yeyi yɛn ho kyerɛ sɛ Onyankopɔn asomfo: Boasetɔ pii mu, ahohia mu, ahokyere mu, ahometew mu;

⁵ ɔhwe mu, afiaseda mu, mansotwe mu, adwuma den mu, apɛsi mu, mmuada mu;

⁶ ahotew mu, nimdeɛ mu, abodwokyɛre mu, ayamye mu, Honhom Kronkron mu, ɔdɔ a nkontompo nni mu mu;

⁷ nokware asɛnka mu, Onyankopɔn tumi mu, trenee akode mu wɔ nifa ne benkum;

⁸ anuonyam ne animguase mu, atenka bɔne ne atenka pa mu; sɛ asisifo nanso wɔyɛ anokwafo,

⁹ sɛ wɔn a wonnim wɔn, nanso wonim wɔn yiye, sɛ wɔn a wɔrewu, na hwɛ, yɛte ase; sɛ wɔn a wɔtwe wɔn aso, nanso wonkum wɔn;

¹⁰ sɛ awerɛhowfo, nanso wɔn ani gye daa; sɛ ahiafo, nanso wɔma nnipa pii nya wɔn ho; sɛ wɔn a wonni hwee, nanso wɔwɔ nneɛma nyinaa.

Ɔdɔ ho adesrɛ

¹¹ O Korintofo, yɛaka no pefee akyerɛ mo, yɛn komam atrɛw.

¹² Ɛnyɛ yɛn mu na monsen, na mo ankasa mo yam na monsen.

¹³ Na mo nso — meka eyi mekyerɛ mo sɛ mma — montrɛw mo mu saa ara mfa ntua ka.

Ɔbra wɔne abosonsomfo ntam ayɔnkofa

¹⁴ Mo ne wɔn a wonnye nni nntwe kɔndua koro; twaka bɛn na trenee ne amumɔyɛ wɔ? Anaasɛ ayɔnkofa bɛn na hann ne sum wɔ?

¹⁵ Na biakoyɛ bɛn na ɛwɔ Kristo ne Belial ntam? Anaasɛ kyɛfa bɛn na ogyidini ne nea onnye nni wɔ?

¹⁶ Na biakoyɛ bɛn na Onyankopɔn asɔrefi ne abosom wɔ? Na yɛyɛ Onyankopɔn a ɔte ase no asɔrefi, sɛnea Onyankopɔn aka sɛ: Mɛtena wɔn mu, na manantew wɔn mu, na mayɛ wɔn Onyankopɔn, na wɔayɛ me ɔman.

¹⁷ Enti mumfi wɔn mu, na montew mo ho mfi wɔn mu, Awurade na ose, na monnka nea ɛyɛ fi; na me nso magye mo,

¹⁸ na mayɛ mo agya, na moayɛ me mmammarima ne mmabea, Awurade Tumfo na ose.