1 Mose 21 - KYERƐW KRONKRON

Isak awo

¹ Na AWURADE bɛhwɛɛ Sara sɛnea ɔkae no, na Awurade yɛɛ Sara sɛnea ɔhyɛɛ no bɔ no.

² Na Sara nyinsɛnee, na ɔwoo babarima maa Abraham ne nkwakorabere mu, bere a Onyankopɔn kaa no ho asɛm no mu.

³ Na Abraham too ɔba a Sara wo maa no no din Isak.

⁴ Na Abraham ba Isak dii nnawɔtwe no, otwaa no twetia, sɛnea Onyankopɔn hyɛɛ no no.

⁵ Na Abraham adi mfirihyia ɔha na wɔwoo ne ba Isak maa no.

⁶ Na Sara kae sɛ: Onyankopɔn ama me ɔserew, obiara a ɔbɛte no bɛserew ama me.

⁷ Na ose: Hena na anka ɔbɛka akyerɛ Abraham sɛ: Sara bɛma mma nufu? Nanso hwɛ, mawo ba ama no, ne nkwakorabere mu.

⁸ Na abofra no nyinii, na wotwaa no nufu. Na da a wotwaa Isak nufu no, Abraham tow pon kɛse.

Wɔpam Hagar ne Ismael

⁹ Na Sara huu Misraimni Hagar ba a ɔwo maa Abraham no sɛ ɔredi fɛw.

¹⁰ Na ɔka kyerɛɛ Abraham sɛ: Pam afenaa yi ne ne ba no, na ɛnyɛ afenaa yi ba ne me ba Isak na ebedi ade.

¹¹ Na ne ba no nti asɛm no yɛɛ: Abraham yaw yiye.

¹² Na Onyankopɔn ka kyerɛɛ Abraham sɛ: Mma abofra no ne w'afenaa asɛm no nnyɛ wo yaw, na nea Sara ka kyerɛ wo nyinaa, tie, na Isak mu na wɔbɛfrɛ w'asefo.

¹³ Na afenaa ba no nso, mɛyɛ no ɔman kɛse, efisɛ ɔyɛ w'aseni.

¹⁴ Na Abraham sɔree anɔpatutu faa aduan ne nsu kotoku, na ɔde maa Hagar, ɔde sii ne kɔn ho, na ogyaa ɔne abofra no kwan. Na ɔkɔe, kokyinkyinii Beer-seba sare so.

¹⁵ Na nsu no sae wɔ kotoku no mu no, ogyaw abofra no wɔ ɔdɔtɔ bi ase,

¹⁶ na ɔkɔ kɔtenaa akyiri bɛyɛ sɛnea wɔtow bɛmma a ɛbɛtɔ, na ose: Mma minnhu abofra yi wu! Na ɔtenaa ne ntentenso, na ɔmaa ne nne so sui.

¹⁷ Na Onyankopɔn tee abarimaa no nne, na Onyankopɔn bɔfo fi soro frɛɛ Hagar ka kyerɛɛ no sɛ: Hagar, dɛn na ɛyɛ wo? Nsuro, na Onyankopɔn ate abarimaa no nne wɔ nea ɔwɔ hɔ.

¹⁸ Sɔre, ma abarimaa no so, na fa wo nsa so no mu; na mɛyɛ no ɔman kɛse.

¹⁹ Na Onyankopɔn buee n'ani, na ohuu asubura bi, na ɔkɔe kɔsaw bi hyɛɛ nsu kotoku no ma, na ɔde bi maa abarimaa no nomee.

²⁰ Na Onyankopɔn dii abarimaa no akyi, na onyinii, na ɔtenaa sare so hɔ yɛɛ ɔbɛmmatofo.

²¹ Na ɔtenaa Paran sare so; na ne na kɔwaree yere fi Misraim asase so brɛɛ no.

Abimelek ne Abraham apam

²² Na bere no mu no, Abimelek ne ne safohene: Pikol bɛka kyerɛɛ Abraham sɛ: Onyankopɔn di w'akyi wɔ biribiara a woyɛ mu.

²³ Enti afei ka Onyankopɔn ntam kyerɛ me sɛ, worentwa me ne me mma ne me mmanana nkontompo, na, sɛ adɔe a meyɛɛ wo no te no, wode bɛyɛ me ne m'asase a woabɛyɛ ɔhɔho wɔ so yi.

²⁴ Na Abraham kae sɛ: Mɛka ntam no.

²⁵ Na asubura bi a Abimelek nkoa nam anuɔden so gyei no nti Abraham kaa Abimelek anim.

²⁶ Na Abimelek kae sɛ: Minnim nea odii saa asɛm yi, na wo nso, woanka ankyerɛ me, nanso mentee da, sɛ nnɛ.

²⁷ Na Abraham de nguan ne anantwi maa Abimelek, na wɔn baanu pamee.

²⁸ Na Abraham yii nguanten mma abere ason gyinaa ɔfa.

²⁹ Na Abimelek ka kyerɛɛ Abraham sɛ: Nguanten mma abere ason a wuyii wɔn gyinaa ɔfa yi ase ne dɛn?

³⁰ Na ɔkae sɛ: Nguanten mma abere ason yi, gye wɔ me nsa mu, na ɛnyɛ me adanse, sɛ me na mituu abura yi.

³¹ Enti ɔfrɛɛ hɔ Beer-seba a ase ne: Ntanka abura, efisɛ ɛhɔ na wɔn baanu nyinaa kekaa ntam.

³² Na wɔpamee wɔ Beer-seba, na Abimelek ne ne safohene titiriw Pikol sɔree, na wɔsan kɔɔ Filistifo asase so.

³³ Na Abraham tɛw asantɛw dua wɔ Beer-seba, na ɔsɔree AWURADE a ɔyɛ daa Nyankopɔn din wɔ hɔ.

³⁴ Na Abraham yɛɛ ɔhɔho Filistifo asase so nna pii.