1 Samuel 3 - KYERƐW KRONKRON

AWURADE yi ne ho adi kyerɛ Samuel

¹ Na abofra Samuel som AWURADE, Eli anim. Na AWURADE asɛm ho yɛna saa bere no mu, na anisoadehu ntaa nni hɔ.

² Na ɛbere no mu, ɛbae sɛ da bi a Eli da ne dabere no, nso na n’ani so afi ase ayɛ kusukusu a onhu ade yiye,

³ na Onyankopɔn kanea no nnya nnumii na Samuel da AWURADE asɔredan mu, nea Onyankopɔn adaka no si hɔ no.

⁴ AWURADE frɛɛ Samuel se: Samuel, Samuel, na ose: Mini.

⁵ Na otuu mmirika kɔɔ Eli nkyɛn kɔkae sɛ: Mini, na wofrɛɛ me. Na Eli buae sɛ: Memfrɛɛ wo ɛ, san kɔda. Na ɔkɔdae.

⁶ Na AWURADE frɛɛ Samuel bio sɛ Samuel; na Samuel sɔre kɔɔ Eli nkyɛn kɔkae sɛ: Mini, na wofrɛɛ me. Na ose: Memfrɛɛ wo ɛ, me ba, san kɔda.

⁷ Nso na Samuel nnya nhuu AWURADE, na wonnya nyii AWURADE asɛm nkyerɛɛ no ɛ.

⁸ Na AWURADE kɔɔ so frɛɛ Samuel nea ɛto so abiɛsa; na ɔsɔre kɔɔ Eli nkyɛn kɔkae sɛ: Mini na wofrɛɛ me. Ɛnna Eli hui sɛ AWURADE na ɔrefrɛ abofra no,

⁹ enti Eli ka kyerɛɛ Samuel sɛ: Kɔda, na sɛ ɔfrɛ wo a, ka sɛ: AWURADE, kasa na w’akoa retie. Na Samuel kɔ kɔdaa ne dabere.

¹⁰ Na AWURADE bae begyinaa hɔ frɛɛ sɛ kan no sɛ: Samuel, Samuel! Ɛnna Samuel se: Kasa, na w’akoa retie.

¹¹ Na AWURADE ka kyerɛɛ Samuel sɛ: Hwɛ, merebɛyɛ biribi Israelfo mu a obiara a ɔbɛte no aso abien mu bɛyɛ no yɔnn.

¹² Da no na mɛma ade a maka atia Eli fi nyinaa aba mu fi mfiase de kosi awiei.

¹³ Na maka makyerɛ no sɛ merebu ne fi atɛn akosi daa, amumɔyɛ no nti, efisɛ onim sɛ ne mma reyɛ abusude, na wanka wɔn anim.

¹⁴ Na enti maka ntam afa Eli fi ho sɛ: Sɛ wɔde okum afɔre ne aduan afɔre pata ma Eli fi mpo a, ɛrempopa wɔn amumɔyɛ no da biara da.

¹⁵ Na Samuel dae koduu anɔpa, na ohiɛhiɛɛ AWURADE fi apon no. Na Samuel suroe sɛ ɔbɛka ade a ohui no akyerɛ Eli.

¹⁶ Ɛnna Eli frɛɛ Samuel sɛ: Me ba Samuel! Na ose: Mini!

¹⁷ Na ɔkae sɛ: Asɛm bɛn na ɔka kyerɛɛ wo no? Nsiw me so. Sɛ wusiw me asɛm a ɔka kyerɛɛ wo no nyinaa bi so a, Onyankopɔn ntua wo ka, na ɔmfa bi nka ho.

¹⁸ Ɛnna Samuel kaa nsɛm no nyinaa kyerɛɛ no, na wansiw no bi so. Na Eli se: Ɛyɛ AWURADE, nea eye n’ani so no, ɔnyɛ.

¹⁹ Na Samuel renyin no, na AWURADE di n’akyi, na asɛm biara a ɔkae no baa mu.

²⁰ Na Israel nyinaa, efi Dan kosi Beer-seba, hui sɛ wɔde Samuel asi hɔ, sɛ ɔnyɛ AWURADE diyifo.

²¹ Na AWURADE kɔɔ so yii ne ho adi wɔ Silo; na AWURADE de n’asɛm yii ne ho kyerɛɛ Samuel wɔ Silo.