Rome iriniwok 8 - Kice Manito Ocki Omirwatcimowin

Pimatisiwiniw ka miritokw Miro Manito

¹ Aci nama kata anwerimakaniwiwok iriniwok ka mamweritakositcik kirika Cecoc Krist.

² Aci meka ni tiperimikw Miro Manito, anahwe ka pakitinak pimatisiwiniw iriniwa otci ka mamweritakosiritci kirika Cecoc Krist. Nama tca awocamec ni tiperimikon pactatowin ke nipahikoiapan.

³ Aniheriw ka ki totak Kice Manito kirawe mackawisimakaniw patok kaskina ke ki itotiskemakanik aiamihe irakonikewiniw. Nama meka awik wiskat kata tipi mackawisipan mocak kitci natotak, kitci ki tca wikotcihikotc. Kice Manito aric ki pe iciticahwew Okosa ota askik kitci pe iriniwihitisoritci, mitowi kirano e pactati iriniwiikw kitci ki icinakosiritci, kitci ki pe nta niporitci kipactatowininariw otci. Ekoni ka ki ici cakotcitatc pactatowiniw, aka tca awocamec kitci cakotcihikoikw.

⁴ Ki totam aniheriw Kice Manito icikowisk kitci ki iteritakosiikw, kotc e itasinaterik aiamihe irakonikewinik kitci iteritakosinaniwonik, kirano ka itatisiikw kotc e ici nataweritak Miro Manito, aka awocamec e pameritamokw anihe notc ka ici matci nataweritamokw kiwiawinak.

^5-6 Aric aniki ka pimatisitcik tepirak wirawaw e ici nataweritakik, aspinikotc mamitoneritamok kitci mireritamihitisotcik. Kata tca nipowok. Aniki aric ka pimatisitcik kitci mireritamihatcik e ici nataweritamiritci Miro Manitowa, enkweriw ka ici mamitoneritakik. Kata pimatisiwok kirika kata miroparihitowok acitc Kice Manitowa.

⁷ Aniki aspinikotc ka mamitoneritakik kitci mireritamihitisotcik anwerimewok Kice Manitowa. Nama pakiterimitisowok kitci nosanetawatcik otirakonikewiniw. Nama wawatc kackitawok kitci itotisketcik.

⁸ Aniki ka totakik neta e ici nataweritcikaterik ko owiawinak itekera, nama kata ki mireritamihewok Kice Manitowa.

⁹ Kirawaw, nama nte icinakon e ici pimatisiekw. Nama ki nosanetanawaw e ici nataweritamekw ko kiwiawiwak itekera. Ki totenawaw aniheriw ka ici mireritak Miro Manito, aci meka ki witci tacikemikowaw Kice Manito Omiro Manitoma kitehiwak. Awik aric aka ka tarimatc Cecoc Omiro Manitoma otehik, nama iteritakosiw Cecoc otirinima.

¹⁰ Kecpin aric kitehiwak witci tacikemitakw Cecoc Krist, kitehiwak ki pimatisickakowaw Miro Manito, aci meka icikowisk e iterimitakw Kice Manito, misawatc “nipomakan” iteritakon kiwiawiwaw, osam e ki pactatiekw.

¹¹ Kecpin witci tacikemitakw kitehiwak Kice Manito Omiro Manitoma, anahwe ka ki apitcipahatc Cecoca, otcitakotc kata pimatisitaw kaie kirawaw kiwiawiwariw. Omiro Manitoma kata mirew kitci itotiskeritci, anihi ka tacikeritci kitehiwak.

¹² Takon tca ka actek kitci totamokw, niwitcicanak, kitci ici pimatisiikw kotc e ici nataweritak Miro Manito, aka kitci nosanetaikw kirano tipirawe ka ici matci nataweritamokw.

¹³ Kecpin meka ici pimatisiekwe kirawaw tepirak e ici matci nataweritamokw, ki ka poni pimatisinawaw. Kecpin aric pakitinekwe Miro Manito kitci mackawisihitakw kitci ponitaiekw kaskina anihe ka maratak ke ki totcikatek kiwiawiwak itekera, ki ka pimatisinawaw.

