Rome iriniwok 9 - Kice Manito Ocki Omirwatcimowin

Kice Manito kirika anihi iriniwa ka ki orapamatc

¹ Tapwe icinakon anihe ke iteian kaskina. Nama ni kiraskin, ni tiperimikw meka Krist. Ni kiskeriten nitehik mia e icinakok, Miro Manito e keskinowiritc.

² Ni micta kackeriten nitehik, mocak kaie ni nekateriten.

³ Ni ta pakitinen nin tipirawe kitci anwerimitc Kice Manito, aka kaie awocamec kitci kanawerimispan Krist, kecpin ki miroparikipan kitci akwacimakik niwitcicanak, niwitc cota iriniwok.

⁴ Aniki Israël iriniwiwok, Kice Manito ka ki orapamatc onitcanica kitci iteritakosiritci, kirika ka ki wapatahatc oticperitakosiwin. Ki mirew otacotamakewinan kaie aiamihe irakonikewiniw. Ki wapatahiwew ke totamiritci e aiamiharitci, kirika ki mirew onespi tapwewiniw.

⁵ Weckatc kit aniskotape kimocominawok ki pe otapikeciniwok. Kaie wir Cecoc Krist ki cota iriniwiw mekwata ka pe iriniwitc ota askik, wir kaskina kekociciriw ka tiperitak. Nespitc kitci mirwatcimakaniwitc Kice Manito! Kekora ki iki.

⁶ Nama nte ni wi itwan Kice Manito aka e ki otci totak onespi tapwewin. Israël iriniwok meka nama kaskina otci iteritakosiriwa Kice Manito otirinima.

⁷ Abraham otaniskotape osima nama kaskina osimiwa iteritakosiriwa. Weckatc meka Kice Manito ki itew Abrahama: “Tepirak Isak ekota nta ke otapikecikik ka ki nespi tapweian.” Genèse 21.12

⁸ Ani e ki itetc Kice Manito, wi itetake aka soka tepirak iriniwok nte ka ki otci nitawikitcik cota iriniwok Kice Manito ka iterimatc Abrahama otaniskotape osima. Tepirak iriniwok Kice Manitowa onespi tapwewiniw ka otci nitawikitcik, enko aniki ka iteritakositcik tapwe Abrahama otaniskotape osima.

⁹ Kice Manito ki nespi tapwew Abrahama, e ki itatc: “Ickwa peikwo piponakake ni ka pe ican. Aci Sara kata ickwa wapamew okosa.” Genèse 18.10,14

¹⁰ Minawatc awocamec ki pe iciwepasiwok. Kitaniskotape kimocomino Isak ki aiamihe nipowiriw kirika peikw iskwewa Rébecca ka icinikasoritci. Anahwe Rébecca ki nicocew ka wapamawosotc.

^11-12 Kice Manito ki itew anahweriw Rébecca epwamoci nitawikiritci anahweriw onicocana: “Anahwe nictam ke nitawikitc kata atoskectawew anihi ke mawotci awaciwiritci.” Genèse 25.23 Ekoni ka itatc e arimomatc anahweriw e niciritci ockinikiwa, aka moci e ki otci miro totakwapan kaie e matci totakwapan. Ekoni ka ici wapatahiwetc Kice Manito wir mocak e oreritak kaskina ke iciwepasitcik iriniwok wir tipirawe ke ici nataweritak. Orapamew peikw awiriwa ka iteritak kitci wicamatc, nama soka e miro totamiritci.

¹³ Mitowi e itemakak Kice Manito Omasinahikanik: “Ni ki orapamaw Cakop, aric ni ki wepakinaw Ésaü.” Malachie 1.2-3

¹⁴ Pot awik iteritamotake: Kice Manito nama icikowisk totam aniheriw e totak. Nama aric tapwe icinakoniw!

¹⁵ Ki itew meka Moïsa: “Ni ka kitimakerimaw anahwe ka wi kitimakerimak, kirika ni ka mirotehekatowaw anahwe ka wi mirotehekatowak.” Exode 33.19

¹⁶ Nama tca kanawapatam Kice Manito e iteritamiritci iriniwa, nama kaie e apitc mantokasoritci kitci miro totamiritci, aric tepirak wir tipirawe kitimakerimew kotc e iteritak.

¹⁷ Kiapatc itasinatew Kice Manito Omasinahikanik ka ki itatc Pharaon, okimawa ka mitarikopanen Égypte askiriw: “Ki ki aritin kitci okimawiin mia kitci ki otci wapatahiweian nimackawisiwin, kitci ki tca tipatcimonaniwok niticinikasowin kaskina e irikokoskamikak.” Exode 9.16

¹⁸ Ki kiskeritenano tca, Kice Manito kitimakerimew anahweriw ka wi kitimakerimatc, kaie e iterimatc awiriw aka kitci natotakotc, totam aka kitci pamitamiritci.

