Tite 1 - Kice Manito Ocki Omirwatcimowin

E arimikaketc

¹ Nin Pwar ka masinahikeian. Kice Manito nit atoskectawaw, kirika Cecoc Krist otarotakana nit iteritakosin. Kice Manito ni ki mirikw kitci witcihimaki anahweriw ka ki orapamatc kitci asperimototakotc, kirika kitci kiskinohamawimaki tapwewiniw, ke otci kiskeritamiritci wewerita kitci nosanehikotc.

² Ekota nta ke otci takonik asperimowiniw kitci kiskeritakik otcitakotc kitci kakike pimatisitcik. Kice Manito, aka wiskat e kiraskitc, ki nespi tapwew, epwamoci kiceritak askiriw, kitci miriwetc kakike pimatisiwiniw.

³ Apitc ka iteritak kitci otcitciparinik, ki pakitinam, otitewin e ki totak, kitci kiskeritamokw kitci mirikoikw kakike pimatisiwiniw. Ni ki acotamakw kitci tipatcimowak otitewin, wir Kice Manito, anahwe Ka Ki Akwacimitokw, e ki witamawitc kitci itotisketc.

⁴ Ki masinahamatin, Tite, kir mia tapwe nikosis e iterimitan, tapickotc e asperimototawokw Cecoc. Ni pakoserimawok Kotawino Kice Manito kirika Cecoc Krist Ka Ki Akwacimitokw, mocak kitci miritakok mirotehewiniw kirika pekateritamowiniw.

Ka ki aitotisketc Tite minictikok, Crète ka icinikaterik

⁵ Ki ki nakatitin neta Crète kitci kictain anihe aka moci ka ki otci kicitakaniwok, kirika kitci pa icain kaskina otenaskak neta Crète askik, tato otenak kitci orapamatcik aniki iriniwok neta e tacitcik ke nikaniwitcik, ke mihatcik anahweriw iriniwa ka tapwerimaritci Cecoca. Mamitonerita ka ki witamatan ke itotiskein:

⁶ Anahwe ke orapamakaniwitc kitci nikaniwitc kata kiskerimakaniwiw aka e takonik ke ki otci itactahorakaniwitc e ki matci totak. Tepirak kitci peikohatc okoma. Kaie onitcanica kitci tapwerimatcik Cecoca, acitc mocak kitci miro totakik, kitci kiskerimakaniwitcik aka e matci totakik, mocak kaie kitci natotakik.

⁷ Awik ke nikaniwitc neta, atoskectawew Kice Manitowa. Ekoni wetci acterik aka kitci takonik ke ki otci itactahorakaniwitc e ki matci totak. Nama kata sasekaw, nama kata otake kiciwasiw, kaie nama kata minikwew. Nama kaie kata akwatisiw, acitc nama kata matci totam kitci ki coriaketc.

⁸ Acteriw mocak kitci mireritak kitci pitakewiratc omikiwamik owitc iriniwa e takociniritci. Mocak kata mireritam ka mirwacinik e totcikaterik. Otcitakotc icikowisk kitci iteritak, kaie icikowisk kitci itatisitc, kitci mirwinakositc otehik, acitc kitci miro nanakahitisotc.

⁹ Otcitakotc kaie kitci miro kanaweritak otehik Kice Manitowa otitewiniw ka tapwemakanik, kotc ka ki ici kiskinohamawakaniwitc, kitci ki tca sokimatc owitc iriniwa e miro kiskinohamawatc acitc kitci ki wapatahatc e patahamiritci anahweriw aka ka wi nahitamiritci.

¹⁰ Mitcetiwok meka aka ka wi natotakik kirika ka paciwiratcik owitc iriniwawa e aiarimotakik kekociciriw aka ke ki witcihikoritci. Picicikw atita neta e tacitcik ka cota iriniwitcik aci ka nosanehwatcik Cecoca ka itotisketcik.

¹¹ Acteriw kitci otcinehwakaniwitcik aka ni kitci ici kiskinohamaketcik, osam meka e matciparihatcik mitcet iriniwa kirika otcirowemakaniwa, e kiskinohamaketcik kekociciriw aka ka acterik kitci ici kiskinohamakaniwonik. Kirika aniheriw wetci totakik, tepirak kitci otci coriaketcik e matci totakik.

¹² Takopan peikw iriniw ka nikan tipatcimokopanen Crète, ekote wetcikopanen kaie wir, ki itew: “Iriniwok Crète ka otcitcik, mocak nita kiraskiwok, micta ko matcitawok, kirika kitimiwok, tepirak e mamitoneritakik kitci mitcisotcik.”

¹³ Tapwe aniheriw ka ki itetc. Kaketin tca ki ta kakeskimawok aniki iriniwok icikowisk kitci asperimototawatcik Cecoca,

¹⁴ aka kaie awocamec kitci natotakik arotc atisokaniw cota iriniwa ka aitatisokeritci, acitc aka awocamec kitci pameritakik aniheriw otirakonikewiniwaw ka aiteritci anahweriw iriniwa ka ki wepakonamiritci tapwewiniw.

¹⁵ Kecpin awik e mirwinakositc otehik, kaskina e aiteritak kaie kaskina e aitotak mirwaciniw. Aric iriniwok aka ka mirwinakositcik otehiwak kaie aka ka tapweritakik, kaskina e aitotakik marataniw. Tepirak ka maratanik mamitoneritamok. Kaie wawatc aci nama kiskeritamok e ici mirwacinik acitc e ici maratanik kekociciriw.

¹⁶ Itewok e kiskerimatcik Kice Manitowa, aric e matci totakik, wapatahiwewok aka e kiskerimatcik. Cikeritakosiwok, nama wi natotamok, kaie tekaci nama kackitawok kitci itotisketcik kekociciriw e ici mirwacinik.