1 Berɛsosɛm 13 - KYERƐW KRONKRON

Israelfo nyinaa kɔfa apam adaka no

¹ Na Dawid ne apem apem ne ɔha ha so asafohene ne mmapɔmma no nyinaa kɔɔ agyina,

² na Dawid ka kyerɛɛ Israel bagua no nyinaa sɛ: Sɛ eye mo ani so na efi AWURADE yɛn Nyankopɔn nkyɛn a, momma yɛnsoma nkɔ yɛn nuanom a wɔaka Israel nsaase nyinaa so ne asɔfo ne Lewifo a wɔka wɔn ho wɔn tenabea nkurow mu no nkyɛn, na wɔmmoaboa wɔn ho ano mmra yɛn nkyɛn,

³ na yɛnkɔfa yɛn Nyankopɔn adaka no mmra yɛn nkyɛn; na Saul bere so no, yɛammisa akyi kwan.

⁴ Ɛnna bagua no nyinaa kae sɛ wɔnyɛ sa, efisɛ asɛm no sɔɔ ɔman no nyinaa ani.

⁵ Na Dawid boaa Israel man no nyinaa ano hyiae de fi Misraim Sihor ara kosii, nea wɔrekɔ Hamat ano, sɛ wɔrekɔfa Onyankopɔn adaka no afi Kiriat-yearim aba.

⁶ Na Dawid ne Israel nyinaa foro kɔɔ Baala a ɛne Kiriat-yearim a ɛwɔ Yuda no, sɛ wɔrekɔfa Onyankopɔn AWURADE a ɔte kerubim so a wɔbɔ ne din frɛ no no adaka no afi hɔ aba.

⁷ Na wɔde Onyankopɔn adaka no sii teaseɛnam foforo bi so de fii Abinadab fi. Na Usa ne Ahio piaa teaseɛnam no.

⁸ Na Dawid ne Israel nyinaa gorui Onyankopɔn anim, wɔde ahoɔden nyinaa ne nnwom ne asanku ne mmɛnta asanku ne mpintin ne nnawuru ne ntorobɛnto.

⁹ Na woduu Kidon awiporowbea no, Usa teɛɛ ne nsa kosoo adaka no mu, efisɛ, na anantwi no hinhim.

¹⁰ Na AWURADE bo fuw Usa, na okum no, sɛ ɔteɛɛ ne nsa kaa adaka no nti, na owui Onyankopɔn anim hɔ.

¹¹ Na ɛyɛɛ Dawid awerɛhow sɛ AWURADE abu aba Usa so, na ɔfrɛɛ hɔ sɛ Peres-usa de besi nnɛ.

¹² Na Dawid suroo Onyankopɔn da no, na ɔkae sɛ: Mede Onyankopɔn adaka no mɛba me nkyɛn dɛn?

¹³ Na Dawid amfa adaka no amma ne nkyɛn Dawid kurow no mu, na ɔde man kɔɔ Gatni Obed-edom fi.

¹⁴ Na Onyankopɔn adaka no sii Obed-edom ne ne fifo nkyɛn asram abiɛsa, na AWURADE hyiraa Obed-edom fi ne nea ɔwɔ nyinaa.