¹⁴ Kaskina meka iriniwok ka keskinowirikotcik Kice Manito Omiro Manitowa, Kice Manito anihi onitcanica.

¹⁵ Anahwe meka Miro Manito ka ki mirikoiekw nama wiskat ki ta matci totakowaw kitci tiperitakosiekw, arotakanak e iteritakosiekw, kirika minawatc kitci koctatciekw. Aric wir Miro Manito ka ki miritakw kitci iteritakosiekw Kice Manito onitcanica, kirika ka witcihitakw kaketin kitci ki pakoserimokw Kice Manito e icinikatokw “Abba! Notawi!”

¹⁶ Wir tipirawe Miro Manito ki witamakono kitehinak tapwe otcitakotc Kice Manito onitcanica e iteritakosiikw.

¹⁷ Ki kiskeritenano tca, Kice Manito onitcanica e iteritakosiikw, kaie kirano kitci ki otitikoikw kaskina aniheriw ka ki itetc kitci miratc onitcanica. Kaskina tapickotc ki ka pe otitikonano kirika Krist. Kecpin meka tapickotc nekatcitaikwe kirika Cecoc, tapickotc kaie ki ka witci tacikemano oticperitakosiwinik.

Icperitakosiwin nikanik ke mirikoikw

¹⁸ E mamitoneritaman e apitc nekatcitaikw anotc mekwata, peikon nama wiec iteritakon ke apitc icperitakok anihe nikotin ke otitikoikw.

¹⁹ Kaskina ka ki ici kiceritak Kice Manito micta pehomakaniw kitci wapatahiwetc awin anihi onitcanica.

²⁰ Kaskina meka ka ki ici kiceritcikatek ki meckotciparin, aka awocamec kitci kicteritakok. Wir tipirawe Kice Manito ka ki ici oreritak kitci icinakonik, namaieriw aniheriw ka ki ici kiceritak ka nataweritamakotc. Aric ki pakitinam kaie asperimowiniw,

²¹ nikotin e kicikarik kaskina ka ki kiceritcikaterik kitci pe nta wikotcitakaniwonik, aka awocamec kitci tiperitakosinaniwonik neta ka ki onitotakowok, anihe ka ki tiperimikoikw. Kata micta icperitakon, mia mitowi kaskina Kice Manito onitcanica ke apitc icperitakosiritci.

²² Ki kiskeritenano tapwe anotc kiapatc e micta nekaterimonaniwok, kaskina misiwe ka takok ota askik e kitomakak e nekatcitamakak, mitowi iskwew e wapamawosotc e icinakok, e petakositc e akositc, e pehatc onitcanica kitci nitawikiritci.

²³ Nama aric anihe tepirak. Kaie kirano aci ki ki mirikono Miro Manito kitci witci tacikemitokw kitehinak, anahwe nictam ka ki ici cawerimitokw Kice Manito, mitcen kiapatc e ki nespi tapwetc kitci cawerimitokw. Aric tarasak ki notakosinano pitc kitehinak, e petaikw Kice Manito kitci miritokw kitci iteritakosiikw onitcanica kirika tekaci kitci wikotcihikoikw kiwiawinak itekera.

²⁴ Aci meka kit ickwa akwacimikowinano, aric mekwata kit asperimonano kitci pe otcitciparik anihe ka ici petaikw. Kecpin ki wapatamokw anihe ka ici asperimoikw kitci takok, namaiew ni anihe asperimowin ka icinikatek. Nama taw awik ka asperimotc ka ici wapatak.

²⁵ Aric kecpin e asperimoikw kekocic aka moci e ki otci wapatamokw, ki ciciperitenano e petaikw.

²⁶ Peikon kaie Miro Manito ki pe nta witcihikono, kirano aka e sapiikw. Nama ki kackitanano wewerita e aiamihaikw. Aric wir tipirawe Miro Manito pakoserimew Kice Manitowa kirano otci. Nekatewotam e aiamihatc, aka e takonik itewiniw ke ki witcikaterik kitci ki otci kiskeritakonik wa itetc.

