1 Mose 5 - KYERƐW KRONKRON

Adam awo ntoatoaso

¹ Adam awo ntoatoaso nhoma ni: Da a Onyankopɔn bɔɔ onipa no, ne suban so na ɔyɛɛ no;

² ɔbarima ne ɔbea na ɔbɔɔ wɔn, na ohyiraa wɔn, na ɔtoo wɔn din onipa.

³ Na Adam dii mfirihyia ɔha aduasa na ɔwoo babarima wɔ ne sɛso so sɛ ne suban so, na ɔtoo no din Set.

⁴ Na Adam woo Set no akyi no odii mfirihyia ahanwɔtwe, na ɔwoo mmammarima ne mmabea.

⁵ Na Adam nna a odii nyinaa si mfe ahankron aduasa, na owui.

⁶ Na Set dii mfirihyia ɔha ne anum na ɔwoo Enos.

⁷ Na Set woo Enos no akyi no, odii mfe ahanwɔtwe ne asɔn, na ɔwoo mmammarima ne mmabea.

⁸ Na Set nna nyinaa si mfe ahankron ne dumien, na owui.

⁹ Na Enos dii mfirihyia aduakron na ɔwoo Kenan.

¹⁰ Na Enos woo Kenan no akyi no, odii mfe ahanwɔtwe ne dunum, na ɔwoo mmammarima ne mmabea.

¹¹ Na Enos nna nyinaa si mfe ahankron ne anum, na owui.

¹² Na Kenan dii mfirihyia aduɔsɔn na ɔwoo Mahalaleel.

¹³ Na Kenan woo Mahalaleel no akyi no, odii mfe ahanwɔtwe aduanan, na ɔwoo mmammarima ne mmabea.

¹⁴ Na Kenan nna nyinaa si mfe ahankron ne du, na owui.

¹⁵ Na Mahalaleel dii mfirihyia aduosia anum na ɔwoo Yared.

¹⁶ Na Mahalaleel woo Yared akyi no, odii mfe ahanwɔtwe aduasa, na ɔwoo mmammarima ne mmabea.

¹⁷ Na Mahalaleel nna nyinaa si mfe ahanwɔtwe aduakron anum, na owui.

¹⁸ Na Yared dii mfirihyia ɔha aduosia abien na ɔwoo Enok.

¹⁹ Na Yared woo Enok akyi no, odii mfe ahanwɔtwe, na ɔwoo mmammarima ne mmabea.

²⁰ Na Yared nna nyinaa si mfe ahankron aduosia abien, na owui.

²¹ Na Enok dii mfirihyia aduosia anum na ɔwoo Metusela.

²² Na Enok woo Metusela no akyi no, ɔne Nyankopɔn nantewee mfirihyia ahasa, na ɔsan woo mmammarima ne mmabea.

²³ Na Enok nna nyinaa si mfe ahasa aduosia anum.

²⁴ Na Enok ne Nyankopɔn nantewee; na wanhu no efisɛ Onyankopɔn faa no kɔe.

²⁵ Na Metusela dii mfirihyia ɔha aduɔwɔtwe ason na ɔwoo Lamek.

²⁶ Na Metusela woo Lamek no akyi no, odii mfe ahansɔn aduɔwɔtwe abien, na ɔwoo mmammarima ne mmabea.

²⁷ Na Metusela nna nyinaa si mfe ahankron aduosia akron, na owui.

²⁸ Na Lamek dii mfirihyia ɔha aduɔwɔtwe abien na ɔwoo ɔbabarima,

²⁹ na ɔtoo no din Noa, na ɔkae sɛ: Oyi na ɔbɛkyekye yɛn werɛ wɔ yɛn nnwuma ne yɛn nsa ano brɛ mu wɔ asase a AWURADE adome no so.

³⁰ Na Lamek woo Noa no akyi no, odii mfe ahanum aduɔkron anum, na ɔsan woo mmammarima ne mmabea.

³¹ Na Lamek nna nyinaa si mfirihyia ahansɔn aduɔsɔn asɔn, na owui.

³² Na Noa dii mfirihyia ahannum, na Noa woo Sem, Ham ne Yafet.