1 Samuel 8 - KYERƐW KRONKRON

Israelfo hwehwɛ ɔhene

¹ Bere a Samuel bɔɔ akora no, ɔde ne mma sisii Israel so sɛ akannifo.

² N’abakan din de Yoel, na nea ɔka ho no de Abiya; wɔyɛɛ akannifo wɔ Beer-seba.

³ Na ne mma no de, wɔansɛ wɔn agya ɔkwan biara so, na wɔman kodii mfaso akyi, wogyigyee adammude, na wobubuu ntɛnkyew.

Israelfo hwehwɛ ɔhene

⁴ Ɛnna Israel mpanyin nyinaa hyia baa Samuel nkyɛn wɔ Rama

⁵ bɛka kyerɛɛ no sɛ: Hwɛ, woabɔ akora, na wo mma mfa w’akwan so. Afei si ɔhene ma yɛn na onni yɛn kan sɛ amanaman nyinaa te.

⁶ Na asɛm no ansɔ Samuel ani sɛ wɔkae sɛ: Ma yɛn ɔhene na onni yɛn kan no. Na Samuel bɔɔ AWURADE mpae.

⁷ Na AWURADE ka kyerɛɛ Samuel sɛ: Tie nea ɔman no se ne nea wɔka kyerɛ wo no nyinaa, efisɛ ɛnyɛ wo na wɔapa wo, na me na wɔapa me, sɛ minnni wɔn so hene.

⁸ Wɔn nneyɛe nyinaa fi da a miyii wɔn fii Misraim mebae de abedu nnɛ yi, sɛnea wɔagyaw me akɔsom anyame foforo no, saa ara na wɔreyɛ wo nso yi.

⁹ Enti tie wɔn; na kasa kyerɛ wɔn, kyerɛ wɔn ɔhene a obedi wɔn so no apɛde.

¹⁰ Na Samuel kaa AWURADE nsɛm no nyinaa kyerɛɛ ɔmanfo a wobisaa no hɔ ɔhene no.

¹¹ Na ɔka kyerɛɛ wɔn sɛ: Eyi ne ɔhene a obedi mo so no apɛde: Ɔbɛpaw mo mmammarima de wɔn akɔ ne nteaseɛnam ne n’apɔnkɔsotefo mu, na wama wɔatu mmirika adi ne nteaseɛnam anim sɛ n’awɛnfo

¹² na ɔde wɔn asisi mpem so asafohene ne aduonum so asafohene afa, na wama wɔadɔw n’asase na wɔatwa ne nnɔbae, na wɔayɛ n’akode ne ne nteaseɛnam ho ade.

¹³ Na ɔbɛfa mo mmabea ayɛ adufrafo, soodofo ne abodootofo.

¹⁴ Na ɔbɛfa mo mfuw ne mo bobe nturo mu nea eye de ama n’asomfo.

¹⁵ Na obegye mo awifuw ne bobe nturo aba mu ntotoso du du de ama ne gyaasefo ne n’asomfo.

¹⁶ Na ɔbɛfa mo nkoa ne mo mfenaa ne mo mmerante mu ahoɔdenfo, ne mo mfurum de ayɛ n’adwuma.

¹⁷ Obegye mo nguan mu ntotoso du du. Na mobɛyɛ no nkoa.

¹⁸ Na bere bi bɛba a, mo hene a moayi no adi mo so no nti, mubesu afrɛ AWURADE, nanso ɔremmua mo.

¹⁹ Na ɔman no ampene sɛ wotie Samuel, na wɔkae sɛ: Dabi, na ɔhene ara na onni yɛn so,

²⁰ na yɛn nso nyɛ sɛ amanaman nyinaa, na yɛn hene no nni yɛn anim nni ako mma yɛn.

²¹ Na Samuel tee ɔman no nsɛm nyinaa no, ɔka guu AWURADE asom.

²² Na AWURADE ka kyerɛɛ Samuel sɛ: Tie wɔn, na si ɔhene ma wɔn. Na Samuel ka kyerɛɛ Israelfo nyinaa sɛ: Obiara nkɔ ne kurom.