1 Samuel 13 - KYERƐW KRONKRON

Filistifo so satu

¹ Saul bedii hene no, na wadi bɛyɛ mfirihyia aduasa Na odii Israel so hene bɛboro mfe abien no,

² ɔpaw Israel mu nnipa mpensa fae. Na wɔn mu mpennu wɔ Saul nkyɛn, Mikmas ne Betel bepɔw so, na apem wɔ Yonatan nkyɛn Gibea a ɛwɔ Benyamin; na ɔman a aka no, ogyaa wɔn kwan ma wɔkokɔɔ wɔn ntamadan mu.

³ Na Yonatan kaa Filistifo bansifo a wɔwɔ Geba no gui; na Filistifo tee. Ɛnna Saul hyɛn torobɛnto asase no nyinaa so sɛ: Momma Hebrifo nte!

⁴ Na Israel nyinaa tee sɛ Saul aka Filistifo bansifo no agu, ne sɛ Israel ama wɔn ho ayɛ Filistifo ahi. Na wohyiahyiaa ɔman no boaa ano, Saul nkyɛn wɔ Gilgal.

⁵ Na Filistifo boaboaa wɔn ho ano sɛ wɔne Israel rebɛko: Nteaseɛnam ɔpeduasa ne apɔnkɔfo mpemnsia ne dɔm a ne dodow te sɛ mpoano anwea. Na wɔforo bae bɛbɔɔ nsra Mikmas, Bet-awen apuei.

⁶ Na Israel mmarima no hui sɛ ɛreden wɔn, efisɛ wɔhyɛɛ ɔman no ahometew: Na ɔman no hintahintaw abodan ne mmena ne abotan ne aboda ne mmura mu.

⁷ Na Hebrifo no bi twaa Yordan kɔɔ Gad ne Gilead asase so. Na Saul da so wɔ Gilgal, na ɔman no nyinaa de ahopopo dii n’akyi.

Saul afɔrebɔ a ɛmfata

⁸ Na ɔtwɛnee nnansɔn a ɛne bere a Samuel hyɛe no; nanso Samuel amma Gilgal, na ɔman no fii ne ho petee.

⁹ Ɛnna Saul kae sɛ: Momfa ɔhyew afɔre ne asomdwoe afɔre no mmrɛ me. Na ɔbɔɔ ɔhyew afɔre no.

¹⁰ Na hwɛ, owiee ɔhyew afɔre no bɔ ara pɛ, na Samuel bae; na Saul fii adi sɛ ɔrekohyia no akyia no.

¹¹ Ɛnna Samuel kae sɛ: Ɛdɛn na woayɛ yi? Na Saul se: Mihui sɛ ɔman no refi me ho apete, na wo nso woamma bere a wohyɛe no, na Filistifo aboa wɔn ho ano Mikmas,

¹² ɛnna mise: Afei Filistifo rebesian aba me so wɔ Gilgal, nso minnya minyii AWURADE mpae ɛ, enti na mehyɛɛ me ho mebɔɔ ɔhyew afɔre no.

¹³ Na Samuel ka kyerɛɛ Saul sɛ: Woadi nkwaseasɛm, woanni AWURADE wo Nyankopɔn mmara asɛm a ɔhyɛɛ wo no so. Na anka afei na AWURADE rebɛma w’ahenni atim Israel so daa:

¹⁴ Na afei w’ahenni rennyina. AWURADE bɛhwehwɛ ne koma so barima afa, na AWURADE asi no ne man so hene, efisɛ woanni nea AWURADE hyɛɛ wo no so.

¹⁵ Na Samuel sɔre fii Gilgal kɔɔ Gibea-benyamin. Na Saul kan dɔm a wɔne no wɔ hɔ no, mmarima bɛyɛ ahansia.

¹⁶ Na Saul ne ne ba Yonatan ne dɔm a wɔne wɔn wɔ hɔ no tenaa Gibea-benyamin, nso na Filistifo abɔ nsra wɔ Mikmas.

¹⁷ Na afowfo akuw abiɛsa fi Filistifo nsram bae: Asafokuw biako tew faa Ofra kwan so kɔɔ Saul asase so;

¹⁸ na asafokuw biako tew faa Bet-horon kwan so, na asafokuw biako nso tew faa ɔhye a ɛkyerɛ Seboim bon no kwan so kɔɔ sare so fam.

¹⁹ Nanso na ɔtomfo biara nni Israel asase no so baabiara, efisɛ Filistifo kae sɛ: Anyɛ saa a, Hebrifo bɛbɔ nkrante ne mpeaw.

²⁰ Na Israel nyinaa sian kɔ Filistifo nkyɛn kɔsesew wɔn fɛtɛw nnade ne wɔn nsɔw ne wɔn nkuma ne wɔn, nnade a akonton a wɔde twa sare;

²¹ na wogye fɛtɛw nnade ne nsosɔw no biara ho dwetɛbona nkyemu abiɛsa mu biako, na wɔsew nkuma anaa wosiesie nnade a wɔde ka, mmoa nso a, wogye dwetɛbona nkyemu abiɛsa mu biako no mmɔho.

²² Na koda no, wɔanhu nkrante anaa peaw dɔm a wɔne Saul ne Yonatan wɔ hɔ no mu biara nsam gye Saul ne ne ba Yonatan nsam na wohuu bi.

²³ Na Filistifo bansifo no fii adi kɔɔ baabi a Mikmas fa.