1 Berɛsosɛm 10 - KYERƐW KRONKRON

Saul wu

¹ Na Filistifo ne Israel koe; na Israel mmarima gui Filistifo anim, na apirafo totɔe Gilboa bepɔw so.

² Na Filistifo tu taree Saul ne ne mma, na Filistifo kum Yonatan ne Abinadab ne Malkisua a wɔyɛ Saul mma no.

³ Na ɔko no den Saul, na agyantofo bɛtoo no, na ne ho yeraw no agyantofo no anim.

⁴ Na Saul ka kyerɛɛ n’akodekurafo sɛ: Twe wo nkrante na fa wɔ me, na momonotofo yi amma ammɛbɔ me anyampa. Na n’akodekurafo no ampene, na osuroe pii. Enti Saul faa ne nkrante na ɔhwee so.

⁵ Na n’akodekurafo no hui sɛ Saul atɔ no, ɔno nso hwee ne nkrante so na ɔtɔe.

⁶ Na Saul tɔe, na ne mma baasa no ne ne fi nyinaa totɔe prɛko.

⁷ Na Israelfo a wɔwɔ obon no mu nyinaa hui sɛ asraafo no aguan, na Saul ne ne mma atotɔ no, wogyigyaw wɔn nkurow guanee. Na Filistifo bae bɛtenatenaa mu.

⁸ Na n’adekyee no, Filistifo baa atɔfo no ho nneɛma yiyi, na wohuu Saul ne ne mma baasa no sɛ wɔatotɔ Gilboa bepɔw so.

⁹ Na woyiyii wɔn ho ade, na wɔfaa ne ti ne n’akode somae ma wɔde kyinii Filistifo asase so, sɛ wɔnkɔpae nkyerɛ wɔn ahoni ne ɔman no.

¹⁰ Na wɔde n’akode no kosiee wɔn anyame fi, na ne tikora de, wɔde kɔfam Dagon fi.

¹¹ Na Yabes-gileadfo tee nea Filistifo ayɛ Saul nyinaa no,

¹² akofofo no nyinaa sɔresɔree, na wɔkɔfaa Saul amu ne ne mma no amu no, na wɔde baa Yabes, na wobesiee wɔn nnompe no odupɔn a ɛwɔ Yabes no ase, na wodii mmuada nnansɔn.

¹³ Na Saul wui ne fom a ɔfom AWURADE no ne AWURADE asɛm a wanni so no ne sɛ nso okobisaa ɔsamanfrɛfo hɔ ade hwehwɛɛ n’akyi kwan,

¹⁴ na wanhwehwɛ AWURADE akyi kwan nti, na okum no, na ɔdan ahenni no maa Yese ba Dawid.