1 Mose 46 - KYERƐW KRONKRON

Yakob ne ne fifo kɔ Misraim

¹ Na Israel ne nea ɔwɔ nyinaa siim, na oduu Beer-seba, na ɔbɔɔ afɔre maa n'agya Isak Nyankopɔn.

² Na Onyankopɔn nam anadwo anisoadehu mu ka kyerɛɛ Israel sɛ: Yakob, Yakob! Na ose: Mini.

³ Na ose: Mene Onyankopɔn, w'agya Nyankopɔn no. Nsuro sɛ wubesian akɔ Misraim, na mɛyɛ wo ɔman kɛse wɔ hɔ.

⁴ Me ne wo besian akɔ Misraim, na mede wo masan maba nso, na Yosef abasa so na wobewu.

⁵ Na Yakob siim fii Beer-seba. Na Israel mma de wɔn agya Yakob ne wɔn mma ne wɔn yerenom tenatenaa nteaseɛnam a Farao soma kɔfaa no no mu.

⁶ Na wɔfaa wɔn mmoa ne wɔn ahode a wɔanya wɔ Kanaan asase so kɔɔ Misraim, Yakob ne n'asefo nyinaa:

⁷ ne mmammarima ne mmabea ne ne nenanom ne n'asefo nyinaa, na ɔne wɔn kɔɔ Misraim.

⁸ Na eyinom ne Israel mma a wɔkɔɔ Misraim no din, Yakob ne ne mma: Yakob abakan Ruben.

⁹ Na Ruben mmammarima ne: Hanok, Palu, Hesron ne Karmi.

¹⁰ Na Simeon mmammarima ne: Yemuel, Yamin, Ohad, Yakin, Sohar ne Kanaanni bea ba Saul.

¹¹ Na Lewi mmammarima ne: Gerson, Kahat ne Merari.

¹² Na Yuda mmammarima ne: Er, Onan, Sela, Peres ne Serah; na Er ne Onan wui Kanaan asase so. Na Peres mmammarima ne: Hesron ne Hamul.

¹³ Na Isakar mmammarima ne: Tola, Puwa, Hiob ne Simron.

¹⁴ Na Sebulon mmammarima ne: Sered, Elon ne Yahleel.

¹⁵ Eyinom ne Lea mmammarima a ɔwo maa Yakob wɔ Mesopotamia, ne ne babea Dina, ne mmammarima ne ne mmabea nyinaa si akra aduasa abiɛsa.

¹⁶ Na Gad mmammarima ne: Sifion, Hagi, Suni, Esbon, Eri, Arodi ne Areli.

¹⁷ Aser mmammarima ne: Yimna, Isua, Isui, Beria ne wɔn nuabea Sera. Na Beria mmammarima ne: Heber ne Malkiel.

¹⁸ Eyinom ne Silpa a Laban de no maa ne babea Lea no mma a ɔwo maa Yakob, wosi akra dunsia.

¹⁹ Yakob yere Rahel mmammarima ne: Yosef ne Benyamin.

²⁰ Na Yosef mma a On sɔfo Potifera babea Asnat wo maa no Misraim asase so ne: Manase ne Efraim.

²¹ Na Benyamin mmammarima ne: Bela, Beker, Asbel, Gera, Naaman, Ehi, Ros, Mupim, Hupim ne Ard.

²² Eyinom ne Rahel mma a wɔwo maa Yakob, akra no nyinaa si dunan.

²³ Na Dan babarima ne: Husim.

²⁴ Na Naftali mmammarima ne: Yahseel, Guni, Yeser ne Silem.

²⁵ Eyinom ne Bilha a Laban de no maa ne ba Rahel no mma a ɔwo maa Yakob, akra no nyinaa si baasɔn.

²⁶ Akra a wɔne Yakob kɔɔ Misraim a wofi n'asen mu, Yakob mma yerenom nka ho a, akra no nyinaa si aduosia asia.

²⁷ Na Yosef mma a wɔwoo wɔn Misraim no yɛ akra baanu. Yakob fi akra a wɔbaa Misraim no nyinaa si aduɔsɔn.

²⁸ Na ɔsomaa Yuda dii n'anim kɔɔ Yosef nkyɛn sɛ ommedi n'anim nkyerɛ no Gosen kwan. Na woduu Gosen asase so.

²⁹ Na Yosef siesiee ne nteaseɛnam kohyiaa n'agya Israel wɔ Gosen. Na ɔde ne ho kɔkyerɛɛ no no, osoo ne kɔn mu, na osui ara kyeree mu wɔ ne kɔn ho.

³⁰ Na Israel ka kyerɛɛ Yosef sɛ: Afei a manya mahu w'anim sɛ woda so te ase yi, wɔmma mintiw me nenanom wɔ asamando.

³¹ Na Yosef ka kyerɛɛ ne nuanom ne n'agya fifo sɛ: Merekɔ makɔka makyerɛ Farao sɛ: Me nuanom ne m'agya fifo a wɔwɔ Kanaan asase so no aba me nkyɛn.

³² Na nnipa no yɛ nguanhwɛfo, na mmoa na wɔyɛn, na wɔde wɔn nguan ne wɔn anantwi ne nea wɔwɔ nyinaa aba.

³³ Na sɛ Farao bɛfrɛ mo, na obisa mo sɛ: Mo adwuma ne dɛn a,

³⁴ munse no sɛ: Wo nkoa yɛ mmoahwɛfo fi yɛn mmofraase de besi nnɛ, yɛn ne yɛn agyanom, na moatena Gosen asase so, efisɛ Misraimfo kyi mmoahwɛfo nyinaa.