1 Mose 4 - KYERƐW KRONKRON

Kain ne Habel

¹ Na Adam ne ne yere Hawa hyiae, na onyinsɛnee, na ɔwoo Kain, na ɔkae se: AWURADE adaworoma, manya ɔbarima.

² Na ɔwoo ne nua Habel kaa ne ho. Na Habel yɛɛ oguanhwɛfo, na Kain de, ɔyɛɛ okuafo.

³ Na ɛbae sɛ nna bi akyi no, Kain de afum nneɛma bɛyɛɛ AWURADE ayɛ.

⁴ Na Habel nso de ne nguan mu mmakan ne wɔn a wɔadɔ no bi bɛmae. Na AWURADE ani sɔɔ Habel ne n'ayɛyɛde no,

⁵ nanso Kain ne n'ayɛyɛde de, n'ani ansɔ. Na Kain bo fuwii pii, na omunae.

⁶ Na AWURADE bisaa Kain sɛ ɛdɛn nti na wo bo afuw, na ɛdɛn nti na woamuna yi?

⁷ Sɛ woyɛ papa a, anka w'anim rentew anaa? Na sɛ woanyɛ papa nti, bɔne butuw ɔpon ano, na w'akyi kwan na ɛrehwehwɛ, nanso di no so.

⁸ Na Kain ka kyerɛɛ ne nua Habel sɛ ɔmma wɔnkɔ afum, na ɛbae sɛ wɔwɔ afum no, Kain sɔre hyɛɛ ne nua Habel, na okum no.

⁹ Na AWURADE bisaa Kain sɛ: Ɛhe na wo nua Habel wɔ? Na Kain buae sɛ: Minnim, me nua so hwɛfo ne me anaa?

¹⁰ Na AWURADE se: Ɛdɛn na woayɛ yi? Wo nua mogya nne teɛm frɛ me fi asase so.

¹¹ Na afei wɔadome wo afi asase a abue n'ano agye wo nua mogya afi wo nsam no so.

¹² Sɛ wodɔw asase a, ɛrenkɔ so mma wo ne nnɔbae bio, wobɛbɔ asesa na waye ɔkobɔfo wɔ asase so.

¹³ Na Kain ka kyerɛɛ AWURADE sɛ: Me bɔne so ade so kyɛn sɛ metumi masoa.

¹⁴ Hwɛ, woapam me nnɛ afi asase so, na mehintaw mafi w'anim, na mayɛ ɔsesafo ne ɔkobɔfo wɔ asase so, na obiara a obehu me no, obekum me.

¹⁵ Na AWURADE ka kyerɛɛ no sɛ: Ɛno nti obiara a obekum Kain no, wobedi ne were ahorow asɔn. Na AWURADE yɛɛ sɛnkyerɛnne bi maa Kain, na obiara a obehu no no ankum no.

¹⁶ Na Kain fii AWURADE anim kɔe, na ɔkɔtenaa Nod asase so wɔ Eden apuei.

Kain Asefo

¹⁷ Na Kain ne ne yere Hawa dae, na onyinsɛnee, na ɔwoo Enok. Na ɔkyekyeree kurow bi, na ɔde ne ba Enok din too kurow no.

¹⁸ Na wɔwoo Irad maa Enok, na Irad woo Mehuyael, na Mehuyael woo Metusael, na Metusael woo Lamek.

Lamek ne ne yerenom

¹⁹ Na Lamek faa mmea baanu waree, obiako din de Ada, na nea ɔka ho no din de Sila.

²⁰ Na Ada woo Yabal, ɔno na ɔyɛ ntamadan mu ne mmoa ho tenafo agya.

²¹ Na ne nua din de Yubal, ɔno na ɔyɛ asankubɔfo ne mmɛnhyɛnfo nyinaa agya.

²² Na Sila nso woo Tubal-kain a ɔyɛ kɔbere mfrafrae ne dade ade nyinaa atomfo agya. Na Tubal-kain ne nuabea ne Naama.

²³ Na Lamek ka kyerɛɛ ne yerenom sɛ: Ada ne Sila, muntie me nne; Lamek yerenom, monyɛ aso mma m'asɛm: Mikum aberante bi sɛ opiraa me, na mikum aberante sɛ ɔboroo me.

²⁴ Na sɛ wodi Kain so were mpɛn ason a, Lamek de bɛyɛ aduɔsɔn asɔn.

Set ne Enos awo

²⁵ Na Adam ne ne yere dae bio, na ɔwoo babarima, na ɔtoo no din Set a ase ne: Nsiananmu, sɛ Onyankopɔn de ɔba foforo asi me Habel a Kain kum no no anan mu.

²⁶ Na Set nso, wɔwoo ba maa no, na ɔtoo no din Enos. Ɛbere no mu na wofii ase bɔɔ AWURADE din sɔree no.