1 Mose 16 - KYERƐW KRONKRON

Hagar ne Ismael

¹ Na Abram yere Sarai nwo mma no. Na ɔwɔ afanaa bi a ɔyɛ Misraimni a ne din de Hagar.

² Na Sarai ka kyerɛɛ Abram sɛ: Hwɛ, AWURADE asiw m'awo ho kwan, enti kɔ m'afenaa nkyɛn, ebia menya ne ho mma. Na Abram tiee Sarai.

³ Na Abram tenaa Kanaan asase so mfirihyia du no, Abram yere Sarai faa n'afenaa Hagar a ɔyɛ Misraimni no de no maa ne kunu Abram aware.

⁴ Na ɔkɔɔ Hagar ho, na onyinsɛnee. Na ohui sɛ wanyinsɛn no, obuu n'awuraa animtiaa.

⁵ Na Sarai ka kyerɛɛ Abram sɛ: Asɛmmɔne a wɔadi me da wo so. Me na mede m'afenaa mato wo kokom, na ohuu sɛ wanyinsɛn nti, obu me animtiaa. AWURADE mmu me ne wo ntam atɛn.

⁶ Ɛnna Abram ka kyerɛɛ Sarai sɛ: Hwɛ, w'afenaa wɔ wo nsam, yɛ no sɛnea eye w'ani so. Na Sarai tan n'ani na oguan fii ne nkyɛn.

⁷ Na AWURADE bɔfo huu no nsu aniwa bi ho wɔ sare so, Sur kwan so nsu aniwa no ho.

⁸ Na ɔkae sɛ: Hagar, Sarai afanaa, wufi he na woreba, na worekɔ he ni? Na ose: Mifi m'awuraa Sarai anim na mereguan.

⁹ Na AWURADE bɔfo no ka kyerɛɛ no sɛ: San kɔ w'awuraa nkyɛn, na kɔbrɛ wo ho ase hyɛ ne nsa ase.

¹⁰ Na AWURADE bɔfo no ka kyerɛɛ no sɛ: Ɔdɔ na mɛma w'asefo adɔ, na dodow nti wɔrentumi nkan wɔn.

¹¹ Na AWURADE bɔfo no ka kyerɛɛ no sɛ: Hwɛ, woanyinsɛn, na wobɛwo ba, na wobɛto no din Ismael, ase ne: Onyankopɔn tie, efisɛ AWURADE ate w'amanehunu.

¹² Na ɔbɛyɛ onipa a ɔte sɛ sare so afurum, ne nsa bɛtia nnipa nyinaa, na ɔbɛsɔre atia ne nuanom nyinaa.

¹³ Na ɔfrɛɛ AWURADE a ɔne no kasae no din sɛ: Wone El-roi, na ose: So mahu nea ohu me no ampa?

¹⁴ Enti wɔfrɛ asubura no sɛ: Beerlahairoi, ase ne: Ɔteasefo a ohu me no abura, hwɛ, ɛwɔ Kades ne Bared ntam.

¹⁵ Na Hagar woo ba maa Abram, na Abram frɛɛ ne ba a Hagar woo no sɛ: Ismael.

¹⁶ Na Hagar woo Ismael maa Abram no, na Abram adi mfe aduɔwɔtwe asia.