Tite 2 - Kice Manito Ocki Omirwatcimowin

Icikowisk kiskinohamakewin

¹ Aric kir, ki ka kiskinohamakan kiskinohamakewin icikowisk ka icinakok.

² Ki ka witamawawok ka kiceatisitcik aka kitci minikwetcik, icikowisk kitci itatisitcik kitci ki otci kicterimakaniwitcik, icikowisk kitci iteritakik, acitc kitci sokikapowitcik tapwe e asperimototawatcik Kice Manitowa, e irikokotehetcik kitci sakihatcik owitc iriniwawa, kaie kitci ciciperitakik e nakickakik arimisiwiniw.

³ Peikon kaie ke ici witamawotcik iskwewok ka kiceatisitcik, ki ka itawok kitci ici pimatisitcik kotc e ici nataweritamiritci Kice Manitowa: aka kitci mareritciketcik; aka kitci minikwetcik; kitci tca kiskinohamaketcik ka mirwacinik;

⁴ kitci kiskinohamawatcik iskwewa ka ocki iskwewiritci kitci miro sakiharitci onapemiwa kaie onitcaniciwa;

⁵ icikowisk kitci iteritakik; kitci tca mirwinakositcik otehiwak; kitci miro mitatcik omikiwamiwaw; kitci mirotehetcik; kaie kitci natotawatcik onapemiwa. Kecpin ni itotisketawe, nama kata mareritcikateriw Kice Manito otitewin.

⁶ Peikon kaie ke ici wikosimatcik aniki ka ockinikiwitcik. Ki ka witamawawok icikowisk kitci iteritakik.

⁷ Minawatc kaie kir mocak tepirak ka mirwacik ki ka itotiskan kitci ki keskinowapamiskik. Tekaci wewerita kiskinohamake, kitehik kitci otciparik, aka arica e itein kekocic.

⁸ Acteriw mocak icikowisk kitci ititakok ke aitein, kirika aka ke ki anweritcikatek, aka awik wiec kitci ki itetc, kitci tca waneritakik aniki iriniwok ka wi itactahoritokok, aka e miskakik kekociciriw e maratanik neta kititatisiwinik.

⁹ Minawatc kotak kekocic, witamawik iriniwok ka atoskectaketcik mocak kitci natotawatcik ka tiperimikotcik, wewerita kitci atoskectawatcik, kitci mirerimikotcik, kaie aka kitci wi acitewematcik.

¹⁰ Kaie witamawik aka kekociciriw kitci kimotimatcik, nitowatc mocak kitci miro otamirotcik, kitci tca asperimototakotcik anihi okimamiwa. Kecpin ni totakawe, kaskina ka ici kiskinohamakaniwonik Kice Manito otci kata kicteritcikateriw, anahwe Ka Ki Akwacimitokw.

¹¹ Aci meka ki wapatahiwew Kice Manito omirotehewin, kaskina iriniwok kitci ki otci akwacimakaniwitcik.

¹² Ki kiskinohamakono omirotehewin kitci atimikapowictamokw matci itatisiwin, kaie aka aci kitci nataweritamokw kitci matci totamokw, notc ko e ici pimatisinaniwok ota askik. Kirawe tca icikowisk kitci iteritamokw mekwata anotc e pimatisiikw ota askik, icikowisk kaie kitci itatisiikw, kirika mocak kitci miro nosanehwokw Kice Manito.

¹³ Ekoni ke itatisiikw mekwata e petaikw anihe e kicikak ke mireritamokw, minawatc pe takocike Cecoc Krist, anahwe Ka Ki Akwacimitokw e micta icperitakositc, Kikice Manitomino.

¹⁴ Ki pakiterimitiso kirano otci kitci ki otci wikotcihitokw kaskina ka maratanik, aci kitci ki mirwinakosiikw kitehinak, wir tipirawe otirinima kitci ki iteritakosiikw, kitci ki mocak wi miro totamokw.

¹⁵ Ekoni tca ke ici kiskinohamakein, kitci sokimatcik aniki ke natotaskik, kekotc kitci kakeskimatcik aniki aka ka natotakik. Kaketin aimihik, e kiskeritaman Kice Manito e ki mirisk tiperitamowiniw kitci witamawotcik. Akawir tca pakitinik iriniwok kitci marerimiskik.