2 Ahene 1 - KYERƐW KRONKRON

Elia ne Ɔhene Ahasia

¹ Na Ahab wu akyi no, Moab tew Israel so atua.

² Na Ahasia fii n’abansorodan a ɛwɔ Samaria no mfɛnsere mu hwee ase, na ɔyaree; na ɔsomaa abɔfo, na ɔka kyerɛɛ wɔn sɛ: Monkɔ nkobisa Ekron nyame Baalsebub sɛ menya yare yi mu nkwa anaa?

³ Na AWURADE bɔfo ka kyerɛɛ Tisbini Elia sɛ: Sɔre foro kohyia Samaria hene abɔfo no, na ka kyerɛ wɔn sɛ: So Onyankopɔn bi nni Israel nti na morekɔ akobisa Ekron nyame Baalsebub hɔ ade yi?

⁴ Enti AWURADE se: Mpa a woaforo no, woremfi so nsian, na owu na wubewu! Na Elia kɔe.

⁵ Ɛnna abɔfo no san baa ɔhene nkyɛn, na ɔka kyerɛɛ wɔn sɛ: Ɛdɛn na moasan aba yi?

⁶ Na wɔka kyerɛɛ no sɛ: Ɔbarima bi foro behyiaa yɛn, na ɔka kyerɛɛ yɛn sɛ: Monsan nkɔ ɔhene a ɔsomaa mo no nkyɛn nkɔka nkyerɛ no sɛ: Sɛ AWURADE se ni: So onyame bi nni Israel nti na woasoma rekɔ Ekron nyame Baalsebub hɔ adebisa yi? Enti mpa a woaforo no, woremfi so nsian, na owu na wubewu.

⁷ Na ɔka kyerɛɛ wɔn sɛ: Ɔbarima a ɔforo bae behyiaa mo na ɔkaa mo nsɛm yi no te dɛn?

⁸ Na wɔka kyerɛɛ no sɛ: Atade a ɔhyɛ no yɛ aboa nwin, na nhoma abɔso bɔ n’asen. Na ose: Ɛyɛ Tisbini Elia.

Elia ne asafohene baasa no

⁹ Na ɔhene somaa aduonum so safohene ne n’aduonum kɔɔ Elia nkyɛn; na wɔforo kɔɔ odiyifo no nkyɛn, na hwɛ, na ɔte bepɔw no atifi. Na ɔsafohene no ka kyerɛɛ odiyifo no sɛ: Onyankopɔn nipa, ɔhene se: Sian bra.

¹⁰ Na Elia bua ka kyerɛɛ aduonum so safohene no sɛ: Sɛ Onyankopɔn nipa ne me a, ogya mfi soro nsian mmɛhyew wo ne w’aduonum! Na ogya fi soro duru bɛhyew ɔno ne n’aduonum no.

¹¹ Na ɔhene san somaa aduonum so safohene foforo ne n’aduonum kɔɔ ne nkyɛn. Na okosee Elia sɛ: Onyankopɔn nipa, sɛ ɔhene se ni: Yɛ ntɛm sian bra.

¹² Na Elia bua ka kyerɛɛ wɔn sɛ: Sɛ Onyankopɔn nipa ne me a, ogya mfi soro nsian mmɛhyew wo ne w’aduonum! Na Onyankopɔn gya fi soro duru bɛhyew ɔno ne n’aduonum no.

¹³ Na ɔhene san somaa aduonum so safohene a ɔto so abiɛsa ne n’aduonum. Na aduonum so safohene a ɔto so abiɛsa no foro kɔe, na ɔkɔkotow ne nankoroma anim Elia anim, na ɔpaa no kyɛw ka kyerɛɛ no sɛ: Onyankopɔn nipa, ma me kra ne wo nkoa aduonum yi kra bo nyɛ den w’ani so.

¹⁴ Hwɛ, ogya afi soro aduru abɛhyew kan aduonum so asafohene baanu no ne wɔn aduonum aduonum no, na afei ma me kra bo nyɛ den w’ani so.

¹⁵ Ɛnna AWURADE bɔfo ka kyerɛɛ Elia sɛ: Wo ne no nsian nkɔ, nsuro n’anim. Na ɔsɔree ne no sian kɔɔ ɔhene no nkyɛn.

Ahasia wu

¹⁶ Na ɔka kyerɛɛ no sɛ: Sɛ AWURADE se ni: Esiane sɛ woasoma abɔfo sɛ wonkobisa Ekron nyame Baalsebub hɔ ade, te sɛnea Onyame bi nni Israel a wokobisa no asɛm nti, mpa a woaforo no, woremfi so nsian, na owu na wubewu.

¹⁷ Na owui, sɛnea AWURADE maa Elia kae no. Na Yehoram sii n’ananmu dii hene, Yuda hene Yehosafat ba Yehoram afe a ɛto so abien so, efisɛ onni ba.

¹⁸ Na Ahasia ho nsɛm nkae, nea ɔyɛe no, so wɔankyerɛw Israel ahene beresosɛm nhoma no mu?