Rome iriniwok 6 - Kice Manito Ocki Omirwatcimowin

Mia e nipoikw e iteritakosiikw e pactatiikw, aric ki koski pimatisinano e nosanehokw Cecoc

¹ Tan ke iteikw? Kiapatc ia ki ta pactatinano, awocamec kitci ki miritokw Kice Manito omirotehewin?

² Nama nte icinakon! Pactatowin nama kata kackitamakanopan kitci tiperimikoikw, tarasak ki ki niponawaw pactatowinik. Nama awocamec ki ka ki pimatisinano pactatowinik.

³ Ki kiskeritenawatake, kaskina e taciikw ki ki sikahatasonano kitci ki mamweritakosiikw kirika Cecoc Krist. E ki nipotc, mia peikon kaie kirano e ki nipoikw.

⁴ Ka sikahatasoikw, mia peikon e ki rikwaskatikoikw kirika wir, tapickotc kitci nipoikw kirika wir, minawatc kitci ki ocki pimatisiikw, mitowi Cecoc Krist e ki apitcipahikotc Kotawino omackawisiwin e icperitakonik e ki apatcitaritci.

⁵ Kecpin meka tapwe ki mirikoikw kitci mamweritakosiikw kirika Cecoc, e ki nipoikw mia mitowi wir ka nipotc, peikon otcitakotc ki ta mamweritakositano kirika wir, e ki apitcipaikw, mia mitowi wir ka ki apitcipatc.

⁶ Ki kiskeritenano ohwe: epwamoci kiskerimokw Cecoc, pactati iriniwok kit iteritakositano. Aric tarasak e itatisiikopanen ki tcictaskowateriw tcipaiatikok kirika wir Cecoc ka tcictaskowatakaniwitc, kitci ki tca nipatakaniwok anihe matci itatisiwin notc ka nosanetakaniwok, aka tca kaie awocamec pactatowin kitci tiperimikoikw.

⁷ Awik meka e nipotc, pakitiniko pactatowiniw, aka awocamec kitci tiperimikotc.

⁸ Kecpin ki nipoikw kirika Krist, kit tapweritenano kitci pimatisiikw kirika wir.

⁹ Ki kiskeritenano nama awocamec kata nipo Krist esko ka apitcipatc. Nama awocamec kata ki cakotcihiko nipowiniw.

¹⁰ Apitc ka nipotc, ki totam aka wiskat awocamec kitci cakotcihikotc pactatowiniw, tipipariniw peikwaw e ki nipotc. Aci anotc e ki apitcipatc, pimatisiw Kice Manitowa otci.

¹¹ Peikon kaie kirawaw, ki ka iterimitisonawaw e ki nipoekw pactatowinik itekera, kaie e pimatisiekw Kice Manito otci, e mamweritakosiekw kirika Cecoc Krist.

¹² Aka pakitinamokw pactatowin kitci tiperimikoekw, kaskina tca e aitotamekw, aka kitci totamekw ka ici nataweritamekw kiwiawiwak e nipomakak.

¹³ Aka pakitinamokw wawatc peikw nta e tatik e owiawiekw kitci ici tiperimikoiekw pactatowin, kitci matci totamekw. Aric ki ka pakitinenawaw kipimatisiwiniwaw Kice Manito otci, e kiskeritamekw mia peikon e ki nipoekw, aci tca anotc e koski pimatisiekw. Kirika tekaci ki ka pakiterimitisonawaw kitci atoskectawekw, kitci ki tca mirwapatcitaiekw kipimatisiwiniwaw, icikowisk kitci totamekw.

¹⁴ Nama tca aci ki ka tiperimikonano pactatowin, aka aci e tiperimikoekw aiamihe irakonikewin, wir tca tipirawe Kice Manito omirotehewin e tiperimikoekw.

Icikowisk kitci itatisiikw

¹⁵ Pot awik kata iteritamopan ohweriw: “Ki ka nta pactatinano osam aka awocamec e tiperimikoikw aiamihe irakonikewin, aric ma Kice Manito omirotehewin e tiperimikoikw.” Nama ketcinatc!

¹⁶ Ki kiskeritenawatake, kecpin e pakiterimitisoekw kitci nta atoskectawekw awik, patoc ki ka natotawaw ke ititakw, mia arotakanak kitci iterimitakw, ki tiperimikowaw anahwe ka natotawekw. Kecpin tca e natotamekw pactatowin, ki tiperimikowaw. Nipowinik tca iticimon anihe meskanaw. Kecpin aric natotawekwe Kice Manito, pakitinekwe wir tipirawe kitci tiperimitakw, icikowisk ki ka ici pimatisinawaw.

¹⁷ Mirwatcimatan Kice Manito ohweriw otci, aci tekaci e irikokoteheiekw e natotamekw anihe kiskinohamakewin ka ki pe otitikoiekw, misawatc weckatc e ki tiperitakosiekw pactatowinik.

¹⁸ Ki ki wikotcihikowinawaw e tiperitakosiekopanen pactatowinik. Anotc aci tekaci ki pakitickatamowaw Kice Manito kitci tiperimitakw, icikowisk kitci ici pimatisiekw.

¹⁹ Wetci ici arimweian, e arimotaman e tiperitakosinaniwok, kitci ki witcihitakok kitci nisitotamekw, osam aka e mackawisiekw kitci nisitotamekw. Weckatc kaskina wiec ki ki pakitickatenawaw kiwiawiwaw kitci nosanetaiekw matci pimatisiwin kirika eckam ki ki iti matci totenawaw e wi cakotcihekopanen Kice Manito. Aci aric anotc pakitickatamakw Kice Manito kitci tiperimitakw, kitci totamekw icikowisk ka icinakok, tekaci kitci ki itatisiekw kotc e ici nataweritak.

²⁰ Mekwata ka tiperimikoekw pactatowin, nama ki ki otci kackitanawaw icikowisk kitci pimatisiekw.

²¹ Anotc ki waneritenawaw kaskina ka ki ici pa aitotamekw. Tekaci nama ki ki otci witcihikonawaw! Nipowinik iticimon anihe ka ki pe aitotcikatek!

²² Aric ki ki wikotcihikowinawaw pactatowinik e tiperitakosiekopanen kirika Kice Manito kit atoskectawaw, wir e tiperimitakw. Mictahi ki witcihikowaw kitci ici pimatisiekw kotc e ici nataweritak. Nikotin e kicikak ki ka mirikowinawaw kakike pimatisiwin.

²³ Kecpin awik atoskectake pactatowiniw, kackitamatiso kitci nipotc. Aric Kice Manito cawerimew kaskina awiriw ka witcewaritci kirika anihi Ka Tiperimitokw Cecoca, e miratc kakike pimatisiwiniw, aka e petatc kitci koski mirakaniwitc kekwariw.