1 Mose 26 - KYERƐW KRONKRON

Isak kɔ Gerar

¹ Na ɔkɔm baa asase no so, ɛsono ɔkɔm a ɛbae Abraham bere so no. Na Isak kɔɔ Filistifo hene Abimelek nkyɛn wɔ Gerar.

² Na AWURADE yii ne ho kyerɛɛ no sɛ: Nsian nkɔ Misraim, tena asase a mɛkyerɛ wo yi so.

³ Tena asase yi so sɛ, ɔhɔho, na medi w'akyi mahyira wo, efisɛ wo ne w'asefo na mede nsaase yi nyinaa mɛma mo, na mama ntam a mekaa w'agya Abraham no agyina.

⁴ Na mɛma w'asefo adɔ sɛ ɔsoro nsoromma, na mede nsaase yi nyinaa mama w'asefo, na w'asefo mu na wobehyira asase so amanaman nyinaa,

⁵ efisɛ Abraham tiee me nne, na odii me nsiesiei, me mmara nsɛm, m'ahyɛde, ne me mmara so.

⁶ Na Isak tenaa Gerar.

⁷ Na ɛhɔfo no bisaa no ne yere ho asɛm no, ɔkae sɛ: Me nua ne no. Na osuroe sɛ, ɔbɛka sɛ: Me yere ne no, efisɛ ose: anyɛ saa a, Rebeka nti ɛhafo bekum me; efisɛ ne ho yɛ fɛ.

⁸ Na ɔkyɛɛ hɔ no, Filistifo hene Abimelek hwɛɛ mfɛnsere mu hui, na hwɛ, Isak ne ne yere Rebeka rewewe.

⁹ Na Abimelek frɛɛ Isak sɛ: Hwɛ, ampa ara ɔyɛ wo yere, na ɛyɛɛ dɛn na wuse: Ɔyɛ me nua? Na Isak ka kyerɛɛ no sɛ: Efisɛ mise: anyɛ saa a, ne nti mewu.

¹⁰ Na Abimelek se: Ɛdɛn na woayɛ yɛn yi? Ɛkaa kumaa bi na anka ɔman yi muni bi ne wo yere dae, na anka wode mmusu aba yɛn so.

¹¹ Na Abimelek hyɛɛ ne nkurɔfo nyinaa sɛ: Nea ɔbɛka ɔbarima yi anaa ne yere no, owu na obewu.

¹² Na Isak duaa mfude wɔ asase no so, na onyaa nnɔbae mmɔho ɔha afirihyia no ara mu, na Awurade hyiraa no.

¹³ Na Isak nyaa ne ho, na ɔkɔɔ so ara nyaa ne ho na ɔyɛɛ kɛse kosii sɛ ɔyɛɛ kɛse pa ara.

¹⁴ Na onyaa nguankuw, ne anantwikuw, ne nkoa pii. Na Filistifo ani beree no.

¹⁵ Na nsubura a n'agya Abraham nkoa tutui n'agya bere so no, Filistifo sisiw ne nyinaa de dɔte hyehyɛɛ no mama.

¹⁶ Na Abimelek ka kyerɛɛ Isak sɛ: Fi yɛn nkyɛn kɔ, na wowɔ tumi dodo sen yɛn.

¹⁷ Na Isak siim fii hɔ kosisii ne ntamadan wɔ Gerar bon mu, na ɔtenaa hɔ.

¹⁸ Na Isak san titii nsubura a n'agya Abraham bere so wotutui a Abraham wu akyi Filistifo sisiwii no mu, na ɔtotoo no din sɛnea n'agya totoe no ara.

¹⁹ Na Isak nkoa funuu obon no mu, na wohuu nsupa abura wɔ hɔ.

²⁰ Na Gerar mmoahwɛfo ne Isak mmoahwɛfo dii so aperepere kae sɛ: Nsu no yɛ yɛn dea! Enti ɔfrɛɛ abura no din Esek, ase ne: ɔham, efisɛ wɔne no hamee.

²¹ Na wotuu asubura foforo, na ɛno ho nso wɔpereperee, enti ɔfrɛɛ no Sitna, ase ne: Apereperedi.

²² Na wotutuu hɔ kotuu abura foforo, na ɛno de, wɔampere, enti ɔtoo no din Rehobot, ase ne: Prama so, na ose: Afei de Awurade atrɛw mu ama yɛn, na yɛadɔ wɔ asase yi so.

²³ Na ofii hɔ kɔɔ Beer-seba.

²⁴ Na Awurade yii ne ho kyerɛɛ no anadwo no ara kae sɛ: Mene w'agya Abraham Nyankopɔn, nsuro, na medi w'akyi mehyira wo, na m'akoa Abraham nti mɛma w'asefo adɔ.

²⁵ Na osii afɔremuka wɔ hɔ, na ɔfrɛɛ Awurade din, na osii ne ntamadan wɔ hɔ. Na Isak nkoa tuu asubura wɔ hɔ.

²⁶ Na Abimelek ne n'adamfo Ahusat ne ne safohene titiriw Pikol fi Gerar baa ne nkyɛn.

²⁷ Na Isak ka kyerɛɛ wɔn sɛ ɛdɛn nti na moba me nkyɛn yi? Sɛ motan me, na moapam me afi mo nkyɛn.

²⁸ Na wose: Yɛahu pefee sɛ: Awurade di w'akyi. Na yese: Ma ntam nna yɛn, ɛne wo ntam, na ma yɛne wo mpam,

²⁹ sɛ worenyɛ yɛn bɔne bi; sɛnea yɛanka wo, na yɛayɛ wo papa nko, na yɛagya wo kwan asomdwoe mu no. Afei wone nea Awurade ahyira no.

³⁰ Na ɔtow wɔn pon, na wodidi nomee.

³¹ Na wɔsɔree anɔpatutu kekaa ntam kyerɛkyerɛɛ wɔn ho, na Isak gyaa wɔn kwan, na wɔde asomdwoe fii ne nkyɛn kɔe.

³² Na da no ara Isak nkoa bae bɛkaa no abura a wotui no ho asɛm sɛ: Yɛato nsu.

³³ Na ɔfrɛɛ no Siba. Enti kurow no din de Beer-seba de besi nnɛ yi ara.

³⁴ Na Esau dii mfirihyia aduanan no, ɔwaree Hetini Beeri babea Yudit ne Hetini Elon babea Basmat.

³⁵ Na wɔhyɛɛ Isak ne Rebeka awerɛhow.