²⁷ Kice Manito, anahwe ka wapatak e ici takonik kitehinarik, nisitotam e ici nataweritamiritci Miro Manitowa. Aiamihaw meka Miro Manito iriniwa otci ka tapwerimaritci Kice Manitowa, kotc e ici nataweritamiritci.

²⁸ Ki kiskeritenano kaskina kotc ka iciwepasitcik iriniwok ka sakihatcik Kice Manitowa, aniki ka ki iteritamiritci kitci wicamikotcik kitci nosanehwatcik, enkweriw ka apatcitaritci Kice Manitowa kitci ki miro totawakaniwitcik.

²⁹ Aniki ka ki nikan orapamikotcik Kice Manitowa, peikon kaie ki orerimikowok mia wir Okosiriw kitci icinakositcik, kitci ki tca witcicanitoritci mitcet iriniwok otci.

³⁰ Aniki tca otci ka ki nikan oreritamiritci Kice Manitowa, enko aniki kaie ka ki wicamikotcik. Aniki ka ki wicamikotcik, enko aniki kaie ka ki mirikotcik icikowisk kitci iterimikotcik. Aniki tca ka ki mirikotcik icikowisk kitci iterimikotcik, ki mirikowok kaie oticperitakosiwiniw.

E apitc sakihitokw Kice Manito

³¹ Kekwan ke ki iteikw, aci e kiskeritamokw anihe? Kecpin Kice Manito e witcihitokw, awin ke ki cakotcihitokw?

³² Nama meka ki otci matcikonew wir tipirawe Okosa, aric ki pakiterimew kitci pe nta niporitci kaskina kirano otci. Ekoni tca ka otci kiskeritamokw kitci miritokw kaskina kekociciriw.

³³ Nama awik kata ki itactahorew anihi iriniwa Kice Manito ka ki orapamatc! Wir meka tipirawe Kice Manito ka icitatc icikowisk aci kitci iteritakosiritci.

³⁴ Nama tca awik kata ki atamerimew! Cecoc Krist meka wir tipirawe ka ki nipotc, minawatc awocamec ki totam, ki apitcipaw, aci e apitc neta ka ici kicteritakonik onihiwinik Kice Manito kirika pakoserimew kirano otci.

³⁵ Nama kekociciriw kata nakackako Cecoc Krist e sakihitokw, nama arimisiwin, nekatcitawin, mareritcikewin, pakatewin, kitimakisiwin, kecpin nakickamokwe e koctatakok, kekotc nipowin.

³⁶ Mia ohwe ka itactek Kice Manito Omasinahikanik: “Osam e nosanehitak, aspinikotc tawok iriniwok ka wi nipahimitcik. Mia maritcenicak ka wi nipahakaniwitcik nit iterimikowinan.” Psaumes 44.23(22)

³⁷ Kotc kaskina anihi e iciwepasikw, ki sokikapowinano kitci cakotcitaikw, osam e witcihitokw anahwe ka ki sakihitokw.

³⁸ Otcitakotc ni ketcinaweriten, aka e takok kekocic ke ki otci atciwoparinik irikik e sakihitokw Kice Manito: nama kekocic mekwata e pimatisiikw, nama kaie kecpin nipoikwe, nama kaie aceriwok acitc manitowok ka nikaniwitcik kirika ka mackawisitcik, wakwek ka otciparitcik, nama kaie kekocic anotc mekwata ka nakickamokw kekotc nikanik ke ki iti nakickamokw.

³⁹ Nama wawatc mackawisiwina icpimik askik ka otcipariki, nama kaie atamitawok, nama kaie kotak kekocic ka ki kiceritcikatek kata ki otci atciwopariniw irikik e sakihitokw Kice Manito. Ki ki meka wapatahikono e apitc sakihitokw, e ki pakitinatc anihi Ka Tiperimitokw Cecoc Krist kitci niporitci kirano otci.