Tite 3 - Kice Manito Ocki Omirwatcimowin

Ke itatisitcik ka tapwerimatcik Kice Manitowa

¹ Mikawasomik kaskina ka nosanehwatcik Cecoca kitci natotawatcik okimawa kirika kice okimawa ota askik, kitci itotisketcik tan e itikotcik, kaie mocak kitci ickwa aiketcik kitci totakik kaskina ka mirwacinik.

² Kaie witamawik aka kitci matcatcimatcik awiriwa, aric kitci totakik kitci miroparihitonaniwonik, kitci mirotehectatotcik, kaie mocak kitci wapatahiwetcik e kicterimatcik kaskina owitc iriniwawa.

³ Kaie kirano meka weckatc nama ki ki otci waskamateritenano, nama ki ki otci natotenano, kirika ki ki paskewirikonano arotc kekocica. Ki ki pasoweritenano tepirak kitci matci totamokw kaie kitci mireritamihitisoikw. Tarasak ki ki tiperitakosinano matci pimatisiwinik. Ki ki matcitwanano kirika ki ki moctenamowanowok e ici tatakik iriniwok. Ki ki cikerimanowok iriniwok, kaie wirawaw ki ki cikerimikonowok.

⁴ Kotc aric ka wapatahiwetc Kice Manito, anahwe Ka Akwacimitokw, e apitc micta miro totawatc kaskina iriniwa kirika e apitc sakihatc,

⁵ ki ki akwacimikono. Namaiew aniheriw otci e ki miro totamokw wetci ki akwacimitokw, aric osam e ki kitimakerimitokw. Ki ki akwacimikono kirika ki ki mirikono kitci ocki pimatisiikw. Tarasak ki ki kisisiparikono, ka kasihamatokw kipactatowininariw, aniheriw nipiriw e ki totak ka sikahatasoikw, kirika e ki miritokw Miro Manitowa kitci pitciteheckatokw.

⁶ Nipara ki ki mirikono Miro Manitowa, osam Cecoc Krist Ka Akwacimitokw e ki pakiterimitisotc,

⁷ otcitakotc kitci ki otitikoikw kakike pimatisiwin, osam e ki miritokw icikowisk kitci ki iteritakosiikw, omirotehewin e ki apatcitatc.

⁸ Enko anihe ka ketcinaweritamokw kitci isparik. Ni nataweriten mocak kaskina anahwe kaketin kitci ici witamawotcik iriniwok, kitci otci wikokwe mocak itotisketcik aniki ka tapwerimatcik Kice Manitowa. Enko anihe ka mirwacik kaie ke ki witcihikotcik kaskina iriniwok.

⁹ Aka pamerita e kikamitonaniwok arotc kekocic otci, aka wiec e irapatak, kirika e kikatonaniwok, weckatc kitaniskotape kimocominowok e wirakaniwitcik e mitcetitcik. Akawir kir arimwe ani e ici matciparihitonaniwok, kaie e kikawotcikatek cota aiamihe irakonikewin otci. Nama wiec irapatan anihe e totcikatek, kaie nama witcihikowok iriniwok.

¹⁰ Kecpin awik e matciparihatc ka tapwerimaritci Kice Manitowa kitci papikanitonaniwonik, peikwaw ki ta witamawaw kitci ponitatc. Kecpin aka ponitate, kiapatc peikwaw witamo. Kecpin tca kiapatc aka pamitake, aka awocamec pamerimi.

¹¹ Ki kiskeriten meka aniki towihik iriniwok ki paskewok Kice Manitowa omeskanamiriw. Mocak e wi matci totakik, atamerimitisowok.

Mamitcitc witamakewin

¹² Awik ni ka iciticohwaw nete ka ici tacikein, pot Artémas, kekotc ma Tychique. Kotc ickwa takocike nete, kaketin kokwetcitakan kitci pe natawapamiin nete Nicopolis otenak. Ni ki iteriten meka nete kitci nta piponician.

¹³ Wewerita witcihik anahwe arimitakosi iriniw Zénas kirika Apollos, aka kekociciriw kitci noteparitcik matcatawe kitaskiwak.

¹⁴ Acteriw kaskina ka nosanehwatcik Cecoca kirika kirano kitci mantokasotcik kaie wirawaw mocak kitci miro totakik, mocak kitci ki witcihatcik iriniwa ka notepariritci kekociciriw. Kata tca mirwapataniw opimatisiwiniwaw.

¹⁵ Kaskina ota ka witci tacikemitcik kit arimikakok. Kaie nit arimikowananak kikwimesinowok neta ka ici tacikein, kaie wirawaw ka tapwerimatcik Cecoca. Ni pakoserimon kaie kaskina e taciekw kitci witci tacikemitakw Kice Manito omirotehewinik. Nin Pwar