Kice Manito okiciwasiwin kirika okitimakeritcikewin

¹⁹ Pot ni ka kokwetcimikowin: “Kecpin tapwe icinakonikwen ka itein, kekwariw wetci anwerimatc iriniwa Kice Manito e matci totamiritci? Nama awik pitoc kata ki totamiriw aci ka ki oreritak.”

²⁰ Aric ni ka itaw: Awin ni, kir tepirak ka iriniwiin, kitci ki itatc aniheriw Kice Manito? Orakan ka askiwonik, kata kokwetcimew ia aniheriw iriniw ka ki ocitakotc: “Kekwan wetci ki icihiin?” Nama!

²¹ Anahwe ka ocitatc orakaniw kata totam wa totak kirika aniheriw askiriw ka apatcitatc e ocitatc. Aniheriw askiriw kitci apatcitatc kata ki ocitaw orakaniw e mirwacinik, minawatc kotak orakaniw kata ki ocitaw mocak ke apatanik.

²² Wir Kice Manito wi wapatahiwekopan okiciwasiwin kirika wi kiskeritamokopan omackawisiwin. Aric micariw ociciperitamowin. Ki iteritam aka tecikotc kitci wapatahatc iriniwa ka ki ici kackitamatisoritci kitci kiciwasictowatc, aci ka ki nisawitcik kitci niponerimakaniwitcik.

²³ Nataweritamokopan kaie kitci wapatahiwetc e asitci micarik oticperitakosiwin ka ki miratc anahweriw iriniwa ka kitimakerimatc, aci ka ki nisawitowatc kaie wirawaw kitci pe otitikoritci oticperitakosiwin.

²⁴ Kirano meka ka ki natawemikowok. Nama kaskina ki cota iriniwinano, atita nta e taciwok papikan e otitewok.

²⁵ Ekoni ka itetc Omasinahikanik, aci weckatc ka masinahak peikw iriniw Osée ka ki icinikasotc: “Iriniwok weckatc aka ka ki otci mihakik ni ka icinikatawok ‘nitirinimak,’ kaie aniki weckatc aka ka ki otci pe sakihakik ni ka icinikatawok ‘iriniwok ka micta sakihakik.’” Osée 2.25(23)

²⁶ Kaie Kice Manito ki itew: “Neta ka ki itakaniwitcik ‘namaiew ni kirawaw nitirinimak,’ enko aniki ke icinikatakaniwitcik ‘Kice Manito ka pimatisitc onitcanica.’” Osée 2.1(1.10)

²⁷ Kaie wir anahwe ka ki pe nikan tipatcimokopanen Kice Manito otci, Ésaïe ka icinikasospan, ki tepwew kaie wir, e arimomaspan anahweriw owitc iriniwa, Israël iriniwa, e ki itetc: “Misawatc mitcetitawe Israël iriniwok mitowi reko ka mitcek rarewak kitcikamik, atita tepirak neta e tacitcik kata akwacimakaniwiwok.

²⁸ Kata totam meka Teperitciketc ka ki itetc kitci totak, tekaci wewerita kaie wipatc kitci totak ota askik.” Ésaïe 10.22-23

²⁹ Enkweriw peikon Ésaïe ka ki itetc: “Teperitciketc wir ka mawotci mackawisitc ota e irikokoskamikarik, kecpin aka ki otci pakitinatc atita kitaniskotape kosiminowa kitci pimatisiritci, nama ki ta tanano anotc, ki ta icinakosinano, mitowi weckatc ka ki iciwepasitcik iriniwok neta ka tacikewakopanen otenak Sodome ka icinikaterik kirika Gomorrhe.” Ésaïe 1.9

Israël iriniwok icikowisk ka iterimikotcik Kice Manitowa e asperimototakotcik

³⁰ Tan wa itemakak ohwe? Kice Manito ki mirew iriniwa aka ka cota iriniwiritci icikowisk kitci ki iterimatc kecpin asperimototakote, misawatc aka e ki otci nanto kiskeritamiritci icikowisk kitci iterimikotc.

³¹ Aric Israël iriniwok, misawatc e ki nantowapatakik aniheriw e ki mantokasotcik kitci nosanetatcik aiamihe irakonikewiniw, nama icikowisk ki otci iterimikowok.

³² Kekwariw wetci icinakositcik? Nama ki asperimototawewok Kice Manitowa. Ki iteritamok tepirak e miro totakik kitci mirakaniwitcik icikowisk kitci iterimakaniwiwok. Tarasak e ki pacwactecikik, e takoskatatcik “anihi asiniwa ka otci pacwactecinaniwonik.”

³³ Arimomakaniw anahweriw asiniwa Kice Manito Omasinahikanik, e itasinaterik: “Kanawapatamokw, nit araw asini neta otenak Sion ka icinikatek, pacwacteciniwok iriniwok anahweriw asiniwa e pakicikik, anahwe asini enko na tapwe iriniw ka arimomak. Aric anahwe ka tapwerimatc nama wiskat kata mitatam.” Ésaïe 28.16