2 Berɛsosɛm 4 - KYERƐW KRONKRON

Asɔrefi ho nneɛma no yɛ

¹ Na ɔyɛɛ kɔbere afɔremuka, ne ntwemu basafa du, na ne trɛw basafa du, na ne korɔn basafa anum.

² Na ɔyɛɛ aguaresɛn no kukuruwa, efi ano kosi ano yɛ basafa anum, na basafa abien ne fa ne ne korɔn, na basafa dunum hama na etwa ho hyia.

³ Na kukuduuduu nsɛso wowɔ ase de twa ɛho nyinaa hyia, edu wɔ anammɔn biako ne fa mu, ɛbɔ ɛpo no ho kontonkron, kukuduuduu akyerɛpɛn abien, wogui ne gu ara mu.

⁴ Ɛwɔ anantwi dumien so, abiɛsa hwɛ benkum fam, na abiɛsa hwɛ atɔe, na abiɛsa hwɛ nifa fam, na abiɛsa hwɛ apuei; na ɛpo no taa wɔn so ɔsoro, na wɔn akyi nyinaa wɔ emu fam.

⁵ Na ne pipripi yɛ nsayam trɛw, na ɔyɛɛ ano sɛ kuruwa ano, te sɛ sukooko nhwiren a ahan, na galɔn mpem dunum kɔ mu.

⁶ Na ɔyɛɛ aguasɛn du, na ɔde anum sisii nifa fam na ɔde anum nso sisii benkum fam, sɛ wɔnhohoro nneɛma ho wɔ mu; ɔhyew afɔre nneɛma no na wɔhohoro ho wɔ mu; na ɛpo no de, ɛwɔ hɔ ma asɔfo, na wɔahohoro wɔn ho wɔ mu.

⁷ Na ɔyɛɛ sika akaneadua du sɛ ne yɛbea te, na ɔde sisii asɔredan no mu, anum wɔ nifa fam, na anum nso wɔ benkum fam.

⁸ Na ɔyɛɛ apon du de sisii asɔredan no mu, anum wɔ nifa, na anum wɔ benkum; na ɔyɛɛ sika nkora ɔha.

⁹ Na ɔyɛɛ asɔfo abangua ne ban mu adiwo kɛse no, na ɔde apon sisii adiwo no ano, na ɔde kɔbere duraa apon no ho.

¹⁰ Na ɔde po no sii nkyɛn mu wɔ nifa, apuei a ɛkyerɛ nifa fam.

¹¹ Na Huram yɛɛ nseaa ne sesaw ade ne nkora no nso. Na Huram wiee adwuma a ɔyɛ maa ɔhene Solomon Onyankopɔn fi no yɛ,

¹² adum abien no ne apɔw no ne adum no atifi aduntiri abien no ne ntontan abien a wɔde kataa adum no atifi ntaasotiri apɔw abien no ho no,

¹³ ne ntontan abien no akutu ahannan, akutu kyerɛpɛn abien yɛ ntontan biako de, sɛ ɛnkata adum no so ntaasotiri abien apɔw no ho;

¹⁴ na ɔyɛɛ nsugye nnaka du no, na ɔyɛɛ nnyinaso nnaka no so aguasɛn du no;

¹⁵ ɛpo biako ne ase anantwi dumien no,

¹⁶ ne nseaa ne sesaw ade ne adinam no ne ɛho nneɛma nyinaa, Huram-abi yɛ maa ɔhene Solomon maa AWURADE fi no, ɛyɛ kɔbere a wɔabere ho hyɛnhyɛn.

¹⁷ Yordan ho tataw mu na ɔhene gui, dɔte a wɔapiw mu, Sukot ne Sereda ntam.

¹⁸ Na Solomon yɛɛ nneɛma yi nyinaa bebree pa ara, na wonnim kɔbere no nkarii ano.

¹⁹ Na Solomon yɛɛ Onyankopɔn fi nneɛma no nyinaa, ne sika afɔremuka no, ne apon a Kyerɛ Abodoo sisi so no,

²⁰ ne akaneadua no ne ɛho akanea a wɔsɔ no sɛ ne yɛbea, mpiakyiri no anim no, ɛyɛ sika amapa,

²¹ na ɛho nhwiren ne akanea ne adabaw no yɛ sika: Ne nyinaa yɛ sika ara nko.

²² Na adumgya, nkora, aduhuam kukuwa ne nsrama nkukuwa no yɛ sika amapa kronkron, na ɔdan no ano apon a ɛwɔ emu fam, kronkron mu kronkronbea ho no, ne asɔrefi dan no apon no yɛ sika.